Nazi pawl in An Thawnginn pawl sungih An Tuah mi Thil Rapthlak Pakua

Nazi pawl in An Thawnginn pawl sungih An Tuah mi Thil Rapthlak Pakua

9. Sonderkommanden

'Sonderkommanden' timi cu 'mithi ruak cingfeltu' tinak a si. Mithi ruak cingfel ti tikah mithi pawl ih sui haa thlongsak, mithi urnak vutcam thenfai tivek khal an tel. Sonderkommanden timi pawl hi Nazi pawl si lo in, thawngtla pawl thotho an si.

Sonderkommanden pawl ih vansiatnak bik cu nun sau theinak canvo an neih lo mi hi a si. Ziangahtile annih hi ' Geheimnisträger ' (thuthup-kiltu pawl) tiah kawh an si ih, reipi an damter ahcun thil ttihnung an si tiah Nazi pawl in an ruat. Ralrin pekcianak khal um cuang lo in thla malte sungah thah an tuar ih midang thawn thleng an si ringring. Sonderkommando ttuantu hmaisabik ih hnattuan cu an thleng mi minung ih ruak cinfel a si can khal a tampi.

8. Tlangleng pawl

Minung thawng tampi thawnginn ih kuatlut hi thil olsam a si lo. Minung sanphung ih mipi a hlawm a hlawm ih kuatawknak turu bik le khungkhai bik a si. Tlangleng pindan pakhat ah minung 50 cu to nuam tawk a si ko nan, minung 200 rori an to ttheu mi cu thil danglam zet a si.

Tlangleng totu pawl cu rawl, tidai, an khualtlawnnak hrangih ttul mi humhimnak tivek zianghman pek an si lo. Curuangah an feh sung lawng ih thih khal hi thil pangai ah a cang. Corfu ihsin tlangleng a fehsuak ih, thawnginn pakhat a thlen tikah Nazi pawl cun sangka an ong ih a thi cia paziat an um tiah an hawl ttheu. An khualtlawn sung hi ni 18 a rei.

7. Tlangleng (Thotho)

Um hrih hnik! A tlun ih thuhla riahsiatza siar zo tu hrangah ziangvek thuhla rel a ttul nawn ding? A si ko. Nazi pawl cun mi thahnak tlangleng pawl hi a tlun ihta hnakih thil siava sinsin tuahnak ah an hmang thei thotho.

Minung thawn tampi an thi tengteng ding ti theih deuhthaw dinhmun ih kuat hi thil siava a si famkim thawkhat zo ko. Asinan Nazi pawl cun cuvek vantthatnak a cotu mipi pawl cu cawhkuanter dan ding an thiam lai (Satan lungawiternak taktak a si ding ti cu na theih kha). Thahawknak thawnginn ih Jew miphun pawl an kuat tikah, Jew pawl hnen ihsin tlangleng man kimcang an pekter. Asinan Nazi pawl hi mikei siava famkim cu an si hran lo, ziangahtile nauhak kum li hnuai cu tlangleng man an awlh.

6. Awnmawi (Music)

Nazi pawl hi midang hrem nuam ti luarkai an si. Ziangahtile minung pawl an thinlunglam hremnak an tuah tikah, awnmawi tiang hman hi mi hremnak hriamhrei ah an hmang thiam. Thawngtla pawl thawnginn sungih an lut rual ah thlung-aw-kim hlarem (orchestra), a tumtu le saktu cu thawngtla dang pawl an si tlangpi, an suah. Cui thlung-aw-kim thlarem cu thawngtla pawl in an thihnak hmun an pan phah ah an rak sak thlun ve a ttul. An awnmawi cu thawngtla pawl gas khu ih an mut that lai khal ah an suah peh rero. Asinan thlung-aw-kim hlarem ring zet khal cun minung pawl ih aihram kiauraak awn cu a khuh theih hrot lo.

5. Minung Sahpian (Human Soap)

Nazi pawl hin Jew pawl cu Holocaust ih thi hmaisa pawl ih thau thawi tuah mi sahpian an hmanter timi hi vei tampi rel a si ttheu. Himi hi a si taktak timi hmuhsaknak cu a um hrih lo nan, Nazi pawl cun Jew pawl kha a si taktak tiah an sim ringring.

Nazi pawl hin minung taksa ihsin sahpian hi an tuah taktak. Asinan anmah cun an hmang lo lawlaw deuhthaw a si.

4. Rilrawnnak le Thawnginn Thim

Thawnginn sungih thitu pawl hi thih lohliternak timi lainatnak cotu an um lo. A tthenkhat phei cu pindan sungah an kharhkhum ih rawl le tidai pe lo in an thih tiang an umter. A cancan ahcun himi hi hremnak kalhmang ah hman a si ih, a cancan ahcun thuhla darhkauternak hrangah hman an si. Curuangah Auschwitz thawnginn ih Block 13 timi cu thihnak timi thawn bang aw tluk ah a cang. Ziangahtile rilrawn ttamhal ruangih thil lo pawl khal kalhmang dang in an that thotho.

Asinan cu pawl hnak ih siava sawn cu "pindan thim pawl" an si. Pindan thim pawl ahcun tleu a um lo ih an pit tuk fawn ruangah, a sung ih umtu cun a umsun oxygen a hawp thluh in thawsam ih thih ding lawng a tang.  

3. Rawl Umlonak

Thawngtla tampi ih rawl cu ara har (sawdust) ih tuah mi sang, rang dam lo sa ih tuah mi vok ril (sausage), le hrampi ih tuah mi tisa (thingpi) pawl an si. Taksa hrangih ttul mi vitamin an ngah lo tuk ruangah thawngtla tampi cun mithi pawl ih rawl tla an ru. Rilrawng luarkai tuk pawl lephei cun hnawm lakih rawl uih pawl tiang in an hawl ih an ei.

2. Tidai Umlonak

Nazi pawl hin thawnginn tampi ih thawngtla pawl cu thil zohsinh-nak phunphun ah an hmang. Cumi lakih pakhat cu tipithuanthum tidai in ruangih a thleng thei mi siatralnak ziang a si, timi zohfelnak a si. Dr. Hans Eppinger cun mi vakvai thawngtla 90 hrawng cu, ziang a thleng ding timi theih duh men ah, tipithuanthum tidai hlir a inter. A rahsuah cu tidai dat tlaksamnak bese zet a si. Tidai dat an tlaksamnak a luar tuk lawmam ruangah zial ih for mi tidai for khat in ngah ding in zial an liak fai paih ti a si.

1. Zohsinh-nak pawl (Experiments)

Nazi pawl in minung pawl parih an tuah mi thil siava pawl hi a zate cun kan thei thluh thei lo ding. Ziangahtile hminsinnak tampi cu siatsuah an tuar. Asinan minung hmangih thil zohsinh-nak tuah hi thawnginn ah thil zaran a si lawng men si lo in, tuah ding khal in tha an pe. Thawngtla pawl cu taksa ih a hlum dat a cem thluh tikah ziang a cang timi theih duh ah vur lakah an phim pil, chemical le tur pawl ziangtluk an tha a cak ti theih duh ah an dawt, an ci an thahsak, an nung cing in an taksa peng tthen an la, lungmit sii asilole hit sii tel lo in an zai.

Himi pawl hman hin a pawnlang lawng an pholang lai. 

Hminsin: Karl Smallwood in Listvere website ih a ngan mi '9 Sinister Things Nazis Did To Inmates At Concentration Camps' leh mi a si.

Link bulhram: http://listverse.com/2013/07/04/10-sinister-things-nazis-did-to-inmates-at-concentration-camps/