Hminsinmi Duhdawtnak

Hminsinmi Duhdawtnak

Tuini ah a tlangvalpa thawn kut an sih. Kutsih ttiak ah a nu in dollar thawng khat a um mi bank cabu thar te a pe. A pek phah ah, "Ka fanu duat, himi bank cabu hi la awla, nan neihawk hnu ih nan nun hminsinnak pakhat ah hmang aw. Nan nupa nun ih thil pakhatkhat nan ton tikah bank cabu ah paisa tthenkhat thun belh ttheu aw. Paisa zat sir ah ziangruangah nan thun timi kha ngan aw. Nan ton mi cu cinken tlak a si sinsin rual in paisa tla tam deuh in thun belh a theih. Tuini ah nangmai hrangah dollar thawng khat ka lo thunsak. A dang cu na pasal thawn sutron aw uh. Kum tampi a liam hnu ih bank cabu nan zoh sal tikah nan nupa ziangtluk in nan nuam aw timi nan thei sal ding," tiah a cah.

Inn a thlen tikah cumi thuhla cu a pasal a sim. An pahnih in ruahnak ttha zet a si tiah an ruat. Paisa thun belh ding khal an hngakhlap zet. Can tawkfang a rei tikah an bank cabu ahcun hitin a rung ngan aw hai.

February 7, $ 100, kan neihawk hnu ih ka pasal suahcam hmaisabik
March 1, $ 300, nupi ih thlahlawh a pung
March 20, $ 200, Bali tikulh ah cawlh hmang in kan feh
April 15, $ 2000, nupi in fa a von
June 1, $ 1000, pasal dinhmun kai sang tivek in...........

Asinan kum tampi a liam vivo tikah thuhla cephnep tete khal ah an to aw ttheu. An be aw tam nawn lo. Leitlun ih mi ngei um bik ka rak nei ngah pang a si hi tiah an pahnih in an sir aw veve. An karlak ah ngainatawknak a um nawn lo.

Ni khat cu a nupi in a nui' hnenah, "Nunu, kan um tlang thei nawn lo. Tthen aw ding in kan ruat fel zo. Hivek minung hi ziangtin ka rak nei ngah ti khal a ngaihnak ka thei lo," tiah a sim. Cutikah a nu in, "Himi cu thuhla tenau a si. Na tuar thei nawn lo ahcun na duhdan in tuah ko aw. Asinan na tuah hlan ah thil pakhat lo tuahter ka duh. Nan neihawk ni ih ka lo pek mi bank cabu kha na mang lai maw? A hmaisa ah khami paisa kha hmang thluh ta aw. Hivek neihawknak ttha lo hrangah cinken ding thil zianghman um nawn hlah seh," tiah a sim.

A fanu in a nu ih sim mi cu a lung a kim. Bank ah a feh ih bank account phiattu ding minung pawl lakah a va tlar aw ve. A hngak phah ah bank cabu sungih hminsinnak pawl cu a zoh. Cutikah hlan lai ih an nomnak hmuahhmuah kha a thinlung ah an ra thleng sal. A mit ihsin mitthli an luang. Curuangah bank ihsin inn ah a tlung sal. Inn a thlen tikah bank cabu cu a pasal a pe ih, an tthenawk hlan ah paisa pawl hmang thluh ding in a sim.

A thaisun ah a pasal cu bank ah a va feh ih bank account phiattu ding minung pawl lakah a va tlar aw ve. A hngak phah ah bank account sungih hminsinnak pawl a siar ngah ve. A siar non sal rero. Cutikah hlan lai ih an nomnak pawl kha a thinlung sungah an ra kir sal thluh. A mit ihsin mitthli an luang ih, inn ah a tlung sal.

Bank cabu cu a nupi a pe. A nupi in bank cabu a zoh tikah $ 5,000 thun bet mi a hmu. Paisa zat sir ahcun, "Himi kum pawl ah ziangtluk in ka lo duhdawt ti ka theihsuah ni a si," timi a ngan aw.

Bank cabu cu hmun himnak ah an ret sal ih, an pahnih cu pom aw in an ttap.

Credit: Nay Linn Aung