Mawinak Uanthuanpitu

Mawinak Uanthuanpitu

2005 kum hrawng ahcun Thailand Roluah Siangpahrang Fapa (Crown Prince) ih nupi Srirasmi Suwadee (Siangpahrang sungkaw hmin – Akharaphongpreecha) timi cu Thailand ahcun mi zaran ih zoh ngam lo khop in huvang a rak ngahtu siangpahrang innsang sungtel pakhat a rak si. 2005 kum April thla ah a pasal Roluah Siangpahrang Fapa Maha Vajiralongkorn hrangih fapa a vun neih tikah Thailand ih thuthangca pawl, mekazin pawl ah nasa zet in an tarlang. Nau a neihnak zato ihsi inn a tlun ding ttum khal ah mawttaw umnak thlen tiang in a pal ding mi puan nem an phah sak. Media pawl in an nufa cangvaihnak phunphun cu siangpahrang innsang thuthang dinhmun in an fak, an cawisang hai. 

Cumi ihsi kum 10 a rei hnu, 2015 ahcun thil umdan a thleng aw zo. Siangpahrang Fapa Maha Vajiralongkorn cun a nupi a pek mi roluah siangpahrang innsang hmin Akharaphongpreecha cu a laksak sal. Cu thluh in a nupi ihsin a tthen.

Cu thluh ah, Srirasmi ih unu le sungkhat pawl cu eithupnak mawhphurh in thawng a thlak. Kan dung naite ah Bangkok ih um Srirasmi ih nu le pa cu Thai Siangpahrang sungkua hmuhsuamnak mawh thawn kum hnih le hrek veve thawng ah an thla. 

Srirasmi ih nun hin nonal mawinak rinsan in tluntabik ih kai thlen hnu ah, na zet ih a tla sal mi nunau pakhat ih dinhmun a tarlang. Srirasmi ih nu le pa cu mi zaran an si ih Samut Songkhram ramkulh ih suak an si. Srirasmi cu kum 22 a ti kum, 1993 ah Thai Siangpahrang Innpi ah hna a ttuan thok. 2001 kum ah Roluah Siangpahrang Fapa Vajiralongkorn thawn an nei aw. An neihawk hlan ahhin Siangpahrang Fapa hin nupi vei hnih a rak nei dah ih, fa panga ih pa a si. Srirasmi cu a nonal in a duhnung zet. Cu lawng hman si lo in Bangkok khawlipi ih Kasetsart Phunsangtlawng ihsin master degree ngahtu a si. An neihawk ahhin Siangpahrang Fapa cun innsang nuam din ih hahdamtei’ um a duh ruangah a si thu a rel. 

“Kum sawmnga ka si zo. Curuangah innsang famkim neih ka cu zo. Anih hin ka innsang ttulhai hmuahhmuah in tuangtim sak ding,” tiah a sim.

2005 kum February thla ahcun Srirasmi cu Siangpahrang Fapa ih fa a von tiah Thai Siangpahrang Innpi ihsin thuthan an suah ih, April thla ah fapa a run hring. Cutikah Thai Siangpahrang Bomibaw in Roluah Siangpahrang Fapa ih nupi sinak a pe. Siangpahrang innsang ih puai ropi tam zet khal ah Srirasmi cu Siangpahrang Fapa Nupi dinhmun in an sunsak zet.  

Asinan Thai Siangpahrang kiang ih hnattuantu khawnbawl pawl cu mi zaran men ihsin siangpahrang sungkua hung si cih Srirasmi cu an mit a kem. Siangpahrang ci thlah dinhmun ih anih vek minung upat pek lu kun cu an tlawm la ti a si. Cu lai fang ah Srirasmi ih neihsiah sumsaw cen luartuknak thuthang pawl a hung suak. Srirasmi ih nu le pa, sung le khat pawl khal in Srirasmi ih ngah mi canvo le hamtthatnak pawl cu a pengparang in an rak hmang. A besebik cu Siangpahrang Fapa ih uico suahcam lomnak ah Srirasmi in taksa tlunlam lang hnipuan a hruh mi a si. Cumi zuk internet ih a darh vivo tikah Thai miphun pawl cun umtlan dan thiam lo Srirasmi an soiselnak a nasa sinsin. 

