Tisartam Pakhat ih Mitthli

Tisartam Pakhat ih Mitthli

Ka ttap dah lo tiah in rel ttheu. Ka mitthli pawl khal a deu (lem) an si an ti. Thlangta America khawmualpi ih hramlak tupi sung hmun pakhat ah ka ceng. Kei cu thazang cahnak famkim a nei mi tisartam ka si ual, ziangah ka ttap ding?

Khawthim lak ihsin thinthir le lungphang in ka hung tthangharh ttheu. Zan tinte’n ka mang sung ihsin thinphang in ka hung tthangharh. Ka zanmang sung ahcun thazang ka rak nei lo. Ka mit khal an rong a dal. Ka kutke pawl an cangvai thei lo.

Ka nu in i hrin hnu rei lo te ah ka nu thawn tiva kap ciarbek lak ah bokvak in kan vak. Cumi lai cu zingpit a si ti ttha zet in ka cing ringirng lai. Ni tleuzung ruangah a tleu zukzo mi tiva tidai dai zet pawl cu ka taksa par ihsin an luang rero. Kiangkap awn-ai reh sungah ka ciah pil aw.

Kei cu ka nu ih fa nautabik ka si. Ka nu cun rawl in pe, hmun tinkim ah in hruai ttheu ko nan a hni-no (smile) dah lo. Vei hnihkhat ahcun ka nui’ mit ah nunnemnak hmuithlam pawl an lang ttheu. Cumi pawl cun ka nui’ mit pawl cu an mawiter cuang. Asinan cumi nunnemnak hmuithlam pawl cu cam khat te ah an hlo ih, “Hi leitlun ah thazang nei maltu ih sa cu thazang cak neitu in an nei timi ttongfim pakhat a um. Thazang cakcak, nunsuahnak timi dan pakhat a um,” tiah ka nu cun in sim.

Curuangah thazang ttawnttai neitu si ding a si lo.

Cumi zing cu do kan tuar. Tiva kelnak zawn kan thlen tikah ka nu in hmai ih feh peh ding in i fial. Ka nui’ ttong ngai in ka feh peh. Lung zunhriam pawl in ka pum an sun ih a thip. Ka feh paih nawn lo ruangah ka ding ih ka nu ka hei zoh. Ka nu cu dunglam ah her in tlan a tum ti ka hei hmu. Ka nui’ um dan cu ka theithiam lo. Dunglam ah her aw in ka nu dawi man sal ka vun tum.

Vei le khat ah ka khel ihsin thlir ka tuar. Haa hriam zetzet pawl cu ka vun hak tuk hrih lo sungah an rung lut. Ka tal rero. Ka mei thawn tidai vaw phah in ka tal. Ka nu in i rak zoh kir sal. Ka nui’ mit sung ahcun thutluknak hnget zet hmuithlam pawl an lang. Ka nui’ in sim dah mi ttongkam pakhat ka vun mangsuak thutthi. Kannih tisartam innsang ahcun mah nunsuah theinak dingah mai’ fanau pawl khal tansan thei a ttul timi a si.

Ka mit ihsin mitthli an hung putsuak.

Ka nu.....ka nu....

Himi hramlak sungah thazang cakvak a neitu dang pakhat cu tlavang pawl an si. An cangvaih dan cu a nem ko nan an haa a hriam. Zingpit ah rawl an hawl ttheu. Vei hnihkhat ahcun tisartam fate pakhat khal an hrangah thaithawh thaw zet a si.

In kaitu tlavang cu tlavang pitu a si. Ka ttih lo. Ka nu in i tansan in dunglam ih i kirsan hnu cun zianghman ka ttih nawn lo. Tlavang fate pawl hmai ih i vun hlon tikah tlavang pitu cu ngainatnak ka vun nei. Ka nu khal in rawl in pe dah ttheu. Asinan hivek ih duat le lainatnak a um dah lo.

