Ngakaitu ih Thuanthu

Arabian Zan 1001:

(5) Ngakaitu ih Thuanthu

Vei khat lai ahhin ngakaitu pakhat a rak um. Cu pa cu a tar tuk ih a retheih zet fawn ruangah a nupi le fa pathum hman a cawm tthittha thei hrot lo. Ni tinte'n tuan zet in nga kai ding ah a feh ttheu. Ni khat ah a sur cu vei li tlunlam vorh lo ding khal in amahte'n dan a tuah fawn. Vei khat cu zingpit khawvan hlan thlapi vang hnuai ah a feh ih tipithuanthum kap ah a thleng. A hnipuan hlit in sur cu a vun vorh. Ti kap ih a sur a dirh sal tikah a rit zet ti a thei. Nga tumpi a awk ngah ah a ruat ih a lung a awi zet. Asinan malte a rei tikah a sur sungah cun nga si lo in laak ruak a rak um ti a hmu ih a ngaih lo zet.

Laak ruak cu a ttawih zo ruangah a sur ih a dirhnak ah a tlek darh thluh. Ngakaitu cu a hngir a tteu hliahlia. Asinan a sur a tuah tthat hnu ah a vun vorh sal. A sur a dirh sal tikah a rit zet lala. A sur khat in nga an um ding ah a ruat. Asinan bawm tumpi khat zat hnawmhne pawl lawnglawng an rak si. A thin a heng zet thlang.

"Maw Hualvan! A innsang hman cawm thei ceu kei vek ngakaitu rethei par ahhin hamkha hlah aw!" tiah a au.

A ttong phah cun hnawmhne pawl cu a hlon. A sur ih tang mi hnawm borhbah pawl a thenfai ngah in a vei thumnak a vun vorh lala. Asinan lungto, cengkol phaw le ciarbek pawl lawng a awk lala. A bei a dong deuhthaw thlang.

Tawkfang ah a sur cu vei linak ah a vorh sal ttentto. A sur a dirh sal tikah a rit zet lala. Nga tampi an si ding ti ruat in harsa zet in a dir. Asinan nga an rak um lo. Rong eng a nei mi dar bel pakhat a rak si. Bel cu a sung ah thil pakhatkhat um vekin a rit. A zohfiang tikah suan bel sin thawn hnget zet ih sinh mi a si ih, a sin par ahcun tacik pakhat khen mi a um. Ngakaitu cun lunghmui zet in, "Thir thawi' bel tuahtu hnenah ka zuar ding ih, ka ngah mi paisa in sangvut awmang tawk ka lei ding," a ti. 

Bel cu a kil kip in a cekfel vivo. A awn rulro pei maw tiah a thing. Asinan ziang awn hman a um lo. Tacik um mi le a sin umdan a zoh tikah a sungah thil mankhung pakhatkhat a um tengteng ding tiah a ruat. Curuangah a nam a phorh ih harsa lemlo in a ong thei mai. Bel cu a linglet in a thle nan zianghman a rung suak lo. A mang a bang zet. A hmai ah ret in ngunngaih zet in a zoh rero. Cu lai ah bel sung ihsin meikhu sah ngaingai a hung suak ih ngakaitu cu dunglam ah kar hnihkhat a sip vukvi. Meikhu cu khawdur umnak tiang an hung kai, tipithuanthuam le a kap tlun ah an darh vivo ih, sumzing sahpi ah an cang. Ngakaitu cu mangbang hiahia in a um. Bel sung ihsin meikhu hmuahhmuah an suah thluh tikah meikhu cu an finkhawm aw vivo. A finkhawmawk sah bepbep ngah in Khuavang hmel a hun keng. Cui' khuavang cu mikei tumbik ih let hnih lai in a tum. Cuvek mikei ttihnung rapthlak a hmuh tikah ngakaitu cu tlan ciamco a duh. Asinan a ttihtuknak ah a tha a khur luar tuk ih kar khat hman a tthawn thei lo.

"Khuavang pawl ih Siangpahrang Ropi, ziangtik hman ah na thu ka dokalh nawn lo ding!" tiah Khuavang cu a raak humho.

Cumi a theih tikah ngakaitu cun thu sut ngamnak a hun nei.

"Khuavang ropi, na ttong mi cu ziang a si? Na thuhla le himi bel sungah ziangtin kharhkhum na tong timi in sim aw."

Cutikah Khuavang cun ngakaitu cu ro remrem in a zoh ih, "Ka lo thah hlan ahhin awkam mawi deuh in i be hnik," a ti.

Ngakaitu cun thinphang zet in, "Aizaw! Ziangahmaw i thah a ttulnak? Mitu rori ih ka lo luatter mi na si kha, na hngilh zo mawsi?" tiah a sut.