Vajiralongkorn ih pa Siangpahrang Bhumibol Adulyadej hi leitlun ih siangpahrang ttuancam reibik pakhat a si ih, kum 64 sung siangpahrang a ttuan zo. US dollar million 40 hrawng a neinung ding tiah an hisap mi a si ih, Thai mipi pawl khal in an ngaina. Asinan tunai kum pawl ihsin a harhdamnak a tlakniam ruangah mipi hmai hman ah a lang thei nawn lo. Curuangah Thai mipi cu an siangpahrang neta ding hrangah an don a har.

Thai siangpahrang cun kum 62 mi Roluah Siangpahrang Fapa a nei nan mipi ih ngainat lo mi a si. Roluah Siangpahrang Fapa Vajiralongkorn cun Nitlaklam nuntu khawsak dan ngainatu, tidai vekih paisa hmangtu, neihsiah centu, nunaulam ih tlaran tiah a hmin a thang. Thai mipi in anih hnakin a naunu Maha Chakri Sirindhorn an ngaina sawn.  Cuihleiah Vajiralongkorn cun Srirasmi vek, Thai siangpahrang sungkua ih cohlan theih lo, mi zaran men a neih tikah mipi ih ngainatnak a tlaniam sinsin. 

“Thai Roluah Siangpahrang cu an ram ih ra tlawngtu Japan Tlangbawipi ih vanzam amai’ vanzam thawi’ khamtartu, paisa tampi seng in uico suahcam lom puai a tuahtu ti’n a hmin a thang,” tiah Amerikan miphun zirhliahtu pakhat cun a faksel. 

Roluah Siangpahrang Fapa Vajiralongkorn in a nupi pathumnak Srirasmi a tthennak san hi mipi ih ngainat a hlawhlonak rehter a duh ruangah a si tiah an ti. Thai khawnbawl upa pawl ih ngainat lo mi a nupi Srirasmi a tthennak ihsin mipi ih duh hlawh sal ding in a zuam tiah media tthenkhat in an tarlang. Tthenawknak kuan sum ah Thai baht million 200 (US dollar million 6 hrawng) Srirasmi a pe. Kum kua mi an fapa cu Siangpahrang Fapa le Siangpahrang sungkua in an zohkhen ding. 

Thuzilzuang ahcun Siangpahrang Fapa cu vanzam hnattuan nunau no pakhat thawn an um tlang ih fapa pakhat an neih zo thu, a rei hlan ah cu nu cu Roluah Siangaphrang Fapa nupi a si men thei thu, a thang. Asinan Thailand ahcun siangpahrang sungkua soisel cu kum 15 tiang thawng tlak theinak a si ruangah Thai thuthangca pawl cun cumi thu cu an ngan lo. 

Tu ahcun Srirasmi cu Bangkok khawlipi leng ih amai’ inn ah a ropitnak le sunlawinak pawl nei nawn lo in, um har zet in a nung thlang. A fapa hman a duh cancan ih ton a ngah nawn lo. A nu le pa, sung le khat pawl khal siangpahrang sungkua hmuhsuamnak, eithupnak tivek thubuai thawn thawng an tla. Amah lala hman ziangvek thubuai neihter a si lai ding ti khal hisap theih a si hrih lo. Srirasmi hrang ahcun leitlun ih vuakvelhnak nasabik a tuar lai fang a si. 

“Nunau tthenkhat cu an no lai ah an mawinak rinsan in pasal neinung ka neih ngah cun ka nun cu a famkim si ko tiah an ruat. Asinan mawinak le nonalnak cu a hmun ringring lo. Kum a hung upat cun mah hnakih mawi cu an hung suak ringring. Mawinak pakhat lawng hmangih mipa pawl kaihngah tumtu pawl cu hitin an tlase sal ringring si ko,” tiah Bangkok khawlipi ih um Ma Thandar in a sim. 

Ziangkhal si sehla siangpahrang nupi timi cu siangpahrang thawi’ neihawk lai lawng ah tluntabik thlen a theih ih, siangpahrang in a hnon hnu cun na zet ih tlak sal a si timi cu Srirasmi ih nun in a tarlang a si bik. 

#Irrawady thuthangca ih, Ma Htar Htar Myint ngan mi “Shin Bayin nae Nyarr Hma Miphayarr” leh mi a si.