Long Hnattuan Sindbad ih Khualtlawn Vei Hnihnak

Arabian Zan 1001:

(16) Long Hnattuan Sindbad ih Khualtlawn Vei Hnihnak

Nan theih vekin, ka khualtlawn vei khatnak ihsi ka ra kir hnu ahkhan, ka dam sung hmuahhmuah Baghdad ah daiziar ih cawl hahdam ding in ka um. Asinan a rei hlan ah amah kel ringring ih nun cu ka ning ih tipithuanthum parih thlen sal lohli ka duh.

Curuangah ka tlawn tumnak hmun hrangih a mil mi thilri pawl ka lei hai ih, mi zah-um ti ih ka theih hai mi sumdawng dang pawl thawn tangphawlong ttha pakhat in kan feh. Tikulh pakhat hnu pakhat kan thleng ih, hlawhtling zet in sum kan tuah vivo. Asinan ni khat cu tikulh pakhat ah kan thleng. Cumi tikulh ahcun thingthei rah phunphun le tiva thianghlim zetzet an um nan, minung an um hmel lo. Ka rualpi pawl hmun dangdang ah veivak in pangpar le thingthei an lak rero lai ah, kei cu ni hnemnak hmun pakhat ah ka rak cawl. Ka ken mi ei-in le sabitti ka cen ih, ka kiang ih tivate luang awn in i thlim fawn ruangah ka rak itthat. 

Ziangtluk ih rei ka itthat ti ka thei aw lo. Asinan ka hung tthangharh ih ka thawh tikah keimah lawng ka tang ih, kan tangphawlong khal a feh zo ti ka hun hmu cu ka thin van ah a kai zualzo. Thluak buai nat nei vek in ka tlan ciamco ih, beidong in ka kiauraak. Asinan tipikap ka thlen tikah kan tangphawlong cu puanzar pawl a kim in a pharh ih a liam miarmo ti lawng ka hmu man. Cumi lai fang ahcun, inn ahkhan daite'n rak um niakno men tak ding ti'n ka sirawk van ka ban. Asinan saduhthah men cun zianghman tthathnemnak a neih lo ding ruangah, ka raltthatnak ka sawmkhawm ih, luatsuah theinak ding hawl in kiangkap ka thlir thok. Thingkung sang pakhat ah ka kai ih, thinphannak le ruahsannak mit thawn tipithuanthum lam ka hei cuan hmaisa. Asinan beisei ding thil zianghman ka hmu lo. Curuangah leilung umnak lam ka thlir sal. Cutikah mit aater zukzo ko ih a tleu mi thil var tumpi pakhat ka hmu ih ka mang a bang zet. Ziang a si ti theih hiar zet in ka zoh rero nan, a umnak a hla tuk ih ka theithiam ban lo.  

Thingkung par ihsin ka ttum ih, ka lamcaw tang umsun ka lak lohli hnu ah, cui thil var umnak lam cu mansahlap in ka pan. A kiangnai ka thlen tikah bawhlung var tum maktara si ding vekin ka hmu. Ka va tham ngah tikah a ngil in a mam ttha zet ti ka hmu fawn. Ke palnak ding a um lo ruangah a parih hung kai theih a si lo. Curuangah a ong a um maw ti hawl in ka hel kual nan ong a um lo. Asinan ka hel kual lai ahcun ka kekar ka siar phah ih a malbik in kekar sawmnga vuakvel a si. Cumi can ahcun ni a liam zik thlang. Culai fang ah, khua a rung thim thutthi. Khawdur dum tumpi ka tlun zawn ah a ra thleng lohli vek khi a si. Ka hun zoh tikah ka kiangnai ih a zuang kual rero mi tlunzuangva tum maktara a si ti ka hmu ih ka mang a bang tuk lawmam. Asinan long hnattuan pawl in an rel ttheu mi, mura ti ih an kawh mi mangbangza tlunzuangva ka vun mangsuak thutthi. Ka mang i bangtertu thil var tumpi khal cu a tii a si ding ti ka vun theithiam.

Ka zum vek taktak in mura cu a tii ih parah nuamnaite'n a rung ttum ih, hlumter ding in a thla thawn a khuh. Kei cu a ke umdan thlun in a tii kiang ahcun com khiaukhi'n ka rak um. Thingpum tluk ih a tum mi a ke cu ka hmai ciahciah ah a um. Ka lupawng ka phelh ih mura ke ahcun ka ttawn aw. A thaizing ih a zuansuah tikah tikulh tthing ihsi i thiarsuah ka beisei ruangah a si. Ka zum vek taktak in a thleng fawn. Khua a van vete'n mura cu a zuang ih, leilung ka hmuh ban nawn lo tiang in tlunvan sang ah a kai vivo. Cu thluh ah cak zurzo in a ttum lala ih, ka lung hmuah a hlo thluh dengmang. Mura cu a ttum zo ih, leilung parah ka um ti ka theih vete'n ka ttawnawknak lupawng cu a ke ihsin ka phelh lohli. Cumi rual deuhthaw ah mura cun rul tumpi pakhat a ttumh. A hmur tha cak zet thawi' mallai a vun cuk cun rul cu a thi mai. Cu thluh in thli lakah a thiar so leh ih ka mit hmuh ihsin a zuang hlo. Ka kiangkap ka hun zoh tikah tikulh tthing ka suahsan khal cu sullam nei cuang lo ding vekin ka thei.

