Long Hnattuan Sindbad ih Khualtlawn Vei Sarihnak le Netabik

Arabian Zan 1001:

(21) Long Hnattuan Sindbad ih Khualtlawn Vei Sarihnak le Netabik

Ka khualtlawn vei ruknak hnu cun tipithuanthum lam ah feh nawn lo ding in ka ruatcat. Tu ahcun ka kum khal nun hahdam hman can a kim thlang ih, nun thap ih cangvaihnak khal ka nei tam tawk zo. Ka nun cem tiang in daitei' um lawng ka duh thlang. Asinan ni khat cu rualpi pawl thawn kan nomawk lai ah, Siangpahrang ih bawi upa pakhat in biak i duh thu in sim. I ra tong ding ih ka kawh tikah anih cun Siangpahrang Haroun al Raschid hnenah i hruai. Upatnak ka pek thluh in Siangpahrang cun, "Sindbad, hnattuan ding ih ka lo hai ruangah ka lo kawhter mi a si. Rualpiawknak ca i kuattu Serendib Siangpahrang hnenih cakuat le laksawng pe kirtu ding ah ka lo hril," tiah i sim.

Siangpahrang ih thupek cun ttek vekin i tlak.

Kei cun, "Zumnak Humhimtu, na thupek hmuahhmuah ttuan ding ah ka tiar aw ko. Asinan ka tuar zo mi harsatnak maksak pawl ruangah ka thinlung a rethei tuk thlang ti hi i mansuah sak hram aw. Taktak ahcun, Baghdad suahsan nawn lo ding in thutiam ka rak tuah zo," tiah ka sim.

Cule, ka tuarsuah mi harsatnak danglam bik pawl cu reipi sung ka sim ih, anih khal in thinsaute'n a rak ngai.

Cu thluh ah siangpahrang cun, "Tontehnak dangdai zetzet tthenkhat na tong ti cu ka thei ko. Asinan cuvek pawl in ka saduhthah kimternak ding ihsi an lo donkhamnak ding san ka thei lo. Serendib ah na va feh vurvo ding ih ka thucah na va sim ding, cu thluh cun na zalen ih na duh len na ra kir thei, asilole na duh dandan in na um thei. Asinan na feh tengteng cu a ttul, ka zahumnak le cungcuannak hin na va feh an lo phut a si," tiah i sim.

Ziangtizawng hman ih ka hrial thei hmel cuang lo ruangah, a thupek ka thlun ding thu ka sim. Cutikah siangpahrang cu a lung a awi ih, ka khualtlawn cemliam hrangah sui tangka thawng khat i pe. A rei hlan ah cakuat le laksawng keng in Balsora long cawlhhmun ihsin ka fehsuak ih, zamrang le himdamte'n Serendib ah ka va thleng. Ka va thlen thu ka theihter tikah ttha zet in in rak hmuak hai ih, siangpahrang hnenah in hruai. Siangpahrang khal in lungawi zet in i rak hmuak ve.

Siangpahrang cun, "Ka lo hmuak, Sindbad. Na thu ka ruat ttheu sokhaw. Ka lo hmuh sal cu ka lung a awi zet," i ti.

I sunlawihnak parih lungawithu ka sim hnu ah, Siangpahrang Haroun al Raschid ih kuat mi laksawng pawl cu ka pe. A hmaisabik ahcun sui puanthan pawl kimcangtei' thlaih thluh mi ihkhun a si ih, sui tangka thawng khat man a si. Cumi zat man thotho sen-dup rong ihkhun dang pakhat khal a tel. Cu thluh ah ceimawi mi korfual mankhung zun sawmnga le Cairo, Suez, Cufa le Alexandria pawl ihsi lei mi bawri (linen) puanthan var ttha bik za khat khal an tel. Cun, pianhmang dangdang nei mi ihkhun dangdang an tel fawn. Pacang pakhat in conkiang thawn kiosa a sai tum lai pianhmang kher mi lung mankhung kheng pakhat khal a tel. A netabik cu cabuai mankhung pakhat a si ih, Siangpahrang Solomon ih rak neih mi cabuai a si. Siangpahrang Haroun al Raschid in rualpiawknak ih a kuat mi laksawng pawl cu Serendib Siangpahrang cun lungkim zet in a cohlang.

