Mu in Ar A Dehnak San

African Thuanthu Roling (15):

Mu in Ar A Dehnak San

Vei khat lai ah Mu ih fa a dam lo ih a bese zet. Mu ih naunu a ra ih Nubik Mu (Mother Kite) hnenah, "Na fa hrangah sibawi ttha ka thei. Hitawk ahcun Maimom hi sibawi ttha bik a si. Na hnen ih ra ding in ka va dil ding," a ti.

Nubik Mu ih naunu cu Maimom hnenah a va feh ih, "Mu ih fa a na bese zet. A hnenah va feh in a fa na va zoh sak thei pei maw?" tiah a va sut.

Maimom cun, "A ngah ko. Asinan feh ding ka ttih. Mu ih inn kiang ah Arpi a um ih i rak ei ding ka phang," a ti.

Nubik Mu ih naunu cun, "Ei lo ding. A lo ei lo ding ti ka thei fiang," a ti.

Curuangah Maimom cun a sii palang pawl cu zal sungah a thun ih Mu ih inn ah a va feh. Asinan Arpi cu a ttih. Curuangah ca pakhat a ngan ih a zal sung ahcun sii palang pawl thawn a ret tlang. A rei hlan ah Arpi cu a tong taktak ih thingkung phen ah a relh lohli. Asinan Arpi cun Maimom cu a rak hmuh thotho ruangah a cuk ih a fate pawl ih ei ding ah a pek.

Mu cun sibawi Maimom cu a rak hngak rero. A ra thlen thei lo ruangah va hawl ding in a suak ih sii palang pawl le cahnah a um mi zal cu a va hmu.

Ca ahcun hitin a rak ngan aw: "Mu hnenah. Na inn lam ka ra pan lai ah Arpi ka tong ih i ei."

Mu cu a fa no hnenah a zuang kir sal. Asinan a fa cu a thi. Curuangah Mu cun phuba la ding in arte pawl a deh thok. Tuini tiang in Mu cun arte pawl a thiar ih a ei ttheu.

Nang khal in arpi khi va kai awla, "Kei ka si lo! Kei ka si lo!" tiah a au ding. A rel duh mi cu, "Maimom ka ei lo! Kei ka si lo!" timi a si.

Hram: Why The Kite Eats Chickens? – African Folktale.