Nunui' Aw

Nunui' Aw

Papa a thih lai ah anih kum (10), a naupa kum (8) an si.

Hringnun cu nuamtetei' suai vivo mi suaizuk pakhat vek in rong mawi zetzet thawn a ceiawk rero lai ah ruahpi ih theh ciar a tuar thutthi. A nun ih lungawinak le hnangamnak pawl cu a siat ttheh mi suaizuk bang in an hloral.

Papa a thih hnu cun, tui hlan ih rak nunnem zet Nunu tla a thleng danglam aw verver. A thin a tawi ol thlang. Kheng pakhat te tlak kuaiter men ah cawl lo bang lo in a kawk thlang. Cumi caan ihsin Nunui' aw cu a hua thok. Ring le fem zet Nunui' aw cu a hna sungah sualral zet in an rung lut ih, a nunmuril tiang an fang. Tui hlan ih a rak nem zet mi Nunui' aw pawl ziangruangah hivek in an thleng aw ti a rak ruat thiam thei lo.

Cumi lai ahcun Nunu cu kum (30) hrawng lawng a si lai ding. A mawinak le tthatnak a famkim mi pangpar pakhat vek a si tikah Nunu a ttot duhtu khal an rak tam. Asinan vel a ra themtu hmuahhmuah in a rak hro tlan ringring. Nunu cun a kuhhruk a tung ferfer cia mi sakuh vek in a kiang ih ratu hmuahhmuah cu a kuhhruk thawn a rak sun ih, amah le a naupa cu a humhim hai.

Nunu cun pumcawmnak hrangah bazar sungih hmun pakhat hawl in thil a zuar. Zingpit nazi pali a kim cun a tho ih, khaw sung bus to in, khawlu lam ihsin khawtaw lam ih bazar ah a feh. A fehnak cu kan umnak khawpi vei khat hel thluh tluk a si. Thli le ruah ruangih rin thluh mi Nunui' taksa cu ni sa ih pho mi thingrah ro vek in a vuai hnianghni thluh.

Kum (16) a si lai ahcun nun hngelhnget a nei mi fala tleirawl a rak si. Sang Tlawng (High School) a kai ih ca khal a thiam. Sun tlawng ttum caan ah inn ah a ra tlan tlung ih rawl a suang. Cu thluh in lamzin tampi kan in Nunu rawl a hei khaih. Bazar ih awn ring celcel tam zet lak ahcun Nunu cun a kut khatlam thawi' rawl ei suahso phah in, khatlam ah thil leitu pawl thawi' thil man an rel rero lai hlir a hmu ttheu.

Vei khat cu bazar a thlen zawng ah Nunu le mi pakhat an tawhawk lai a va hmu. Nunui' aw ring le thip zet cun hlaral ih um mi a hna cu na zet in a run hngong. Nunu thawi' to aw tu nunau thau le niam ttuihtti cun Nunu a neh lo ruangah a pasal a va kawlruai. A pasal in Nunu cu thawi a tum. Nunui' mithmai ih cil le mitthli pawl cu fiang zet in a hmu. Cumi cun a no zet lai mi a thinlung cu an ciarter thluh.

.........................

Kum (22) ah tlawng a ttheh. Tlawng kai peh thei dinhmun in thiamnak a nei nan a naupa le ni khat hnu ni khat a ttawl vivo mi Nunu ih taksa ruangah tlawng kai peh ding cu a tthulh san.

A ngah hmaisabik mi thlahlawh Nunui' kut ih a pek tikah Nunui' kut hraw-hram zetzet pawl cu phengphehlep thla bang in an hnin derdo. Nunu zoh phah in dimte'n a sim:

"Nunu, tuihnu cun bazar ah thil zuar duh nawn hlah maw."

A ttong a theih tikah Nunu cu a hni. Nunui' hnih awn cu thip lo in kekkuai deuh awn an si. Nunui' aw ahcun retheihnak awn, tar le ttumttawl awn pawl an khat. A thaizing ah bazar ah Nunu a va hawl. Hlaral ihsin Nunui' aw thiang zet a hei thei.

"Hei...ka fanu phunsangtlawng ihsin zircawilu a ngah zo sokhaw. Ram dang ih ra on mi company ah hna a ttuan......"

Nunui' awkam sungih uanawknak awn a thei.

...............

Kum (28) ah fanu te a hring. Thla kim lo ih suak a fanu te cu zan tinte'n zanvar in a ttap. Nunu cun zan ah itthat lo in nau a awi. Zan khat cu mangmawrau ih a hung tthanghoi lai ah Nunui' nau awih hla awn a hun thei. Nunui' aw nem le dam zet a theih tikah mitmeng lo in daite'n a ngai.

Nau sep phah ih sak mi nau awih hla a si.

Kum (18) timi caan a kir sal vek a si. A thlum zet mi Nunui' nau awih hla sungah a pil. A mit ih hung luangliam mi mitthli pawl lenglam ih for lo ding in puan thawn a khuh. A netnak ahcun a hawl hmu sal......Cam khat lai ah a nun ihsin a hlo zo ti ih a rak ruat mi Nunu cu a hawl hmu sal.

Asinan lungawi aipuan caan cu a tawi tuk lawmam.

Cumi zing nazi pasarih ah Nunu in rawl a suan thluh ah, tho ding in a ra tthang. Nazi pariat ih hnattuan a feh lai ah Nunu cu a tunu te thawn an lek rero. Nazi (10) ah mansahlap in zato ah a thleng. Mina ihkhun par ih it Nunu cu a ttong thei nawn lo. Nunu cu a thisen a sang thutthi ih a zeng. Lungcimit ih zianghman thei nawn lo Nunui' biang vun kir siapsi cu a cul rero. A mitthli pawl cu Nunui' taksa par le hmai par ah cat lo in an luang. Nunui' aw theih a hiar tuk! Thip le ring zet kawk awn khal si sehla a thei duh thotho. Asinan Nunui' aw cu a thei ngah nawn lo.

A thaisun sundir ah lungcimit phah in a naupa le anih cu Nunu in daite'n mual a liam san.

Nunu a liam hnu thla khat a rei hnu ah Nunui' tanta mi thilri pawl a phorh khawm sal. Thingkuang pakhat sungah inn ih bun mi kedam khuah khat a hmu. Kedam cu rong eng dal deuh a si ih, tuhmul thawn tthit mi a si. Kedam hnuaidam cu Nunu in sah zet in a tuah sak. Tui hlan ah hivek kedam hi Nunu in a rak tuahsak dah. A nem in bun a nuam ko nan, feh tikah kedam tawdam a awn tuk ih, ni hnihkhat a bun hnu in a ret sal men.

Tu ahcun cumi kedam cu hruh in inn sung ah a tawivak rero. "Ttek, ttek, ttek..." ti ih awn mi kedam awn cu ring zet in a thei. Kedam awn pawl karlak ahcun a ttap lala. Cumi cu Nunu in a tanta mi awn netabik an si si.

Link bulhram: http://www. Duwenzhang.com/.../qingqingwenz.../20080806/14605.html

Lehnak: Nine Nine Sanay ih "Nunui' Aw."