Cutin ka ttuanvo a cem ruangah kei cun tlun kir lohli ka duh. Asinan siangpahrang in can tawkfang sung i camter bet. A netnak ahcun laksawng tampi thawn i thlah liam ih, tangphawlong thawn ka pok cih. Ni li sung cu tluangte'n ka feh. Asinan ni nganak ahcun, vansiat le malmak ah tipithuanthum ih suamhmang pawl thawn kan tong aw kherkher. Suamhmang pawl cun kan tangphawlong cu an ramh ih, a rak dotu hmuahhmuah cu an thah hluahhlo. Thuhla umdan talhton thiam ih pumpe aw tu pawl cu thawng an thlak. Kei khal thawngtla lakah ka tel ve. Kan neih mi hmuahhmuah in laksak thluh hnu ah, hranhram in hnipuan siava in hruhter. Cu thluh in hlapi ih a um mi tikulh ah in fehpi ih, cutawk ahcun sal ah in zuar. Kei cu sumdawng milian pakhat in i lei ih, a inn ah i hruai. Hnipuan le rawl khal tthate'n i pe. Ni tawkfang a rei hnu ah a hnenah i ko ih, ziang ka tuah thiam ti i sut.

Kei cun suamhmang pawl ih kaih mi sumdawng milian ka si thu ka sim ih, hna dang zianghman ka ttuan thiam lo thu khal ka sim.

Ka pu cun, "Thal sai teh na thiam maw?" tiah i sut.

Kei cun thal sai ka no lai ih ka paih bik mi a rak si thu, ka cinh sal ahcun ka thiamnak ka ngah sal tengteng ka zum thu ka sim.

Cutikah conkiang le thal i pe ih, sai parah to in khawpi ihsi hla zet ih a um mi hramlak kaupi ah i hruai. Hramlak sahbiknak hmun kan thlen tikah kan cawl ih ka pu cun, "Himi hramlak ahhin sai tampi an um. Himi thingkung tumpi ahhin rak relh awla, a ra mi sai hmuahhmuah cu conkiang thawn rak sai aw. Pakhat na sai that ngah tikah i ra sim aw," i ti.

Cu thluh ah ei-in ding i pe ih, anih cu khawpi ah a tlung. Kei cu thingkung sangpi ah ka hung kai ih sai cu ka rak bawh. Cumi zan cu zianghman ka hmu lo. Asinan a thaizing ni a suah pekte ah sai rual run khat cu hramlak thingkung hramkung pah rumro phah in an ra. Ka conkiang thawn cawl lo bang lo in vei tampi ka rak sai ciamco. A netnak ahcun sai tumpi pakhat cu ka that ngah thei. Cutikah sai dang pawl cu an tlan ih, himdamte'n thing par ihsin ka ttum thei phah. Leilung ka thlen vete'n ka pu ih hnenah ka tlung vurvo ih ka hlawhtlin thu ka va sim. Ka pu cun i fak ih, thil tthattha i tthen. Kan pahnih in hramlak ah kan feh sal ih, khur tumpi pakhat kan laih hnu ah sai cu kan phum. A taksa dang an ttawih ih a ruh lawng an tan tikah ka pu cun a ho pawl a ra kir sal ding.

Cutin thla hnih sung ram ka tawi ih, sai pakhat tal that ngah lo in ni khat hman a liam dah lo. Hmun pakhat lawng ihsi bawh lo in hmun dangdang khal ah ka tthawn phahphah. Zing khat cu ka rak bawhnak pan in sai rual an ra. Asinan an tidan ttheu vekih feh lan lo in ka tonak thingkung cu an ra kulh ih, ttihnung zet in an ai ngualngo ciamco. An ke rit zetzet thawn leilung an sirh ciamco ih, an zate'n keimah in zoh thluh ti ka hmuh tikah, ka ttha a tthia tuk ih ka kut ih conkiang khal an tla thluh. Ka ttih vek taktak in, an lakih a tumbik pakhat in a non thawn ka umnak thingkung cu a ngerh hnu ah, vei le khat ah a hram tiang phong ko in a phawi ih leilung ah a thluk. Kei cu leilung ih tlu mi thingkung hngettek lakah ka tartahak.