Ka thlennak horkuam cu a thuk ih a bi fawn. Khawdur umnak tiang a thleng mi tlang pawl in an kulh ih, tlang pawl cu an hrap ttentten hlei ah, lungto hlir an si fawn ruangah kaisuah theinak ding ci a si lo. Thin le ham kai aw lo helhel in, horkuam ihsi luatnak ding hawl ih ka vak vivo tikah, leilung ahcun diamond an darh aw phengpheng ti ka hmu. Diamond tthenkhat cu mangbang thlak khop in an tum teptep. Cumi ka hmuh tikah ka lung a awi hiamhiam. Asinan ka lungawinak cu cop le cilh ah a reh vukvi. Ziangahtile rulpi tum le sau rapthlak zetzet a tor le seng khal an um ti ka hmu. Rul pawl cu an tum tuk ih, an lak ih a te bik hman in sai pakhat cu olaite'n a dolh thei ding. Ka vantthatnak ah, sun ahcun lung puk tumpi pawl sungah an relh ih, zan lawng ah a leng ah an suak in a lang. An ral mura an ttih ruangah a si men thei.

Sunvu in horkuam cu a suk a so ah ka hrawh. Khua a rung mawt tikah puk fatakte pakhat ah bokvak in ka lut ih, a ka cu lungto thawn ka khar. A tang lai mi ka lamcaw maltakte ka ei ih, itthat ding in ka vung zau. Asinan zanvar in rulpi pawl cu an tawivak ih, rap um zetzet ih an siksik fawn ruangah, ttih le khur thlohthlo in ka um ih, ka mit hman ka sing thei fangfang. Zingkhua a hung vang cu ka lung a awi zet. Rulpi pawl an puk sungah an cawl thlang ding ti ih ka ruat hnu ah, tthia durdo cing in ka puk ihsin ka suak ih, horkuam cu ka hrawh kual vivo lala. Ka veivah phah ahcun ka fehnak ih rak um mi diamond pawl cu ngaihsak lo zet in ka sit phah vivo men. Ziangahtile ka dinhmun vekih dingtui' hrang ahcun diamond khal cu zianghman lo men an si tiah ka ruat. A netnak ahcun beidonnak in i neh ih, lungto pakhat parah ka to. Asinan ka mit ka sing man fangfang ti hrawng ah, ka kiang leilung ih thil rung tla phupphi in i fimharhter vukvi.

A rung tla mi cu sasem tharhlam tumpi pakhat a si. Cumi ka zoh lai ah tlang hrap hmun dangdang ihsin sasem dang tampi khal an rung ril ciamco. Long hnattuantu pawl in diamond horkuam hminthang thuhla an rak rel mi thuanthu pawl, le sumdawng tthenkhat in lungmankhung ngah ding ah kalhmang fimvar zetzet an hman thu pawl hi, ngai nuam ding ih an phuah cop mi khualtlawng thuanthu menmen ah ka rak ruat ringring. Asinan tu ahcun thu dik an si thu ka mit rori in ka hmu. Muvanlai pawl in lungto lakah bu sak in, an fa no an cawm can ah sumdawng pawl cu horkuam ahhin an ra ttheu. Sasem an run thlak mi pawl cu diamond pawl parah na zet ih an tlak ruangah, sasem parah diamond tthenkhat an tang ding ti a fiang. Muvanlai pawl in sasem cu an thiar ih, an fa no keuh pek rilrawng zet pawl pe ding in an bu ah an thiar. Cutikah sumdawng pawl cun muvanlai cu ttihtthaih in an auh ciamco ih, muvanlai a tlan tikah lungmankhung cu an hung la ttheu.

Himi can tiang ahcun hitawk horkuam hi ka thlan si ding in ka rak ruat. Ziangahtile nungdam ih luatsuah theinak ding ka hmu lo. Asinan tu ahcun ka raltthatnak ka sawmkhawm sal ih luatsuah theinak ding kalhmang ka pol. Diamond tum bikbik pawl hmuahhmuah ka sarkhawm ih, ei-in ka rak retnak savun bawm ah ka thun. Cu thluh ah savun bawm cu ka taikhap ah hnget zet in ka ttawn. Cu thluh ah ka tumtah mi hrangih remcang bik ding ih lang sasem pakhat ka hril ih, ka lupawng thawn ka zaang ah ka ttawn tarh. Cu thluh in leilung ah ka bokkhup ih muvanlai pawl an rat ding ka rak hngak. A rei hlan ah tha cak zetzet an thla zap awn ka hun thei. An lakih pakhat in ka zaang ih sasem a run ttumh ti ka theih cun ka di a riam zet. Sasem cu keimah tel in a thiar ih, a bu parah dimdawih zet in i thlak.

