Siabgpahrang ih Mi-aa

African Thuanthu Roling (17):

Siangpahrang ih Mi-aa

Hlan laipi ahhin siangpahrang pakhat a rak um. Hmun tampi ihsin canganthiam pawl, bezaipu pawl le awnmawithiam pawl an ra ih siangpahrang cu an ra tong ttheu. Siangpahrang khal in an rel mi thuanthu pawl, bezai pawl le awnmawi pawl cu a ngaina zet. Asinan midang hmuahhmuah hnakin siangpahrang ih ngainat hleice mi pakhat a um. A hmin cu Mahamood a si. Mahamood cun bumawknak phunphun a thei, hla hnihsuak zetzet a sak ttheu ih lam a thiam fawn. Siangpahrang a hniter ringring thei. Mipi pawl cun anih cu Siangpahrang ih Mi-aa tiah an ko.

Asinan Mahamood ih umdan lakah siangpahrang in duh lo mi pakhat a nei. Pa fatakte si cing in zingpit ihsin zan tiang rawl a ei ttheu. Siangpahrang cun, "Zangfahza Mahamood hi rawl a ei tam tuk ahcun a reihlan ah a thi ding," tiah a ruat.

Curuangah a tlangbawi pawl le siahhlawh pawl a ko khawm ih, "Rak ngai uh. Ni khat sung cu Mahamood hi ei ding zianghman nan pe lo pei. Sabit ti, thingthei le sa zianghman nan pe lo pei. Sang phel khat te khal pe hlah uh! Ka rawl ei cabuai khal ah a to lo pei. Ni khat pumhlum ei ding zianghman nei hlah seh," a ti.

Cutikah a tlangbawi pakhat in, "Aw, a dik a si ka Siangpahrangpa. A thau tuk ngai," a ti. Curuangah a thaizing ahcun siangpahrang ih rawl ei cabuai ah Mahamood ih tohkham ding a um lo. Phar kiang ah a feh ih a va ding nguaungi. Amahte'n, "Ka hngah a ttul. A rei hlan ah siahhlawh pawl in rawl le sabit ti in ra pe ding," tiah a ruat.

Asinan siahhlawh pawl cun zianghman an ra pe lo. Rawl a dil ngam fawn lo. Ziangahtile siangpahrang a ttih. "Siangpahrang thinhengtertu cu a thi ding," tiah a ruat.

Zangfahza Mahamood cu a ril a rawng tuk lawmam. Tawkfang ah siahhlawh pakhat in sang phel fatakte a thlau pang. Mahamood cun a sar lohli. Amahte'n, "Tu ahcun ei ding pakhat cu ka nei. Siangpahrang in i zoh lo lai ah ka ei ding," tiah a ruat.
Zanriah an ei khawh tikah bezaipu pawl in an bezai an siar, awnmawithiam pawl in awnmawi an tum ih lamthiam fala pawl cu mawi zet in an lam thok.

Mahamood cun, "Tu ahcun siangpahrang in lamthiam fala pawl a zoh. Ka sang phel fatakte hi ka ei thlang ding," tiah a ruat. Asinan siangpahrang in Mahamood cu cat lo in a rak zoh ringring. Awnmawithiam pawl cu a cawlhter ih Mahamood a kawh hnu ah, "Laak pakhat na neih thu ka rak thei. Khuitawk ihsin na ngah?" tiah a sut.

Mahamood cun, "Tripoli khawpi ah ka lei," a ti.

Siangpahrang cun, "Si ngai cu," a ti sal.

Cu thluh ah awnmawithiam pawl in awnmawi an tum ih fala pawl an lam sal. Mahamood cun a sang phel fatakte cu ei a duh tuk thlang. Asinan siangpahrang in a kiang ih ra ding in a ko ih thu a sut sal.

"Tripoli ahcun na laak hrangah ziangzat na pe?"

Mahamood cun a sang phel fatakte cu a zal sungah a san lohli ih, "Sui tangka hleiruk ka pe, ka Siangpahrangpa," a ti. Siangpahrang cun sun siimlam pumhlum cuti'n a tuah kual rero.

Mahamood in a sang phel a ei tum tinte'n siangpahrang in thu a sut cingcing. A netnak ahcun khua a rung thim. Mahamood cun a tuar thei nawn lo. A ril a rawng ih a cau tuk thlang. Puai a cem tikah Mahamood cu coka ah a va tlan. Asinan coka cu tawh an rak hren ih Mahamood cun a sang phel fatakte lawng ei ding a nei. Cumi cu a ei ta ih a pindan lam a pan. Asinan a itthat thei lo. A ril a rawng tuk lawmam.

Tawkfang ah siangpahrang ih pindan ah a va tlan. Sangka a king tikah siangpahrang cun, "Zan siim hnu ah zo si ka sangka kingtu?" tiah thinheng zet in a rak sut.

Mahamood cun, "Maw, ka Siangpahrangpa, poi ka ti zet. Asinan ka laak kha Tripoli ah si lo in Benghazi khawpi sawn ah ka lei ti ka lo sim tengteng a ttul in ka thei," a ti.

Siangpahrang cun lungawithu a sim ih tlan sal ding in a sim.

Malte a rei hnu ah Mahamood cun sangka a king lala. "Maw, ka Siangpahrangpa, sunhnu ahkhan thuphan ka lo sim pang. Ka laak man kha sui tangka hleiruk a si lo. Sui tangka kul sawn a si."

Cutikah siangpahrang cun thinling zet in, "Mi-aa. Na laak thuhla atthlak ruangah na lu ka lo tan ding ih na ruak kha savuak rual ka eiter ding," a ti.

Mahamood cun siangpahrang ih ttong a theih tikah a hni ih, "Aw, cuti'n na tuah ding ti ka thei ko. Asinan ka thih hlan ah ka saduhthah netabik ka rel a ttul ko ti aw? Saduhthah pakhat te lawng?" a ti sal.

Siangpahrang in, "Ziangmaw na saduhthah netabik cu?" a ti.

"Ka saduhthah neta bik cu zanriah thaw zet ei a si."

Siangpahrang cun ziangkim a theithiam. A hni huahho ih a siahhlawh pawl cu a pindan sungah rawl thaw bikbik run keng ding in a fial. Mahamood thawn cabuai pakhat ah an to tlang. Rawl ei phah in zingpit khawvang tiang an hni rero. Cumi hnu cun Mahamood cu rawl ei lo in a um dah nawn lo. A lung khal a awi ringring.

Hram: Fool of the King – African Folktale.