Uico Dum Pahnih Hruaitu Putar

Arabian Zan 1001:

(4) Uico Dum Pahnih Hruaitu Putar

Can reipi liam zo ahkhan innsang aipuang le neinung kan rak si. Mipa unau thum kan um ih kan duhdawt aw zet. Can a liam vivo ih ka pa cu bese zet in a nat hnu ah vancungram ah in feh san. Ka pa in kan unau thum in sui dinar thawng khat cio in pe (Dinar = Arab paisa hmin). Kan unau thum in mi fimvar kan si ruangah kan tangka cu dawr phunphun tuah in kan pungzaiter ih sumdawng neinung ah kan hung cang.

Ni khat ah, kan upabik cun a sumtuahnak cu siangpahrangram dangdang tiang ih kauter ding in ruahnak a ngah. Cumi tuahsuak ding in ram dangdang ih va tlawn a tum. Sumpai tam sinsin thawi' sum a tuah theinak ding ah a dawr hmuahhmuah, a nuamcennak thilri hmuahhmuah le a inn tiang in a zuar thluh. A sumpai in thilri phunphun a lei hnu ah sumdawnnak tangphawlong mawi zet thawn khual a tlawng thok. Kum khat zikte a kim tiang in a thuhla zianghman kan thei sal nawn lo.

Siimlam vei khat cu ka dawr ah to in keimahte zahphek thawi' ka zapawk rero lai ah kutdawh pakhat in i ra pan. Kutdawhpa cu a ttonttaih hmel zet. A hnipuan ttet siapsiap pawl khal in a taksa an khuh ceuceu. Ka kor zalte sungih ngun tangka fang khat ka phorh ih kutdawh cu ka pe. Cumi a hmuh tikah zangfakza kutdawhpa cu a mitthli an rung luang thluahthlo.

Thinna zet ih ttap phah in, "Aw! Ziangvek hualvan lawmam so! A unau in a unau lala cu zangfahnak thinlung thawn mi rethei anhai bomnak paisa a pe a si hi," tiah a ttong.

Cutikah kutdawhpa cu ka vun zoh sal. Kan upabik a si ti ka vun theithiam vukvi. Ka u cu ka hnem ih inn ah ka hruai tlung. Ti hlum thawn ka bualawkter ih suncaw thaw zet kan ei tlang hnu ah, ka u cun a thuanthu lungngaiza i ruah. Thap ngam zet ih a sumtuahnak pawl ihsin ziang pipa ngai a hlep thei lo. A sunralnak nasa tuk ruangah rethei anhai in a um ih inn hman harsa zet in a ra tlung thei fangfang. Cumi can ahcun sui dinar thawng hnih ka rak hawlsuah thei zo ruangah ka u cu sui dinar thawng khat ka pe. Sumtuahnak thar thok sal ding khal in tha ka pe.
Thla mallai a liam hnu ah ka u pahnihnak khal in a sumtuahnak kauter sinsin ding in ram dangdang ih feh a tum. Kan upabik ih thuhla sim phah in ka dawn rero nan, tipithuanthum khatlam ral ih sumdawn cu a tum hnget thotho. A rei hlan ah ram dang pantu ding nelrawn khualtlawng bur khat thawn an pok. Ka u pahnihnak khal thilri tampi le ruahsannak tampi thawn a feh ve. Kum khat sung cu a sumtuahnak thar thuhla ziang thuthang hman ka thei lo. Kum khat a liam ih, zing ni thiang vei khat cu ka sangka hram ah a ra thleng. Anih khal kan upabik ih ra thlendan dinhmun thawn a bang aw zet fawn. A khualtlawng bur cu suamhmang pawl in an rak do ih, ziangkim in a sunral thluh thu in sim.

Ka u pahnihnak khal cu sui dinar thawng khat ka cawih lala. Sum a tuah thok sal thei ding ruangah a lung khal a awi. A rei hlan ah ka u le pahnih cu an sumtuahnak ah an tluang ih an neinung sal. Lungawi aipuangte'n kan um tlang sal lala.

Zing ni thiang vei khat cu ka u le pahnih an ra ih, "Naupa, kan sumtuahnak kauter ding in khual lam hla ah kan pathum ih kan tlawn a ttul. Sum kan dawng tlang ding ih neihsiah hlawnthil kan khawlkhawm ding," in ra ti.

Ka u le an pahnih in thapngamnak thawn sumtuah ih khual an tlawn lai ah sumpai nei lo in an kir sal ti ka rak hmuh zo ruangah an thu cu ka el. Asinan an thu ah an ttang hnget eu-eu. Kum nga zikte an thu ka el hnu ah, an thu ka thlun. A ttul mi pawl kan tawlrel hnu ah, kan pathum in zuar ding mi thilri tam zet kan lei. Ka u le pahnih cun an sumpai hmuahhmuah in thilri leinak ah an hmang thluh. Kei cu cumi can ah sui dinar thawng ruk ka nei zo. Curuangah ka u le pahnih cu thawng khat veve ka pe bet hai. Keimai hman ding ah thawng khat ka ret fawn. Cu thluh cun ka inn sung hmun him ah khur ka lai ih ka neih lai mi sui dinar thawng thum cu ka phum. Cuihnu ah kan thilri cu tangphawlong tumpi ah kan san ih kan poksuak.

