Nunui’ Kut

Nunui’ Kut

Mino pakhat hi company tumpi pakhat ih manager hnattuan a va dil. Tonsuhnak hmaisa a hlawhtlin ruangah tonsuhnak netabik a si mi company director ton ding a si thlang.

Director in mino ih nunthutawi a zoh tikah fimthiamnak lam ih thleng sang zet a si kha a hmu. Cutikah mino cu, “Naupa, tlawng na kai lai ah scholarship na rak dil lo maw?” tiah a sut.

“Dil dah lo.”

“Cuti a si ahcun na pa in tlawngkai man a lo kuan sak maw?”

Mino cun a lu a thing.  “Si lo. Ka pa cu kum khat ka si hrawng ah in thih san. Ka tlawngkai man pawl in kuansaktu cu ka nu a si.”

“Asile na nu cu ziang hna a ttuan?”

“Thil soptu a si.”

Cumi a theih tikah director cun mino cu a kut malte zoh sak ding in a dil. Mino in a kut cu director hmai ih a pharh tikah kut nonal mawi zet an si kha a hmu.

“Naupa, na nui’ thil sop na bawm dah maw?”

“Aih, ka bawm dah lo lawlaw. Ziangahtile ka nu cun ca zuam ding lawng in fial. Cun, kei hnak in ka nu cu a sop rang thei sawn si.”

“Aw. Cuti a si ahcun lo dil duh mi pakhat ka nei. Inn na thlen sal tikah na nui’ kut pawl kha na va kholh sak thei pei maw? Cu thluh in thaisun ah I ra tong sal aw.”

Mino cun hnattuan a ngahnak ding ah cumi cu thil thupi zet a si ti a theithiam. Curuangah inn a thlen tikah a nu cu a kut kholhsak a duh thu a sim. A fapa ih ttongkam a theih tikah a nu cu a lung a awi zet. Thinlung sa hiamhiam in a kut cu a fapa hmai ah a pharh.

Mino cun a nui’ kut cu nuamtete’n a kholh thok. A kholh phah cun a mitthli an tla. A nui’ kut pawl cu kum tarnak ruangah an sawng thluh ih hriamhma khal tampi an um kha a hmu. Hriamhma tthenkhat tla cu a vun dai tikah an na ih a nu a com dukdo thei.

Himi kut pawl hi a tlawngkai man pe thei ding in ni tintei’ thil a rak soptu kut an si ti a ruat ngah hmaisabiknak a si. A nui’ kut ih hriamhma pawl cu a fimthiamnak hrangah, a tlawngkainak hrangah, a hmailam caan hrangah, a man a rak petu pawl an si. Mino cun a nui’ kut a kholhsak thluh hnu in a nui’ sop ding mi hnipuan hmuahhmuah cu ttong lo te’n a sop sak thluh. Cumi zan cu an nufa in reipi tiang an titi tlang.

A thaisun ah mino cu director ih zung ah a va feh. Director in, “Naupa, mizansun ah inn ah ziang na tuah ih, ziang na zir ngah timi in sim thei pei maw?” a ti tikah mino ih mit ah mitthli an hung tlingkhawm.

“Tu ahcun ka sunsak ding mi le a par ih ka lungawi ding mi ziang a si ti ka theithiam zo. Ka nu um lo sehla tuini ih keimah hi ka um thei lo. Ka nu bawm phah in thil pakhat hlawhtling ko ih tuah ding hi ziangtluk in a har timi ka theisuak. Innsang somdawl ih thupitnak le a man a khun zia khal ka theithiam thlang.”

Mino ih sonnak a theih tikah director cu lungkim zet in a hni-no.

“Cumi cu manager ttuantu ding ih ka duh mi minung ih lungput ciah a si. Hnattuan ka pek duh mi cu midang pawl ih bawmnak a sunsak thiamtu, hnattuan tthehsuah a si theinak ding ah midang pawl ih harsatnak khal a hmuthiamtu, sumpai hi nunnak ih hmuitin mi ih a retlotu minung a si. Hnattuantu ah ka lo la ding.”

Mino cu hnattuan a ngah ihsin nasa zet in a zuam. A hnattuanpi pawl ih ttihzah khal a hlawh. A hnattuantu pawl khal pawlkom lungrual zet ah cang in hnattuan an zuam zet. A rahsuah cu, an company nasa zet in a tthangso.

Hram: The Real Singapore ih “Mother’s Hands Story.”