Thihnak Lo Cun In Tthen Hlah Seh

Thihnak Lo Cun In Tthen Hlah Seh

Cumi zan inn ah ka tlung ih ka nupi in zanriah i tuahsak lai ah, a kut kai in, thu lo sim ding ka nei ka ti. Anih khal a to ih, daite'n rawl a ei. A mit ah tuarnatnak an um ti ka hmu. Curuangah ka kaa ziangtin ka ang thok ding ti ka thei lo lawk. Asinan ka ruat mi cu ka theihter a ttul fawn. Tthenawk ka duh. Curuangah ka thupi cu ka rel thok.

Ka ttongkam in a hnoksak hran lo a bang. Awkam nemte'n ziangruangah tthenawk ka duh tiah i sut sawn riangri. Asinan i sut mi cu ka sang lo. Cutikah a thin a heng. A funghai (chopstick) a hlon vurvo ih, mipa na si lo tiah i auh. Cumi zan cu kan be aw nawn lo. Anih cu a ttap rero. Kan neihawknak ah ziang a thleng ti theihsuah a duh ti ka thei. Asinan a thin diriam ding tlak in ka sim thiam lo. Ziangahtile ka thinlung cu Jane hnen lawng ah a um thlang. Anih cu ka duhdawt nawn lo. Ka zangfah sawn men!

Sualmawhnak nei zet thinlung keng cing in, tthenawknak ding lungkimnak ca cu ka tuah ta tho. Tthenawknak ca ahcun anih in kan inn, kan mawttaw le ka company man ih zatek 30% co ding in ka tuah. Cui' ca cu a vun zoh duak hnu ah cip seksek in a thlek. A nunnak ih kum hra sung keimah thawn a hmangtu nunau cu a hmel ka theih dah lo mi minung ah a cang. A can, thazang le neih mi thil pawl a lakih ka liamter sak ruangah poi ka ti sak zet. Asinan Jane ka duhdawt tuk zo ruangah ka thu cu ka hnuk kir sal thei nawn lo. A netnak ahcun ka hmai ah ring zet in a ttap. Asinan cutin a um ding ti ka rak beisei cia mi a si ko. A ttahnak cu ka thinlung zangkhaitertu ci khat a si sawn lam. Zarh tampi sung ka thinlung buaitertu tthenawknak ding thuhla cu tu ahcun a hnget in a fiangfel sinsin thlang.

A thaisun cu tlai zet ah inn ka tlung. Asinan cabuai ah ziangmi thuhla simaw a ngan rero lai ti ka hmu. Zanriah ka ei hrih lo nan, ihkhun ka pan ih thaw zet in ka itthat cih. Ziangahtile sunvute'n Jane thawn kan nuam aw. Ka hung tthanghoi tik khal ah cabuai ahcun ca a rak ngan rero lai. Asinan ka poisa lo ih, ka sir her in ka itthat sal men.

A thaizing ah tthenawknak hrangih a duhdan cu i pe. Ka hnen ihsin zianghman ngah a duh lo. Asinan tthenawk ding cu thla khat hnu ah siter a duh. Cumi thla khat sung ahcun nun zarante'n kan nun ding khal i dil. Phuahlam a neih mi cu thil zaran te a si. Kan fapa in thla khat kim ah camibuai a tuah ding ruangah, kan tthenawknak in a camibuai a hnoksak ding a duh lo.

Cumi cu ka hrang ah lungkimpi theih a si ve ko. Asinan dil bet mi i nei. Kan neihawk ni ah ihkhun ihsi ka cawisuah vekih cawisuak ttheu ding in i dil. Thla khat sung cu zing tinte'n ihkhun pindan ihsin inn hmailam sangka tiang zing tinte'n cawisuah a duh. A thluak a buai zo ah ka ruat. Asinan i dil mi thil buaithlak zet cu kan tthenawk theinak ding a si ruangah ka lungkimpi ve.

Jane hnenah ka nupi in tthenawk a duhdan cu ka sim. Cutikah ring zet in a hni ih, sullam a va nei lo ve a ti. Ka nupi cun ziangvek in a thluak hmang khal sehla, tthen a si thotho ding si khawh, tiah nautat zet in a rel.

Tthenawk ka duh thu fiangtei' ka rel hnu cun ka nupi thawn kan taksa a dai aw nawn lo. Curuangah a ni hmaisabik ih ka cawi tikah umtudan kan thiam hrot lo. Kan fapa cun kan dung ihsin a za a rak beng ih, "Papa in nunu a cawi," tiah a au. Kan fapa ih ttongkam cun ka thin a nater. Ihkhun pindan ihsin mileng pindan ah, cu thluh in sangka ah, ka nupi cu cawi phah in meter hra lenglo ka feh. Ka nupi cun a mit a sing ih, kan tthenawk ding thu hi kan fapa sim lo ding ah dimte'n i sim. Riahsia deuh phah in, ka lu ka sut. Sangka lenglam kan thlen in ka tthum. Cu thluh ah a hnattuannak ih feh ding in bus a va hngak.  Kei cu zung ah kan mawttaw thawn ka feh.

