Lunawinak Lawng Tlunpi Aw

Lunawinak Lawng Tlunpi Aw

Ka rualpi pakhat ih inn ka va len ttum ah a si. Cet-kailawn (elevator) ihsi ka suah vete’n an inn luhka ah signboard pakhat an tar mi ka hmu. Signboard par ahcun “Zangfahte’n inn sung na luh hlan ah thinharnak pawl cu hlit ta aw. Na tlun sal tikah lungawinak lawng tlunpi aw,” tiah a ngan aw.

Inn sungihk a vung luh tikah inntek tei’ nupa cu kom an nuam zet ih, an fanau pawl khal an nuncan a mawi ti ka hmu. An innsang cu lungrualnak le nunhlimnak thawn a khat.

Cumi signboard thuhla innteknu ka sut tikah hni siamsiam in inntekpa a zoh ih, “Nangmah sim aw,” a ti.

Inntekpa cun nemte’n, “Nangmah sim sawn aw Duat, nangmai’ tuah thar mi a si si,” tiah a rak sawn.

A netnak ahcun innteknu in aw nem te’n, “Vei khat cu inn ih ka ra tlun lai ahhin cet-kailawn sungih thlalang sungah a bangcau in a me hmerhmer mi hmuithlam pakhat ka va hmu. Thlalang sungah mitkil pahnih dai aw zik khop ih mithmai dur khiamkhiam in beidongza a si mi ka mit pawl ka vun hmuh tikah ka thin a phang.

“Cutikah keimah hman in ka ttih mi ka hmuihmel umtudan cu inn ih ka fa le pawl le ka pasal in an hmuh tikah ziangtin an um ding tiah ka vun ruat. Anmah hivek ih an um lai keimah in hmu sehla teh ziangtin ka um ding timi ka vun sut aw sal. Cumi rual in, rawl-ei cabuai ih nauhak pawl an thawmvang a reh dan pawl, ka pasal ih mithmai nel um lo pawl ka mitthlam ah an hung lang.

“Curuangah a thaisun ah mah le mah theihterawknak ah ti’n himi signboard hi ka ngan ih sangka tlun ah ka tar. Himi signboard kan tar hnu cun mah le mah theihterawknak in tuah lawng si lo in kan innsang ih minung hmuahhmuah khal theihterawknak a tuah ah a cang. A danglam hleice mi cu kanmai’ innsang lawng si lo in, an inn ih ra lengtu pawl khal thinnuam le lungawi in an um phah,” tiah in sim.

Innteknu cu innsangnu thluak virvat a si. Leitlun ah a ttha le a sia, lungawinak le thinharnak, vantthatnak le vanduainak pawl hi an kop aw ringring. Mi tthen cu a lenglam ih an remcan lo tinte’n, an lungawi lo tinte’n cui’ thinharnak pawl cu inn ah an rak tlunpi ttheu ih an fa le pawl parah simaw, nupi pasal parah simaw an burh ttheu. Taktak ahcun camkhat te ih thlengawknak a um mi in a bang aw lo mi thlengawknak pakhat a pe a si.

“Zangfahte’n inn sung na luh hlan ah thinharnak pawl cu hlit ta aw. Na tlun sal tikah lungawinak lawng tlunpi aw.”

Kan ruahnak a thlengawk rual in kan lungput khal a thleng aw ve. Kan lungput a thlengawk rual in kan umtudan a thelnga w. Kan umtudan a thlengawk rual in kan nun a thleng aw. Hualvan thlengawkter hnak in mah le mah thlengawkter sawn ding a si. Mai’ nun ih um mi nungcang ttha lo kan thleng rual in lungawinak pawl cu an ra thleng ve mai ding a si.

Ngantu: Yang Zhigang
Lehnak: Nine Nine Sanay ih leh mi leh sawng mi a si.