Cumi can ahcun ka nun can netabik a thleng rori thlang ah ka ruat. Asinan sai tumpi cun dimdawihte'n i sar ih a zaang ah i toter. A zaang parah cun kei cu thi dang diadia in ka um. Cu thluh ah hramlak sahpi sungah a feh lut ih sai rual dang khal in an thlun. Leilung ih i tthum sal tiang cu ka hrangah a rei duh nguarngo zet. Kei cu leilung ih ka ke thawn ka din hnu khal ah, sai rual zoh in mang ka man rero lai vekin ka thei aw. Asinan sai rual cu hmun dang ah an feh liam ih, hramlak ah an pil hlo. Ka hung harhfim ih ka kiangkap ka zoh tikah tlangpawng tumpi pakhat ah ka thleng ti ka hmu. Tlangpawng ahcun ka mit ih hmuh ban cin tiang in sai ruh le ho an um liailiai ti ka hmu. Cutikah, "Himi hi sai thlan an timi a si zik hi. Anmah ka thah nawnlonak ding ah hitawk ah in fehpi a si ding. Ziangahtile an ho lo bak cu duh mi dang ka nei lo ti an thei. Hitawk ahcun ka dam sungih ka thiar cawk lo ding khop in sai ho an tam fawn," tiah ka ttong.

Cu thluh ah a zamrang theipatawp in khawpi ah ka tlung. Lamzin ah sai pakhat hman ka tong lo. Sai-ho Tlangpawng fehnak zin ong ding in sai pawl cu hramlak thuk sawn ah an tthawn aw ti ka theithiam ih, an fimvarnak cu ka ngaisang zet. Ni khat le zan khat ka feh hnu ah ka pu ih inn ah ka va thleng. Ka pu cun i rak hmu cu a lung a awi zet.

Ka pu cun, "Aw, zangfakza Sindbad, ziang na cang si pei ti'n ka thin a rak har zet. Hramlak ih ka ra feh tikah a tawhram ihsi phawi pekte mi thingkung ka hmu ih, a kiang ah conkiang pawl ka hmu fawn. Nungdam ih ka lo hmuh sal nawn lo ka phang zet. Thihnak ihsin ziangtin na luat ti i hun sim hnik," a ti.

Kei cun a theih duh mi cu ka sim lohli ih, a thaisun ah Sai-ho Tlangpawng ahcun kan va feh. Thu dik ka sim ti a hmuh tikah a lung a awi tuk lawmam. Kan sai ih a phurh theih cin sai ho pawl phur phah in khawpi ah kan tlung. Cule, ka pu in hitin i sim:

"Hivek ih i neinungtertu cu sal pakhat dinhmun in ka lo zoh siang nawn lo. Curuangah ka unaupa, zalennak la awla, Van in thlawsuah lo pe hram seh. Himi hramlak sai pawl hin kum tinte'n kan sal tampi an that ttheu ti khal ka lo sim thlang ding. Ziangtluk ih ruahnak ttha kan pek khal ah, a rei maw rei lo ti men, sai pawl cun an that ngah thotho. Nangmah lawng hi sai pawl ih kut ihsi luattu na si. Curuangah nang hi Van in a hleice ih a humhim mi na si tengteng ding. Tu ahcun nangmai ruangah nunnak hloh rero ttul nawn lo in kan khawpi pumhlum a neinung thlang ding. Curuangah zalennak lawng si lo in, na hmakhua khal ka lo sialsak ding."

Cutikah kei cun, "Ka pu, ka lung a awi. Neihnunnak tinkim ngah hram aw. Keimai thuhla ahcun, ka ram ih tlun kir theinak lawng ka lo dil," tiah ka sim.