A ni hnihnak ahcun kan cangvaihdan a tluang deuh. Ka ttang ah a zau. A hnipuan ih zihmui rim ka thei. Ka nupi hi tthatei' ka zoh mumal lonak a rei zet thlang ti ka vun mangsuak. A no nawn lo ti khal ka hmu. A hmai ah vun kir rin fiang zet in an um thlang. A sam khal an rawng a uk thlang. Kan neihawknak in a taksa ah lai an rel zet. A parih ka tuah mi hi ziang a si thlang tiah malte sung ka vun ruat.

A ni linak ih ka cawi tikah, kan neivaiawknak a ra kir sal thlang in ka thei. Anih hi a dam sung ih kum hra rori ka hrangih a nunnak petu nunau a si. A ni nganak le ni ruknak ahcun kan naivaiawknak cu a tthang sinsin in ka thei. Cumi cu Jane ka sim lo. Thla khat a kim zik zawng ahcun cawisuah cu a ol sinsin. Ni tin ih ka tuah ttheu mi a si ruangah ka thazang in a neh vivo tla a si thei men.

Zing khat cu hnipuan hruh ding a hawl rero. Hnipuan tthenkhat a vun hruh nan a remcang mi a hmu thei lo. Cu thluh ah a thawpi thaw phah in, ka hnipuan pawl an tum sinsin thluh a si hi a ti. Cutikah a ttawl nasa tuk thlang ti ka theisuak. Cawi a ol sinsin ka tinak san cu a rak ttawl vivo ruangah a si. Cumi cun ka thin a sun zet. A thinlung ah tuarnatnak le ningnatnak tam tuk a rak phum aw. Anhai zet in ka va pan ih a lu ka va tham.

Cumi lai ah kan fapa a ra ih, "Papa, nunu cawi can a si thlang," a ra ti. Kan fapa hrang ahcun, a papa in a nunu a cawi lai a hmuh mi cu a nun hrangih thil thupi bik pakhat ah a cang thlang. Ka nupi cun kan fapa cu a hnenah ra ding in a za a zap ih, hnget zet in a pom. Cumi cu ka zoh duh lo. Ziangahtile minute netabik thlen hnu ah ka thinlung ka thleng sal pang ka phang. Cu thluh in ka nupi cu ka cawi ih ihnak pindan ihsin, mileng pindan ah ka suahpi. A kut in ka hngawng ah dimte'n i kuah. A taksa cu hnget zet in ka pom. Kan neihawk ni vek a si sal in ka thei.

Asinan a taksa khing a zang tuk mi cun ka riah a seter. A ni netabik ih ka cawi tikah ka ke ka kar thei mumal lo. Kan fapa cu tlawng a feh zo. Hnget zet ih pom phah in, kan nun hin naivaiawknak a rak nei nawn lo timi ka rak theih ngah lo thu ka sim. Zung ah ka feh ih ka thlen vete'n mawttaw sangka khal hren ta lo in ka ttum. Ziangahtile nuamnaitei' ka cangvaih asile ka thinlung ka thleng ka phang. Kailawn ah ka kai so lohli. Jane in sangka i ra on tikah, "Poi ka ti zet, Jane, ka nupi thawn tthenawk ka duh nawn lo," ka ti.

Jane cun mangbang zet in i zoh ih, ka cal a run tham. "Na dam lo mawsi?" tiah i sut. Ka cal ih a kut cu ka tthawnsak ih, "Poi ka ti zet, Jane. Ka nupi ka tthen lo ding. Kan duhdawtawk nawn lo ruangah si lo in, kan nun ih thil pawl cipciarte'n kan rak ruat lo ruangah kan neihawknak hi nin a rak um sawn men a si ding. Tu ahcun kan neihawk ni ih ka cawi vek in, thihnak ih in tthen tiang ka pom in ka cawi ringring ding ti ka theisuak zo," tiah ka sim.

Jane cu itthat lai ih hung tthang thutthi vek in a um. Ka biang ah awn ring zet in i beng ih, sangka a khar vukvi hnu ah, a ttap ciamco. Kei cu hnuai ah ka ttum ih mawttaw thawn ka tlan. Lamzin ih pangpar dawr ah, ka nupi hrang ding pangpar tom khat ka cah. A zuartu fala in card parah ziang ka ngan ding ti i sut tikah hni siamsi phah in, "Thihnak ih in tthen tiang in zing tinte'n ka lo cawi ringring ding," timi ka ngan.

Cumi ni siimlam ah pangpar keng phah ih inn ka thlen tikah, mithmai pante'n ka um ih, inn tlunta ah ka hung kai. Asinan ka nupi cu ihkhun ah a rak thi zo ti ka hung hmu.

Ka nupi in cancer nat a tuarnak hi thla tampi a kim zo nan, Jane ka buaipi tuk ruangah ka rak theithiam lo. A rei hlan ah a thi ding ti a thei ih, kan tthenawk buai ahcun, ka fapa in a selam ih i hmuh ding ruangah, cumi dinhmun ihsin i runsuah a rak duh. Cuvek ih a rak tuah ruangah, a si lo bik ah, kan fapa ih hmuhdan ahcun, pasal duhnungza pakhat ka si phah ngai.

Hram: Ngantu theih lo mi "Until Death Do Us Apart."