Vantthatnak Cabuai

Vantthatnak Cabuai

Siimlam zanriah ei can a si thlang. Pursum leilawnnak boruak a siat lai a si ruangah Danny ih rawldawr cun rawl an khawng thei lo. Curuangah thla thum tiang a hlep zianghman a ngah lo. Sumhram vun suah ding a neih nawn fawn lo ruangah thaisun ihsin himi rawldawr hi a khar a ttul thlang ding. Tuizan hi a rawldawr hrangih zan netabik a si. Ttum khat lai ih, rawl leitu ding pawl in dingtlar thliangthliang khop ih rawl an hngak lai can pawl a vun ruat sal.

Zanriah ei can a si ko nan dawr ahcun zohman an um lo. Cabuai pakhat te lawng ah pafa hnih an um. An pafa khal cun rawl kheng khat lawng an cah ih an pafa in an ttawm aw. Naute cu hmeh a um lo ruangah a pontam rero. A pa cun beidong zet in a lem rero.

Culai fang ah mithmai nel um lo zet mi pakhat a rung lut. Tui zan hrangih rawl ra eitu netabik a si a zum ruangah, Danny cun a ttha theibik ih rak zohkhen a tum. Ziangahtile himi rawldawr hrangih thlahawknak netabik a si thlang ding!

Mikhual cun rawl mallai a cah.  Danny cun a mangbang ding in hitin a sim: Na cah mi rawl pawl kan rak keng lohli ding. Na tonak cabuai hi Vantthatnak Cabuai a si. Curuangah na cah mi rawl pawl khal a lak in ei aw. Na cah duh bet mi an um lai khal ah, cephnep kamram ei ding tiang in cah ko aw. A lak in ka lo do ding."

Mikhual cu mangbang hmel a pu. A mitkil khaisang in a hun zoh. Rawl a ei. Danny in kamram a rak pek bet ngaingai tikah mikhual ih mithmai nel um lo zet cu theihtheih khop in a hung hni suamso thlang.

A sir cabuai ih rak totu naute cun kamram ih ei ding sang le thingthei pawl a hmuh tikah a pa a ngen. A pa in, "Paisa a cem zo, pontam tuk hlah," a timi awn cu Danny le mikhual cun an rak thei veve.

"Khimi sang ka ei duh, Papa."

Mikhual cun Danny hnenah, "Kei khal in himi cabuai ih vantthatnak hi midang hnenah ka hlawm duh ve. A cem mi man cu ka lo pe ko ding," ti phah in ei-in cu naute a pe hai.

Naute khal cu mithmai me sialsial ihsin lungawi mithmai a hun pu lohli ih, a khir a zuang. A pa cun mikhual hnenah lungawithu a va sim. Mikhual cun naute ih pa cu a cabuai ah toter in rualpi ah a tuah. A hmin cu Kuer a si thu, company neitu a si thu sim phah in hmeltheihnak a tuah.

Naute pa ih hnattuan a sut ve tikah, "Zuarmual manager (marketing manager) pakhat ka si. Asinan kan company ih sumtuahnak a tluang lo. Curuangah hnattuantu mipum an tthum tum mi ah ka rak tel. Tui thla cem cun hnattuan ka nei nawn lo. Hnattuan nei lo tinak ka si cu," tiah a let.

"A va remcang ve. Ka company hrangah manager pakhat ka ttul laifang a si. Ka company ah tonsuhnak (interview) ra tuah hnik awla," tiah Kuer cun a sim sal.

Cumi ttongkam pawl cu Danny cun an kiang ihsin a rak thei. Vantthatnak Cabuai timi thawn a dawr a cawlhsan zawng ih thil ttha a tuah mi ruangah, ruah lo pi in mi pathum an lungawi tlang kha a hmu.

Anih khal cumi a hmuh tikah a lung a awi ve. A thaisun khal ah rawldawr cu a khar siang lo. Suan ding ei-in pawl lei in dawr cu a ong. Zarh khat sung tal cu ka tuar ttentto hrih pei tiah thutluknak a tuah. Ni tinte'n Vantthatnak Cabuai timi cabuai pakhat a tuah. Cumi cabuai ih ra to ngahtu cu rawl man a la hai lo. Ni khat, ni hnih, ni thum............

