Siangpahrang Sindbad le A Muvanlai

Arabian Zan 1001:

(7) Siangpahrang Sindbad le A Muvanlai

Vei khat lai ah Persia Siangpahrang Sindbad timi a rak um. Siangpahrang Sindbad cu ramtawih paih zet a si ih ramtawih ih a hruai ttheu mi muvanlai pakhat a nei. A muvanlai cu a duh zet ih sun khal ah, zan khal ah a kut parah a ret ringring. Ram a tawih tinte'n muvanlai cu a hruai ttheu. A muvanlai a ti a hal can ih a in ding ah sui no pakhat sungah tidai a ret ih muvanlai ih hngawng ah a orhter. Ni khat cu a muvanlai kilkhawitu a ra ih, "Siangpahrang bawipa, tu hi ramtawihnak ding ah can remcang zet a si," tiah a ra sim.

Curuangah siangpahrang cun ramtawi ding in thupek a suah. A muvanlai cu a ngel ah futer phah in a poksuak ih, a khawnbawl pawl le siahhlawh pawl in an thlun. An feh vivo ih horkuam pakhat ah an va thleng. Cutawk ahcun sa hot ding ah a kulh aw kual in sakhan an tuah. Rei lo te ah an sakhan sung ahcun zathar (sathar) pakhat a rung lut.

Cutikah siangpahrang cun, "A lu tlun ihsi himi zathar a khirsuaktertu cu ka that ding," a ti. Cutin an kulh mi zathar cu naih ding in an zip vivo. Cutikah zathar cu siangpahrang hmai ah a va tlan ih a va ding thutthi. Cu thluh in a ke hmailam cu a awm ah ret in, leilung vun hnam ding vekin a um. Cumi a hmuh tikah siangpahrang khal cu a vung kun ve. Cuvete'n zathar cu siangpahrang ih lu tlun ihsin a khir ih nelrawn ah a liam hlo.

Siangpahrang cun a milai pawl pakhat le pakhat lu sut aw phah, mit sinh aw phah ih an um rero kha a hmu. Cutikah a khawnbawlpi cu, "Khawnbawlpi, ka milai pawl hin ziang an rel?" tiah a sut. A khawnbawlpi cun, "A lu tlun ihsi zathar khirsuaktertu cu ka that ding ti ih na hro mi thuhla an rel," tiah a sim sal.

Cutikah siangpahrang cun, "Ka lu a dam sung ahcun, ka dawithlun ding ih, ka rak phur sal ding!" a ti. Curuangah zathar ih neh cu a zawt vivo ih tlang par ih a umnak puk a va thleng. Cutikah siangpahrang cun a muvanlai a thlah. Muvanlai cu zathar umnak ah a va zam ih a ke tin thawn zathar ih mit cu a va sirh kuai ih, zathar cu a lung a aa thluh. Cutikah siangpahrang cun a talhthum thawn zathar cu a den that. A va pan ih a hrok a at, a vun a hawk hnu ah a rangkung dunglam ah a thlaih.

Cumi can ahcun sundir a si. An umnak hmun cu nelrawn ramcar a si fawn ruangah siangpahrang le a rang cu an ti a hal zet. Curuangah tidai hawl in a vak vivo ih a netnak ahcun a hnge pawl ihsin siti for vekin nuamtete'n tidai a rung for keuhko mi thingkung pakhat a va hmu. Siangpahrang cun a kut ah thir kut-hruh a hruh ruangah a kut thawn tidai cu a dong thei lo. Curuangah muvanlai hngawng ih a thlaih mi no cu a la ih tidai a don hnu ah a in tum. Asinan muvanlai in no cu a sirhsak ih tidai cu a bung thluh.

Siangpahrang cun a muvanlai cu a ti a hal a si a zum. Curuangah tidai a thun sal ih muvanlai ih hmai ah a ret. Asinan a rak sirh bung thotho. Cutikah siangpahrang cu muvanlai parah a hngir a tteu thlang. Asinan no cun tidai cu a dong sal ih rang hmai ah a ret. Muvanlai cun a thla thawn a sirh bung thotho.

Cutikah siangpahrang cun, "Na va mak lawmam ve! Tlunzuang le arva lakih mi siatsuahtu bik na si hi! Nangmah na in duh fawn lo, ka in na duh fawn lo, rang ih in na duh cuang fawn lo!," ti phah in a nam a phorh ih muvanlai ih thla pawl cu a sat tansak. Cuti cing khal in muvanlai cun tlunlam a hun zoh ih, "Thingkung parah ziang a um timi hun zoh aw," ti si awm tak in theihternak a tuah. Siangpahrang cun tlunlam a hun zoh tikah thingkung par ahcun tur nei rul tampi an rak um. Tidai ih a rak ruat mi cu rul pawl ih tur a for rero mi a rak si. Cutikah a muvanlai ih thla a rak sat tan cu a sir aw tuk ih mitthli tla phah in a riahbuk ah a tlung. A riahbuk a thlen tikah zathar cu rawlsuangtu hnenah rawh ding in a pe.

Cu thluh ah a tohkham ah a to. Muvanlai cu a ngel parah a um lai. Asinan rei lo te ah a thaw netabik a thaw ih a nunnak a cem. Cutikah siangpahrang cu riahse zet in a ttap rero. Thihnak ihsi amah runsuaktu muvanlai a thah pang ruangah riahsia in a um ringring ih a sirawknak khal a reh thei nawn lo.

"Himi hi Siangpahrang Sindbad ih thuanthu a si khawnbawlpi. Na sungah nahsiknak a lut ruangah sibawipa that ding ah i fial. Asinan sibawipa ka thah ahcun Siangpahrang Sindbad vekin nasate'n ka sir aw ding."

Cutikah khawnbawlpi cun, "Maw Siangpahrang bawipa, i tuahmawh dahlotu sibawipa ih thihnak cu ziangtin ka duh thei ding? Himi thil hi nangmah ka lo ruat ruangah le thuhla dik na theih theinak ding ih ka tuah mi a si. Hivek ih ralrinnak ka lo pek lo ahcun a bawipa siangpahrang ih fapa thihnak hmun ih thlentertu Khawnbawlpi pakhat vekin ka thi pang thei," tiah a sim.

Cutikah siangpahrang cun, "Cumi cu ziangtinmaw?" tiah a sut ih, khawnbawlpi cun, "Rak ngai hram aw, siangpahrang bawipa,............" ti in Siangpahrang Fapa le Miluket thuanthu a sim thok.