Santa Bawmtu

Santa Bawmtu

Ka pipi in Christmas thuhla ziangkim in i rak zirh thluh. Cumi lai ahcun nauhak te ka si. Ka unu in ka thin tthawng zet ttongkam a ttong ni ih, pipi hnenah feh ding in thirleng thawn khaw sung ka paltlangh lai kha ka mang ringring.  Ka unu cun, "Santa Claus a um lo, mi aa pawl hman in a um lo ti an thei," a ti.

Pipi cu ttongkam nei tam ciamco a si lo. Cumi ni ih a hnen ka fehnak san cu ka lam ah a ttang ding ti ka theih ruangah a si. Pipi cun thudik lawng a rel ringring ti ka thei. Cui thudik cu Pipi ih sabit rep telh mi sang hminthang thawi' vun hmeh lephei cun dolh a olsam nasa cuang ringring ti khal ka thei fawn.

Pipi cu inn ah a rak um ih, a sang pawl khal an hlum thurtho lai. Sang kawh rero phah in, thuhla ziangkim ka sim thluh. Pipi cun ka ttong cu tthate'n a ngai.

Cu ttheh ah Pipi cun a hnar ih thli suah vukvi phah in, "Santa a um lo an ti maw! Thuhlolak! Cuvek cu zum aw hlah. Hivek thuzilzuang hi kum tampi sung a rak um zo ih, i buaibaiter, ka lung a hnokter men. Na kortlunthuah hruh awla, a leng ah kan feh pei," a ti.

"Feh ding maw? Khuitawk ah maw, Pipi?" tiah ka sut. Sang pahnihnak hman ka ei thluh hrih lo.

Kan fehnak hmun cu Kerby's General Store a rak si. Himi dawr hi khawpi sungih thilri kimcang deuh a um mi dawr umsun a si.  Dawr sangka ih kan lut rero lai ah Pipi in dollar fang hra i pe. Cumi san lai hrang ahcun paisa tam tham a si ve.

"Himi paisa hi la awla, a tlasam mi mi pakhat hrangah a tlaksam mi pakhatkhat leih aw. Mawttaw sung ihsin ka rak lo hngak ding," i ti. Cu thluh cun dawr ihsin a suak cih.

Cumi lai ahcun kum riat lawng ka si. Ka nu thawn dawr ah thil kan lei ttheu ko nan, keimah lawng ih thil lei thluh tivek cu a um dah hrih lo. Dawr cu tum liailiai le mipi khat hmerhmer vek in ka thei. Christmas hrangih thil lei ttheh lohli ding in minung pawl cu an buai celcel. Dollar fang hra cu keng phah in, ziang ka lei ding ih, zo hrangah a si ding, timi ka ruat buai lawk. Ka theih mi minung hmuahhmuah ka ruat thluh. Kan innsang, ka rualpi pawl, ka venghnen pawl, tlawnginn ih nauhak pawl, kan kawhhran ih khawm ttheu pawl tivek tiang in ka ruat.

Ka theih mi minung an cem thluh rual ah Bobbie Decker ka vun mangsuak thutthi. Bobbie cu sam hnok le thaw rim se deuh nauhak a si ih, kan tlawng kainak Mrs. Pollock Tlawng ih phun hnih class ah ka dung ciah ih totu a si. Bobbie cun kortlunthuah a nei lo. Thlatang ah ca zir cawlh can ih cawl hahdam ding in a suahvah dah lo ruangah, kortlunthuah a neih lo thu ka theih mi a si. A nu in zirhtu hnenah awmnat a neih thu ca a ngan ringring. Asinan Bobbie in awmnat a neih lo thu kan zate'n kan thei ih, kortlunthuah a neih lo thu khal kan thei thluh.

Thinlung sa hiamhiam in dollar fang hra cu ka mehtok thawn ka khih. Bobbie hrangah kortlunthuah ka lei ding. Lukhum nei cih pat kor hlum sen pakhat kiang ah ka ding ringring lawk. A hlum hmel zet ih, a duh khal a duh ko ding. A man tar mi ka hmu lo. Asinan dollar fang hra thawn thil pakhatkhat ka lei tengteng a ttul fawn. Curuangah kortlunthuah cu ka la ih dollar fang hra thawn counter par ah ret in, counter dung ih nunau hnenah ka nor phei.

Nunau cun kortlunthuah, paisa le keimah cu in zoh kual ta. "Mi pakhatkhat hrangih Christmas laksawng maw?" tiah duat zet in i sut. "Aw e," tiah ningzak zet in ka sawn. "Bobbie hrangah si. Bobbie cu ka tlawngkaipi a si. Kortlunthuah a nei lo i."

Nunau fel cu i zoh phah in a hni-no. Paisa khirh kir mi i nei lo. Asinan dip sungah kortlunthuah cu a san ih, Lungawiza Christmas tiah duhsaknak i hlan.

Cumi siimlam ah pipi in ka tuah ttul mi i tuah bawm. Kortlunthuah cu Christmas cahnah le hri-mawi thawn kan tuam ih, a par ah "Bobbie hrangah, Santa Claus hnen ihsin" timi kan ngan. Pipi cun Santa cu a thupte ih thil ti a duh ringring thu i sim.

Cu thluh ah Bobbie tei' inn lam ah mawttaw thawn i fehpi. Kan feh phah ahcun tu ihsin Santa bawmtu lakih pakhat ka si kumkhua lanta thlang thu i sim. Pipi in mawttaw cu Bobbie tei' inn hmai lamzin ah a cawlter. Cu thluh ah thawmvang nei lo te'n kan feh ih, an inn hmailam ih hrampi bur sungah kan va relh. 

Pipi cun a kiu in dimte'n i hngong ih, "Khahle, Santa Claus, feh thlang aw," tiah dimte'n i sim.

Napi'n ka thaw ka hip ta hnu ah sangka kiangah ka va tlan. Sangka hram ah thilfun cu ka va thlak ih, mi kawhnak dar vei hnih ka va hmeh hnu ah, Pipi ih umnak hrampi bur lam ah zamrangte'n ka tlan kir sal. Thaw hman thaw ngam hrot lo in sangka a ra onawk ding can kan rak hngak. A netnak ahcun sangka cu a ong aw ih Bobbie a ra suak. Hnuailam a zoh hnu ah, kiangkap a zoh kual sal lala. Cu thluh in laksawng cu a la ih, inn sung ah lut in sangka a khar.

Bobbie tei' hrampi bur sungah, pipi thawn thin thir zet ih kan rak um lai can ih hmual cu kum sawmli timi can khal in a nepter thei cuang lo. Khami zan ahkhan, Santa Claus a um lo timi thuzilzuang vakvai pawl kha cu Pipi ih rel mi vek ciah an si ti ka thei fiang. Cuvek thuzilzuang cu "Thuhlolak" taktak an si.

Santa cu a nungdam ih a damcak lai...Cule, kannih hi amah bawmtu kan si!

Bulhram: On Santa's Team -  www.wanttoknow.info