Tlavang fate pawl cu a lei thawn liak phah in thaithawh ei ding ah tlavang pitu cun nem zet in a hruai hai. Tlavang fate pawl cu ka umnak lam ah an ra. A cal ah ni vek a si mi kil riat nei thil lem (tlavang cal de) a um mi tlavang fate pakhat cu ka kiang ah ra in i ra zoh. Ka thinlungte’n, “I ei aw, i ei aw. Na van a ttha tuk. Nang cu a lo duhdawttu nu na nei. Kei cu zianghman ka nei lo. Ka thih a ttha sawn,” tiah ka ruat.

Tlavang fate cun i zoh thluh in a nu a sut.

“A nauhak tuk lai......a Nunu teh?” ti phah in tlavang fate cun tidai sungah i hlon thutthi. Lungawi zet ih a nunu pom le cul phah in tidai ih i fen lai cu in run cuan rero.

Ka nui’ hnenah ka tlung lo. Ti luang thlun in hmun dang pakhat ah ka feh. Zamrang zet in ka hung tthanglian. Keimahte’n rawl ka hawl. Keimahte’n ka humhim aw. Asinan zanmang siava ka man leuhleuh ttheu. Ka zanmang sia hmuahhmuah cu ka nu in i tansan zing kha an si. Zanmang ih thoknak cu a mawi zet. Cumi hnu in nuamtete’n a siava vivo ih hriamhma khal an bese vivo. Zanmang sia ruangih ka hung tthangharh tinte’n keimah le keimah ka sut aw ttheu. Ziangruangah si pei tisartam ka rak si kherkher?

Ka hung pitling. Ka vun pawl an khohkhah ih ka mit khal an fimvar thlang. Ka sualral in ka hamkha thlang. Himi tiva luannak hmun ah siangpahrang ka hung si. Fanau pawl khal ka nei. Nu ttha pakhat si thei ding in ka zuam. Ka fate pawl cu ka duhdawt, tthate’n ka kilkhawi. Harsatnak ttihnung tong khal sehla keimai’ luatsuahnak ding ruat in ka tansan hai lo ding.

Tisartam innsang ah nu tthatthum pakhat a um thu hramlak tupi sung ahcun a thang hiamhiam. Ka fate pawl khal in cumi ruangah in suang zet ih, an lung a awi ngaingai.

Zan khat cu zanmang sia ruangih ka hung tthangharh lai ah tleuzung sen pakhat ka hmu. Ka fa le pawl ka tthang hai ih an umnak ihsin ka tthawnter. Hitawk hmun hi a rei hlan ah a siatral thlang ding. Kilometer 20 sungih thingram pawl cu siatsuah an tuar. Kilometer 200 lenglam ih hramlak cu thlaicinnak hmun ah an cang.

Reipi kan feh hnu in a hlan ih ka rak umnak hmun ah kan va thleng. Hitawk hmun khal ah rawl a har zet thlang. Ramsa tampi cu hitawk hnak ih thuk sawn hramlak tupi ah an tthawn zo. Ramsa nungdam lai kan hmuhlonak ni hnih a rei thlang.

Zing khat cu ka fa nautabik hruai in rawl kan va hawl. Vanduai thlak zet in ka mithmuh rori ah tlavang pakhat ih do a tuar. Hmailam ah zamrangtei’ va tlan in ka fa ih nun cu va runsuah ka tum.

Ka va thleng ih ka mei thawn tlavang cu ka vuak zik zawng ah a cal ih kil riat nei ni lem ka vun hmu. Cumi tlavang cu a ttawl zet. A pum khal a thep thluh. Rawl a ei ngahlonak a rei zet a bang. Rawl ei ding a ngah lo ahcun a thi thei ding tiah ka ruat. Kei cun fate tampi ka nei. Himi tlavang rak um lo sehla cun kei khal in himi innsang hi ka nei lo ding.

Reipi tiang awloksong anhai in ka um.

A netnak ahcun dunglam ah ka kir sal. Hmun kelnak zawn pakhat ka thlen tikah dunglam ka hei zoh sal. Ka mit an rau thluh. Ka hmai ih um mi zianghman fiangte’n ka hmu thei nawn lo. Ka mit sungah mitthli an khah in an khat thluh!

Link: http://zhidao.baidu.com/question/94546265.html
Lehnak: Nine Nine Sanay ih leh mi leh sawng mi a si.