Ka pu cun, "A ttha e. Ttoruah in sai ho phurtu tangphawlong pawl a run hruai cing mai ding ih, na khualtlawn lamcaw ding thawn na ram ah ka lo kuat ding," i ti.

Cutin, ka pu ih hnenah ttoruah a sur tiang in ka um. Ni tinte'n sai ho a retnak inn ahcun sai ho kan ret bet ringring ih, ni le can a rei cun a khat thluh. Cumi can ahcun sumdawng dang pawl khal in kan thuthup cu an thei thlang. Asinan kan duhtawk kan ngah zo ih a poi nawn lo. Tangphawlong an ra thlen tikah, ka pu cun ka to ding mi i hrilsak ih, sai ho tampi, an ram ih thil mankhung bikbik pawl le lamcaw tampi thawn i thlah. A parah ka lungawi a reh thei lo. Asinan kan thlen hmaisabiknak long cawlhhmun ah ka ttum. Ziangahtile tipithuanthum parih ka ton dah mi hmuahhmuah ruangah tangphawlong to cu ka huam thei nawn lo. Ka sai ho pawl cu sui tampi thawn ka thleng ih, laksawng mankhung le thupi zetzet tampi ka lei. Cu thluh ka thilri pawl cu rannung pawl ka phurhter ih, nelrawn paltlang ih khual a tlawngtu sumdawng bur khat ka thlun hai.

Kan lamzin cu a sau in a retheih thlak zet. Asinan thinsaute'n ka tuar ttentto. Thlipi, suamhmang, rulpi le a hlan ih ka rak tuar mi siatralnak phunphun ka tong lo ding pam tiah ka hnem aw. Can reipi kan feh hnu ah Baghdad ka ra thleng. Tuah ding thupi ih ka ret hmaisabik mi cu Siangpahrang va ton, le ram aiawh ih ka khualtlawnnak thuhla va simtheih ding a si. Siangpahrang cun ka um lo rei ruangah a thin a rak har thu, asinan a ttha bik a ruahsan thotho thu i rak sim. Sai rual lakih ka cangvaihnak pawl a theih tikah a mang a bang zet ih, mi dingfel ka sizia rak thei cia lo sehla cun a zum hman a zum thei lo ding thu i sim.

Himi thuanthu le ka sim mi thuanthu dang pawl cu a cangantu pawl in sui cafang thawn ngankhum in a rothil lakih ret ding ah thu a pe. Cu thluh ah, sunlawihnak le laksawng i pek mi pawl lungkim zet ih cohlang phah in, ka tlung. Cumi hnu cun ka hnattuan ka cawlhsan ih, ka innsang le rualpi hrangah ka can pumhlum ka pe.

Sindbad cun a khualtlawn vei sarihnak le netabik thuhla a sim thluh tikah, Hindbad ih lam a hoi ih hitin a sim bet:

"Asile, ka rual, tu ah teh ziangtin na ruat? Kei hnakih harsatnak tuar tam, asilole thihnak ihsi luat nerno tam hi na rak thei dah maw? Tu ah nun hahdam le semrem ka neih mi hi a awmang ko maw?"

Hindbad cun Sindbad cu a ra naih ih, ttihzah zet in a kut a hnam hnu ah, "Ka pu, siatralnak ttihnung tampi na rak tong a si hi. Kei ih harsatnak men cu nang ih ton mi thawn tahtthim tlak an si lo. Cui tlun ah, na neihsiah parih na tirh a siannak hin, hivek neihnunnak hi co na phu ti an langter. Na neihsiah cen thei ding in damsaunak le lungawinak nei hram aw," tiah a sawn.

Cu thluh ah Sindbad in sui tangka za khat a pe lala ih, a rualpi cazin ah a khum fawn. Thilri thiartu ttuan ttul nawn lo ding khal in a tuah ih, a dam sung hmuahhmuah in Long Hnattuan Sindbad a cinken ringring theinak ding ah amai' cabuai ih ni tin rawl ra ei ding khal in a sawm.