"Hngilh hlah. Asinan khami khan ka lo thahnak ding cu a dawnkham lo ding. Hamtthatnak pakhat lawng ka lo pe ding. Cumi cu na thihdan ding hril theinak a si."

"Asile, na parah ziang maw ka tuah?"

"Na parah thil dang cu ka tuah thei lo. A san le vang na theih duh asile ka thuanthu hi rak ngai aw. Khuavang pawl ih siangpahrang lakah ral ka rak tho. Cumi ruangih nunsimnak ah himi dar bel sungah i kharhkhum, suan ih tuah mi a sin parah a tacik a khen. A tacik ih um mi dawi huham ruangah a leng ah ka suak sal thei nawn lo. Cu thluh ah bel cu tipithuanthum ah a hlonter. Kharhkhum ka ton tir ahkhan, kum za a kim hlan ih i luattertu a um asile a thih hnu tiang ih mi neinung ah ka tuah ding tiah sia ka sam. Asinan kum za a liam ih i luattertu an um lo. A kum za hnihnak ahcun, i luattertu cu leitlun ih hlawnthil hmuahhmuah ka pe ding tiah sia ka sam sal. Asinan i luattertu an um cuang lo.

"A kum za thumnak ahcun i luattertu cu siangpahrang ah ka tuah ding, a kiangnai ah ka um ringring ding ih, ni tinte'n a saduhthah pathum ka kimter ringring ding ka ti sal. Asinan kum za thumnak khal cu a hlan kum za hnih vek thotho in a liam. A netnak ahcun kharhkhum ka tuar rei tuk ruangah ka thin a ling. Curuangah i luattertu a um asile ka that cih ding ih, a thihdan ding kalhmang hril theinak lawng ka pe ding tiah sia ka sam. Curuangah na hmuh vek hin, tuini ah i luatter ih, na thih duhdan kalhmang cu hril aw."

Ngakaitu cu a riah a se zet ih, "Ka lo luatter cu ka va vanse lawmam ve aw! Ka nun hi zuah hram ding ah ka lo dil a si," tiah zangfah a dil.

Khuavang cun, "Cumi cu a cang thei lo ka lo ti zo kha. Zamrangte'n hril aw, can na heuter lak men," a ti.

Cutikah ngakaitu cun khawkhannak thup a tuah thok.

"Ka thih tengteng a ttul a si khalle, ka thihdan ding kalhmang ka hril hlan ah, himi bel sungah na rak um taktak ti i simfiang ding in ttihzah upatnak thawn ka lo dil a si."

"Aw. Ka um si lawm."

"Ka zum thei lo lawlaw si. Himi bel sung ahhin na ke pakhat men hman a tlem lamlam lo ding. Na ruangpum tla cu ziangtin a tlem thei ding? Na tuah taktak lo ahcun ka zum thei zik lo."

Cutikah Khuavang cu meikha ah a thleng aw sal. A hmaisa ttum vekin tipithuanthum le a kap tlun ah a darh aw lawk ih, finkhawm aw sal in, bel sung ahcun nuamtete'n a lut vivo. A lenglam ah meikhu um nawn lo lawlaw tiang in a lut thluh. Cu thluh ah bel sung ihsin aw pakhat in, "Khah, mi zum thei lo ngakaitu, bel sung ah ka um hi. Tu teh na zum thlang maw?" a hun ti.

Ngakaitu cun a thusuhnak cu sawn lo in bel sin a la ih bel cu a sinh lohli.

"Maw Khuavang, tu ahcun ngaidam i dil awla, na thihdan ding kalhmang hril aw! Asinan, ka lo dirhsuahnak tipithuanthum sung ah lo hlon kir sehla a ttha sawn ding. Cu thluh ah tipi kap ahhin inn ka sak ding ih, mah luattertu that ding ih sia samtu nangmah vek Khuavang depde an lo awk ngahlonak ding hitawk hmun ih ra lo ding in ngakaitu hmuahhmuah ka sim ttheu hai ding."

Cumi a theih tikah Khuavang cu suak thei ding in a zuam ciamco. Asinan bel sin ih dawi huham a um ruangah a suak thei lo.

Cu thluh ah depdetnak thluak thawi' suah thei a tum.

Khuavang cun, "Bel sin na on ahcun laksawng ka lo pe ding," tiah ngakaitu cu a hun thlem.

Asinan ngakaitu cun, "Ka duh lo. Ka lo zum pang ahcun Greek siangpahrang pakhat in sibawi Douban a tidan vekin i tuah ve pang ka phang. Rak ngai awla cumi thuanthu cu ka lo sim ding," a ti ih thuanthu cu a sim thok.