Cumi thuthang cu a kiangkap hmunram pawl ah a darh lohli. Mai' hualvan a tthat le tthat lo hisap duhtu mi tampi an ra ttheu. Cuti'n a hnuk cat zik cuahco rawldawr cu a hlan vek in mi tampi in an dawr thlang.

Mikhual an khat hluahhlo. Danny ih dawr cun a kel a hun awh sal thlang. Mikhual pawl parih duhsaknak lungput a neihnak, a rawl pawl an thawtnak, hnattuan felfainak, a tthazawng ih a hmin larnak pawl ruangah a sumtuahnak a hlawhtling so sal.

Kuer cu Danny ih dawr ah kum tawkfang rei tiang in, rawl a ra ei ringring. Danny thawn rualpi ttha zet khal ah an cang.

Ni khat cu Kuer in hitin a sim: "Na dawr ih ka ra thlen hmaisabik ni ahkhan ka thinlung sungah ziang ka ruat ti na thei maw?"

Danny cun a lu a thing. Kuer in a sim peh sal.

"Khami zan ahkhan rawl vei khat ka ei hnu ah, mah le mah thahawk ka rak tum."

Danny cu a mang a bang. Kuer cun a ttong a peh lala.

"Khami zan ahkhan ka nupi in ka hrangah ca pakhat in tanta ih inn tlansan. Ca sung ahcun nupi hrangih caan malte hman pe thei lo in, hnattuan hlir buaipitu cu pasal ih a pom thei nawn lo thu, ngaihthah mi si a tuar thei lo ruangah, mipa dang pakhat a thlun zo thu, thlahnak thucah a rak ngan."

Danny cun Kuer cu lainat zet in a zoh cuahco.

"Ca ka siar ttheh tikah mi mumal lo zet ka si ti'n ka vun ruat aw. Ka nupi cu ka duhdawt. Ka duhdawt ruangih ka tthit mi a si. Ka duhdawt zet ko. Asinan company hnattuan, paisa hawl hnattuan ah sunsun zanzan ih ka rak ciahawk ruangah ka kiang ih um ka nupi cu ka rak ngaihthah ah a cang. Nasa zet ih thil ka rak ti sual ruangah ka sir aw tuk. Ka bei a dong tuk lawmam ih nun peh vivo khal paih nawn lo khop in ka kekkuai. Ka nun peh khal ah ziang tthathnemnak a um nawn ding? Cuti'n mah le mah that aw ding in thutluknak ka tuah."

A thawpi a thaw. Riahsia zet ih thu rel rero Kuer cun a ttong cu malte sung a cawl lawk. A thinlung hngelhnget ding in a hun tuah sal.

"Asina khami zan ahkhan ka dawr sungih ka tonak cabuai cu Vantthatnak Cabuai a si timi i ra sim ahkhan i deusiah tiah ka ruat lawk. Mi ih do mi zanriah ei phah in thu pakhat ka ruat suak. Himi vantthatnak hi kei khal in midang pakhat hnenah ka hlawm ve ding. Mi dang pakhatkhat a lungawi lai ka hmuh tikah keimahte'n mi ttangkai ka si ve lai tiah ka vun ruat aw. Curuangah nun thar pakhat ka thok sal ding tiah thutluknak ka tuah."

Kuer zoh phah in Danny cu a mitthli a hal. Himi dawr khar lanta ding zan netabik ah thil ttha pakhatkhat tuah duhnak lungput thawn Vantthatnak Cabuai timi a rak polsuak.

Amai' hrangah hlawknak ngah a tum lo. Peksuah ding lawng rori, a ra kir sal ding mi zianghman a beisei lo tu duhsaknak lungput!!!!!!!!!!

Hminsin: Chit Naing (Psychology) in "Latu Rit in Petu Zangkhai" cahram sungah Nine Nine Sanay ih cahram a tarlang sal mi kha a rem dan in leh mi a si.