Greek Siangpahrang le Sibawi Douban

Arabian Zan 1001:

(10) Greek Siangpahrang le Sibawi Douban (a peh)

Khawnbawlpi cun, "Siangpahrang bawipa, sibawi Douban ih thuhla ah kan sir sal pei. Na ralrin lo ahcun amah na rinsan ruangah na sir aw leh thei a si. A lo tuamhlawmnak kha can khatkhat ah tthatlonak suakter thei a si le si lo a theitu an um maw si?" tiah a sim.

Greek siangpahrang cu mi fimvar lo zet a si ruangah khawnbawlpi ih tumtahnak hrokhrawl a hmu ban lo. A thutiam hmaisabik parih ding hnget ding khal in a thinlung a hngetkhoh fawn lo.

Curuangah, "Khawnbawlpi, cuti ih vun ruat ahcun ka nunnak la ding ih ra khal a rak si thei ngai. Cumi cu a siivai rim pakhatte men hman in a tuah thei mi a si. Ziang tuah a ttul timi ka theih a ttul rori," tiah a sim.

Cutikah khawnbawlpi cun, "Siangpahrang bawipa, na nun a himnak ding ih tuahdan ttha bik cu amah ratter lohli ih a lu rak tan cih a si ko," a ti.

Siangpahrang khal cun, "Cumi cu a ttha bik ding ah ka ruat ve," a ti.

Cu thluh ah a khawnbawl pakhat cu sibawi va ko ding ah a fial ih, sibawi cu a ra lohli ve.

Siangpahrang cun, "Na lak ihsi ka nunnak humhim ding ah nangmai' nunnak la ding ih ka lo kawh mi a si," tiah sibawi cu a sim.

A thih ding thu a theih tikah sibawi cu rel theih lo khop in a mang a bang.

"Siangpahrang bawipa, ziang sualnak so ka tuah?"

Siangpahrang cun, "Nang hi thlingthlatu na si ih, thah i tum ti ka thei ngah zo. Asinan keimah in ka lo that hmaisa ding," ti phah in a kiang ih um mi thattu cu, "Sibawi kha sat that awla, i phiarthahnak ihsin ka luat ding," tiah thu a pe.

Cumi thupek hamkha a theih tikah sibawi cu a khuk a bil ih, "Ka nun cu zuah hram aw. Cule na nunnak khal zuah a si ve ding," tiah ttap phah in a dil. 

Hitawk zawn ah ngakaitu cun a thuanthu rel cu a cawl ih Khuavang hnenah, "Greek siangpahrang le sibawi karlak ih thilthleng hi kan pahnih karlak khal ah a thleng ve ti na hmu ko ti aw! Greek siangpahrang cun sibawi parah zangfahnak a langter lo. Curuangah mi thattu cun a mit a tuam sak," tiah a sim.

An kiang ih umtu hmuahhmuah in sibawi ih nunnak cu zuah ding in an dil nan, siangpahrang cun a ngai duh lo.

Khuk bil ih um, a mit tuam sak mi sibawi cun, "Siangpahrang bawipa, cinfel ttul mi thuhla pawl cinfelnak can le a hmang ttangkaitu ding hnenih ka cabu pawl tanta thei ding tal in can i pe hram aw. Nangmah lo pek duh mi cabu pakhat khal ka nei. Cumi cabu cu a man a khung zet ih, na rothil khawlnak hmun ah khimkhuahtei' ret ttul mi a si. Cumi cabu ih cahnah paruknak kau in, a kehlam cahmai ih catluan tlar thumnak na siar tikah theih hiar um zetzet thuhla tampi na hmu ding. Ka lu nan tan tikah, na sut duh mi thuhla pohpoh cu ka lu in a lo let ding," tiah a sim.  

Siangpahrang cun cuvek thilmak cu hmuh a hiar tuk ruangah sibawi cu thaisun ih that ding in a tthawn ih, sibawi ih inn cu fek zet in a kilter hai. Sibawipa cun a tawlrel ttul mi pawl a tawlrel thluh ta. A thaisun ahcun sibawipa ih thihnak le a lehhnu thilthleng zoh ding in mi tampi an ra hai. Sibawi cu cabu tumpi pakhat keng in siangpahrang tohkham ke hram ah a va feh. Kheng pakhat khal a keng ih, kheng par ahcun cabu kawm cu a pharh. Cumi pawl cu pe phah in, "Siangpahrang bawipa, himi cabu hi la awla, ka lu nan tan ngah in ka lu cu himi kheng par ih cabu kawm par ahhin ret aw. Cutawk ih a um vete'n ka lu ihsi luang mi thisen cu a reh cih ding. Cumi ttheh ah cabu kha kau awla, ka lu in na thusuhnak pawl a lo let ding. Asinan, siangpahrang bawipa, sualnak nei lo ka si ruangah, ka parah zangfahnak nei hram ding ah ka lo dil a si," tiah a sim.

"Na dilnak pawl cun tthathnemnak an nei lo. Na thih hnu ah na lu lawng a ttong thei lai timi lawng hman ah, thi tlak na si zo."

Cumi a ttong phah ah sibawipai' kut ih cabu cu a la ih, mi thattu cu a ttuanvo ttuan ding in thu a pe.

Mi thattu cun sibawipai' lut cu thiam zet ih a sat tan ruangah kheng sungah a vung tla cih ih, thisen suak khal a reh cih. Tan zo mi lu ih mit pawl cu an meng keukeu lai ti a hmuh tikah siangpahrang cu a mang a bang zet. Sibawipai' lu cun, "Siangpahrang bawipa, cabu kha kau aw," a ti. Siangpahrang cun a vun kau. Asinan cahnah pakhatnak cu pahnihnak thawn an erh aw ti a hmuh tikah, a kau olsam deuh ding in a lei thawn a mehtok a liak ciar. Cahmai paruknak a thlen tiang in cutin a tuah vivo. Cahmai paruknak a thlen tikah zianghman ngan mi a um lo ti a hmu ih, "Sibawipa, ngan mi zianghman a um ual lo," a ti.

Sibawipai' lu cun, "Cahmai malte kau bet hrih aw," a ti. Siangpahrang cun a mehtok liak ciar rero phah in cabu cu a kau vivo. Cutikah cahnah tin ih a um mi tur pawl cun hmual an nei vivo. A mit khal in khua a hmu thei nawn lo ih a siangpahrang tohkham ke hram ah a ril.

Sibawipai' lu cun tur pawl in hmual an nei ih, siangpahrang cu cam khat te lawng a nung thlang ding ti a hmuh tikah, "Siangpahrang sualral, hremnak i pek mi hi ziangtluk hamkha le dik lo a si ti zoh hnik aw," a ti.

Cumi a ttong thluh rual ah siangpahrang cu a thi. Cu thluh ah, nunnak maltakte lawng a nei thlang mi sibawipai' lu khal cu a thi ve.

Himi hi Greek siangpahrang le sibawi Douban ih thuanthu cemnak a si ih, tu ahcun ngakaitu le khuavang thuhla ah kir sal uh si.