Na Sunmang Thlun aw

Na Sunmang Thlun aw

San Ysidro ah rang vulhnak hmuan pakhat a neitu Monty Roberts timi rualpi pakhat ka nei. Ka rualpa cun dinhmun ttihnung ih thleng mi mino pawl somdawlnak ding sumpai hawlsuahnak pawl kan tuah tikah hrangah a inn in hmanter.

Cutawk ih ka um netabik ttum ah ka rualpa cun mipi pawl hnenah hmeltheihnak i tuah phah in hitin a sim: "Ziangruangah ka inn hi Jack ka hmanter ti lo simtheih ka duh. Ka rel ding mi thuanthu cu ranginn pakhat hnu pakhat, rang tlan zuamawknak hmun khat hnu hmun khat, hmuan pakhat hnu pakhat, le rannung vulhnak hmun pakhat hnu pakhat ah feh in, rang pawl a zirhtu umnak hnget nei lo pacang pakhat ih fapa thawn a pehpar aw.  Cuvek pa ih fa a si ruangah Sang Tlawng a kai mi khal a buai phah. Sang Tlawng ih senior a si lai ah, zirhtu in a hung tthanlen tikah ziangvek mi si a duh timi thuhla a nganter.

Cumi zan ahcun ni khatkhat ah rang vulhnak hmuan pakhat neih a tumtah thu cahnah pasarih khat in a ngan. A sunmang cu cipciar zet in a ngan. Ekah za hnih a kau mi rang vulhnak hmuan khal zuk thawn a suai ih, inn pawl umnak ding hmun pawl, ranginn umnak ding hmun pawl, le rang tlan zuamawknak ding hmun tiang in a tarlang.  Cu thluh in kil li pii 4,000 a kau mi inn pakhat cu ekah za hnih a kau mi rang vulhnak hmuan sungah cipciarte'n a suai lala.

A ruahmannak ahcun a thinlung a pe thuk zet. A thaisun ah a ca cu zirhtu a pe. Ni hnih a rei hnu ah a cahnah cu a ngah sal. Cahmai hmaisabik ahcun tumpi'n 'F' timi a ngan aw ih, "Tlawng ttum ah i ra tong aw," timi khal a ngan aw.

Sunmang neitu nauhakpa cun tlawng ttum ah zirhtu a va tong ih, "Ziangruangah F ka ngah?" tiah a sut. 

Zirhtu cun, "Nang vek nauhakte hrang ahcun sunmang cang thei lo a si. Paisa na nei lo. Innsang tawivak vivo in na ra. Thazunghram (resources) zianghman na nei lo. Rang vulhnak hmuan neih ding cun paisa tampi a ttul. Leiram na nei a ttul. Fa a nei cia mi rang pawl na cawm a ttul ih, lehhnu ah ci zaih ding ih ret mi rangcang le rangpi pawl hrangah paisa tampi na kuan a ttul ding. Cumi na tuahsuaknak ding lamzin a um lo," a ti.  Cu thluh in zirhtu cun, "Na ca ahhin a tak ih cang thei deuh mi tumtahnak thuhla na ngan sal thei asile, camibuai on ding le on lo ding thu ka lo ngaihtuahsak ding," tiah a sim bet.

Nauhakpa cu a tlung ih reipi a ruat. Nasate'n a ruat rero. A pai' hnenah ziang a tuah ding ti a sut. A pa cun, "Zoh hnik, ka fapa, himi thuhla ahcun nangmahte'n thuhla na bawhcah a ttul. Asinan, himi thil hi, na hrangih thutluknak thupi zet a si in ka ruat," tiah a sawn.

Cumi thuhla zarh khat sung a ruat hnu, a netnak ahcun, nauhakpa cu a cahnah kel thotho thawn a kir sal. Zianghman a thleng lo. Zirhtui' hnenah, "Nang in F kha co awla, kei in ka sunmang ka ttuan ding," a va ti.

Cu thluh ah Monty cu mipi lam ah a hoi ih, "Himi thuanthu ka lo simnak san cu tu ahhin ekah za hnih a kau mi ka rang vulhnak hmuan laili ih kil li pii 4,000 a kau mi ka inn sungih nan to ruangah a si. Cui cahnah cu a tlang khul ttha in tappi tlun ah ka ret lai," tiah a sim. Cu thluh ah, " Himi thuanthu ih a tthatbiknak zawn cu himi a si. Tthal hnih liam zo ahkhan cui' tlawng zirhtu cun ka rang vulhnak hmuan ah nauhak pawl zarh khat sung camp a ra neihpi.  A tlun zawng ah, "Zoh hni, Monty, tu ahcun ka lo sim thei thlang. Na zirhtu ka si lai ah, sunmang ruksaktu ci khat ka rak si. Khami kum pawl ahkhan nauhak tampi ih sunmang ka rak ruksak. Vantthat thlak zet in, nang cun na sunmang beidong san lo ding ih talsuah theinak daihcang na rak nei," i ti.

Na sunmang pawl kha zo ih ruksak hman siang aw hlah. Ziang a va si khal ah, na thinlung kha thlun aw.

Jack Canfield – "Follow Your Dream" from Chicken Soup for the Soul