Vantthat thlak zet in sumdawng pawl khal in an rak cuan ringring ih, muvanlai bu umnak ah mansahlap ih ra tlan in an ra auh ciamco. In hung hmuh tikah an mang a bang zet ih, an lung khal a awi lo. An zate'n an hlawknak ding longtu ah in puh thluh. Kei cun riahsiat hmel pu biktu ih lam hoi phah in, "Ka tuar mi pawl tthate'n thei awla ahcun, ka parah lainatnak na nei deuh ding ka ti ngam. Diamond thuhla ahcun, nang le kei le na rualpi pawl daih in a ttha bik hlir ka nei ko," tiah ka sim. Cumi rel phah in ka diamond pawl cu ka hmuh hai. Midang pawl khal ka kiang ah an ra khawm ih, ka ton mi harsatnak pawl cu mangbang zet in an ngai. Horkuam ihsi luatsuahnak ding ih ka hman mi kalhmang khal an ngaisang zet. An riahbuk ih in hruai hnu ah ka diamond pawl cu an zohfel hai. Kum tampi sung sum an dawnnak khal ah, an tumlam le mawilam ah ka diamond pawl vek cu an hmuh dah lo lawlaw thu in sim hai. 

Sumdawng pakhat cio in muvanlai bu pakhat cio an ham ih, a sungih um mi diamond cio an co ti ka thei. Curuangah muvanlai ih i tthumnak muvanlai bu neitu cu ka lungmankhung a duh zatzat la ding in ka ngen. Asinan a tum bik pakhat a la ih a duhtawk. Cumi pakhat lawng khal cu, a dam sungah hnattuan harsa zianghman ttuan ttul nawn lo ih tuah theitu ding a si ti ka theifiang. Sumdawng pawl hnen ahcun ni tampi sung ka um ih, an tlun tik khal ah lungawi zet in ka thlun hai. Kan tlun zin ahcun rulpi ttihnung zetzet umnak tlangtluan pawl ka pal phah nan, vantthat thlak zet in tipithuanthum kap ah himdamte'n kan thleng thei.

Cutawk ihsin Rohat tikulh lam ah tangphawlong thawn kan feh. Rohat tikulh ahcun puan-sii kung tumpipi an um. An tumzia cu puan-sii kung pakhat hnuai ah pacang za khat cu hahdamte'n an beu thei ding. Puan-sii kung ih thling (hnai) pawl cu luannak ding ih an khuar mi ihsin a thling an donnak kuang ah an rung luang. Cumi hnu rei lo te ah an khal ih puan-sii ti ih kan kawh mi ah an cang. Asinan a thling lak tam tuk a si ahcun a kung cu a vuai ih a thi ve.

Himi tikulh thotho ah zur timi, sai hnakih te deuh le naa hnakih tum deuh rannung pakhat kan hmu. Dong can hrawng a si mi ki pakhat a nei ih, a taksa tawlam ihsin lulam tiang in a hlaphlap ih thuah aw mi vun a nei fawn. A vun parah cun rin var pawl thawi' rin aw mi minung pianhmang pakhat a um. Zur cu sai thawn an sualawk tikah, a lu ih um mi ki pakhat thawn a ral cu a khit ciamco ttheu. Asinan a ral ih thisen in a mit a khuh thluh tikah cangvai thei lo in leilung ah a ril ttheu. Cutikah mura a ra ih a ketin thawn sai le zur cu a thiar hnu ah a fa no pawl ei ding ah a pe ttheu. Himi thu hin nan an a lo haiter ding ti ka thei. Asinan nan zum lo asile Rohat ah va feh uhla nanmah rori in va zoh mai uh. Nan nin ka phan ruangah himi tikulh ih kan hmuh mi mangbangza thil tampi cu rel lo in ka kan men.

Rohat ihsi kan pawhsuah hlan ah ka diamond pakhat thawn sumdawnnak thilri phunphun ka thleng ih, inn tlun zin ah a hlep tampi ka ngah. A netnak ahcun Balsora long cawlhhmun kan ra thleng ih, Baghdad ah mansahlap in ka tlung lohli. Baghdad ka thlen vete'n, a hmaisabik ah, mi rethei pawl hnenah sumpai tampi ka pe. Cu thluh cun harsatnak le tuarnak tampi thawi' ka hlawhsuah mi neihnunnak cu hahdamtei' cen ding in umhmun ka khuar.

A khualtlawn vei hnihnak thuhla a rel thluh ah, Sindbad in Hindbad cu sui tangka za khat a pe ih, a thaisun ah ra sal in, a khualtlawn vei thumnak ih a ton mi thuhla pawl ra ngai sal ding ah a sawm. Mikhual dang pawl khal inn ah an tlung. Asinan a thaisun ah an ra khawm sal. Hnattuan khungkhai le retheihnak a rak tuar mi pawl in zanmang sia vek ih an liamsan zo mi, thilri thiartu Hindbad khal a ra sal ve. Cutin, puai an hman ttheh tikah Sindbad cun mikhual hmuahhmuah a ko khawm hai ih, a khualtlawn vei thumnak thuhla cu a rel thok.