Leitlun ih Thuanthu Sau Bik

African Thuanthu Roling (12):

Leitlun ih Thuanthu Sau Bik

Leitlun ih thuanthu sau bik na thei dah maw?

Vei khat lai ahhin thuanthu ngai paih zet Lal pakhat a rak um. Thuanthu tampi khal a ngai dah zo. Curuangah a cancan ahcun thuanthu reltu a cawlhter ih amah in a cem tiang a rel peh mai ttheu. Ni khat cu thuanthu simtu ttha hawl ding in ram-i-kip ah a siahhlawh pawl a thlah hai.

"Leitlun ih thuanthu sau bik sim theitu le a hniter theitu cu kan Lalpa in laksawng tampi a pe ding."

Lamzin tluan ah siahhlawh pawl cu an au vivo. Lalpai' hnenah mi tampi an ra ih thuanthu sau zetzet an ra sim hai. Lalpa cu hnihter an tum. Asinan zohman in an hniter thei lo. Lalpa cun, "Leitlun ih thuanthu sau bik a si lo ih, hnihsuak khal a um lo," a ti thluh hai.

Vei khat cu mipa nauhak pakhat a ra ih, "Maw, ka Lalpa, leitlun ih thuanthu sau bik lo sim theinak le lo hnihter theinak can ttha i pe hram aw," a ra ti.

Lalpa cun, "A ttha e. To awla na thuanthu cu rel thok hnik!" a ti. Nauhakpa cun a rel thok.

"Hlan laipi ahhin Mogambo (Maw-kam-bu) timi pa a rak um. Cu pa cu rawl a pham tuk lawmam ih zohman in a khawh tiang in rawl an pe thei lo. Cumi ram ih Lalpa in Mogambo ih thu a theih tikah, 'Ka hnenah rak hruai uh. Khop neknek in rawl ka rak pe ding,' a ti. A ram sung mipi pawl hnenah cencerh bel, sa le thingthei thawng za tampi rak keng ding in a fial hai. Curuangah kala-uk za tampi thawn bel tamngaipi an rak phur hai. Kala-uk pawl cu Lalpai' inn hmai ah an cawl. Mogambo ih zanriah ei lai zoh ding in minung tampi an ra suak khawm fawn.

Cu thluh ah Mogambo a ra thleng. Khuang tumtu pawl in khuang an tum thok. Awnmawi thiam pawl in awnmawi an tum. Mipi in hla an sak. Mogambo cun Lalpa cu a lu kun in upatnak a pe ta. Cu thluh in mipi hnenah, 'Tu ahcun i rak zoh uh! I zoh uh! I zoh uh!' a ti hai. Cu thluh ah cencerh cu a ei thok. A ei rero. A ei rero. A ei rero. A ei rero. A ei rero.

"Cu thluh ah ziangtin? A ei rero. A ei rero. A ei thluh ah ziangtin?" tiah Lalpa cun a sut.
Nauhakpa cun, "Maw, ka Lalpa, tu cu bel khat lawng a ei lai ih bel thawng tampi a tang lai! Malte hngak hrih aw. A ei rero. A ei rero. A ei rero," a ti.

Siimlam a rung thleng. Nauhakpa cun a thuanthu cu a peh rero.

"A ei rero. A ei rero. A ei rero."

A netnak ahcun Lalpa cun a thuanthu cu thaizing tiang cawl hrih ding in a sim. A thaizing ah Lalpa cun nauhakpa cu a thuanthu rel peh ding in a fial.

"Na Mogambo thuhla cu tu ah teh ziangmi in sim thei?" tiah a sut.

"Maw, ka Lalpa, a ei lawng a ei lo. A in khal a in phah thotho. A in ta hnu ah a ei rero, a ei rero, a ei rero."

Nauhakpa cun a rel ring deuhdeuh: "A ei rero ih, a rei rero ih, a ei rero."

Lalpa cun nauhakpa cu a zoh ih a hni.

"Aw, ka fapa, na thuanthu cu leitlun ih thuanthu sau bik a si ngai! Tu cu cawl thlang aw!"

Cutin thuanthu reltu nauhakpa cun a thuanthu rel cu a cawl ih lalpa in laksawng tampi a pe. Cu thluh ah kala-uk parah a kai ih ttong phah rero in a feh liam.

A ttong mi cu: "A ei rero ih, a ei rero ih, a ei rero ih....."

Hram: The Longest Story in the World – African Folktale.