Kan fehsuah hnu thla hnih zikte ah long cawlhhmun pakhat kan thleng. Cutawk ah sumdawng in sumpai tampi kan ngah. Tlung ding ih kan tim kan tuah ngah tikah, nunau mawi zet, asinan rethei zet, pakhat in i ra pan. Ka hmai ah a lu a kun ih ka kut a hnam. Cu thluh in, "Ka pu, zangfahte'n na nupi ih i cohlang ding in lainatnak nei hram aw. Khuitawk hman ah zohkhentu ding le umnak ding hmun ka nei lo," a ti.

Ka mang a bang zet. Kei cun, "Lainat mi nunau, a theih hman ka lo thei lo. Ka theih dah lo mi pakhat nupi ih tthi ding in ziangruangah i beisei?" tiah ka sut.

Nunau cun mitthli tla rero phah in zangfah i dil ih, ka nupi ih tthi ding ah i thlem rero. Ka parih rinum ding le keimah duhdawt thiamtu si ding in thu i kam. Curuangah thil ttul pawl kan tawlrel ngah in kan nei aw.

Tangphawlong thawi' kan pawhsuah sal tikah, mi ngaihsak thiam zet nupi a si ti a lang cih mai. A ttongkam a nem, hnattuan a taima ih keimah le ka u pahnih rian ding in a tiar aw ringring. Amah vek nupi ka neih cu ka lung a awi zet. Asinan ka u pahnih cun ni khat hnu ni khat in nahsik sinsin ruangah ka lungawi aipuannak cu an ngaih lo. Iksiknak thinlung cun kei le ka nupi thah duhnak tiang in a neihter hai.

Curuangah, zan khat cu, kan nupa in thaw zet ih kan ihthah lai ah ka u pahnih cun tangphawlong ihsin in hlon thlak. Lasi a si mi ka nupi cun himdamtei' kan um theinak ding ah a huham a hmang. A rei hlan ah tikulh pakhat ah kan thleng. Cutikah ka nupi cun, "Ka duat, kei hi lasi ka si. Ka pasal ding ih a tling mi lainatnak neitu mipa na si ruangah pasal ih ka lo neih mi na si. Nang cun tthate'n i zohkhen. Asinan lungawinak cang thiam lo na u pahnih in an lo tidan hi cu ka tuar na zet ih, ka thin khal a heng zet. Anmah hremnak ah an tangphawlong ka pilter ding," a ti.

Ka thin a phang zet. Ka nupi hnenah, "Zangfahte'n cuvek cu tuah hram hlah. Ziang a va si hman ah, ka unau an si. Kan ngaidam ding ih kan theihhngilh men sawn pei," ka ti.

Asinan ka nupi ih thinhengnak cu zianghman in a rehter thei lo. A thin diriam ko ih phuba a lak hnu lawng ah a thinlingnak a reh thei ding thu a phuang. Cu thluh ah dawi ttong tthenkhat a vun samh ih, kan khawpi ih ka inn hmai ah ka ding ti ka hmu aw. Ka nupi lasi khal ka kiang ah a um ve. A inn thar ihsi rak hmuahnak ah ka inn sangka cu ka ong. Inn sung kan lut tikah, sangka ri ah depdet hmel zet uico dum pahnih ka hmu. Ka mang a bang zet.

"Ka duat, himi uico dum pahnih hi khuitawk in an ra ti ka thei lo. Uico ka vulh dah lo," tiah ka sim.

Ka nupi lasi cun, "Keimah ka thei si, ka duat. Himi uico dum pahnih hi lungawinak cang thiam lo na u pahnih an si. Anmah hremnak ah uico dum ah ka canter hai. Tu ihsin na duh dandan in na tuah thei hai thlang. Tu ahcun na hnen ihsin ka fehsuak ding. Ka hremnak dawi hin kum hra a daih ding. Cumi hnu ah i ra tong sal thei," a ti.

Ka nupi lasi cun a inn umnak i sim hnu ah thli lakah a ziam hlo. Tu ahcun kum hra a luan thlang. Curuangah uico dum pahnih hi hruai in ka nupi lasi ka hawl a si hi.

"Tu ah, Khuavang, hivek tluk ih mangbang thlak le zum-um lo khop ih maksak thuanthu hi na thei dah hrimhrim lo ding ka ti ngam. Himi thuanthu man ah sumdawngpa ih nunnak tthen-thum tthen-khat hi zuah ding in ka lo dil."

Khuavang cun a lung a kim. Cu thluh ah a pathumnak putar in, "Thuanthu hmuahhmuah lakih danglam le ngai nuambik ka lo sim ding," a ti. Zum-um lo khop ih mak thilthleng pawl le dawi maksak thuanthu a sim hnu ah khuavang cun sumdawngpa a hremnak tthen-thum tthen-khat cu zuah ding in a lung a kim lala. Cutin khuavang cu a feh liam. Sumdawngpa le putar pathum khal in an khualtlawnnak an peh cio.

Sumdawngpa cu inn ah a tlung ih a innsang cun lungawi zet in an rak hmuak. Cu thluh ah a luatnak thuanthu danglam zet cu a sim hai.