Naute ih Vancungmi

Naute ih Vancungmi

Ni khat ah naute pakhat in Pathian a sut.

“Leitlun i kut ding tiah an rel ka thei. Leitlun ka thlen tikah ziangruangah tenau le bawmtu nei lo in ka um?”

“Vancung mi lak ih pakhatkhat ka hril ding ih ka lo kilkhawiter ding,” tiah Pathian in a sawn.

“Asinan,” tiah naute cun, “Vancungram ahcun hlasak le hnih bak lo cu zianghman ka ttuan lo. Himi lungawinak pawl hi ka hrangah a ttul mi an si,” a ti sal.

 “A lo kiltu vancungmi in ni tinte’n hla a lo saksak ding ih, na hrangah a hni ding. Vancungmi ih duhdawtnak ruangah lungawinak na ngah ding.”

“Culen…..” naute cun a sut peh. “An ttong mi theithiam lo sehla ziangtin ka tuah ding? Ziangtin minung pawl ih ttong ka theithiam thei ding?”

“A olte ko. Na vancungmi in ttong a lo zirh ding. Ttong hmuahhmuah lak ih a mawibik, a thlum bik pawl kha zawiawitheinak, lainat zawnruahnak famkim thawn a lo zirh ding.”

Naute cun a lu tungso phah in, “Nangmah lo biak ka duh can ah ziangtin ka tuah ding?” tiah a sut.

Pathian cun hni-no phah in, “Na vancungmi in na kut sih-zum phah ih thlacam dan ding a lo zirh ding,” tiah a sawn.

“Leitlun ah mi sualral pawl an um tiah ka thei dah. Zo in I kilkhawi ding?”

Pathian in naute ih taksa parah a kut hngat phah in, “Na vancungmi in a lo kilkhawi ding. Nunnak hrangih ttihnung mi harsatnak na ton khal ah a lo kilhim thotho ding,” tiah a sim sal.

Naute cun lungngai hmel pu in, “Leitlun ka thlen tikah Nangmah ka lo hmu nawn lo ding ih, ka riah a sia,” tiah a ti.

Pathian in naute cu a ttang ah pom phah in, “Na vancungmi in ka thuhla a lo sim hai ding. Cu thluh in, ka hnen ih thlen sal thei dan pawl tla a lo zirh ding. Curuangah Pathian cu na hnenah a um ringring an tinak san a si,” tiah a sim.

Pathian ih ttongkam ruangah naute cu a thin a nuam sal ko nan leitlun ihsi ra thang mi awn a thei. Naute cun thinphang zet in, “Bawipa Pathian, leitlun ih ka feh a ttul thlang. Zangfahte’n ka vancungmi ih hmin in sim hram aw,” tiah a dil.

Pathian cun, “Na vancungmi ih hmin cu cutluk in a thupi lo. Olte’n “Nunu” tiah na ko thei ko,” tiah a sawn sal.

Hram: Mei Lar in San Xiao siimlam thuthangca sungih a ngan mi ca a si.

Lehnak: Nine Nine Sanay ih facebook wall ih “Naute ih Angel.”