Pathian ih Cakuat

Pathian ih Cakuat

Ka fa,

Nang cun i thei lo men thei, asinan kei cun na thuhla ziangkim ka thei thluh (Saam 139:1). Na to can le na thawh can ka thei (Saam 139:2). Na tuah mi hmuahhmuah ka thei thluh (Saam 139:3). Na lu parih samphang hman ka siar thluh (Matt. 10:29-31), ziangahtile ka pianhmang keng ih sersiam mi na si (Seemtirnak 1:27). Ka sungah na nung, na cangvai ih khua na sa (Tirhthlah 17:28), ziangahtile ka tefa na si (Tirhthlah 17:28).

Na semsuah hlan ihsin ka lo thei zo (Jeremiah 1:4-5). Thil ka sersiam hlan ihsin ka lo hril zo (Efesa 1:11-12).  A ra cang pang men mi na si lo; na ni tin hman dan hmuahhmuah tiang in ka cabu ah ngankhum in an um (Saam 139:15-16). Na piansuah ding can ciah le na suahnak ding hmun ka bikhiah cia (Tirhthlah 17:26). Ttih um zet le danglam zet ih tuah mi na si (Saam 139:14). Na nui' pum sungah ka lo remkhawm mi na si (Saam 139:13) ih, na suah ding ni ah ka lo suahter (Saam 71:6).

I theilotu pawl in dik lo zet in ka sinak an rel (John 8:41-44).  A hlatnak ih um mi le thinheng mi ka si lo, duhdawtnak phuansuahnak tlamtling sawn ka si (1 John 4:16) ih, na parih ka duhdawtnak burh ding hi ka duh mi a si (1 John 3:1). Leitlun ih na pa in a tuah thei mi hnakih tam ka lo pe (Matthai 7:1), ziangahtile kei cu pa tlamtling ka si (Matthai 5:48). Na ngah mi laksawng ttha tinkim hi ka kut ihsin a ra mi an si (James 1:17), ziangahtile a lo somdawltu, le na ttulsam mi hmuahhmuah lo petu ka si (Matthai 6:31-33).

Na hmailam can hrangih ka khawkhannak cu ruahsannak thawn a khat ringring (Jeremiah 29:11), ziangahtile kumkhaw daih duhdawtnak thawn ka lo duhdawt (Jeremiah 31:3). Nangmah ka lo ruatnak cu tipithuanthum kap ih vunnel vekin siar cawk lo a si (Saam 139:17-18) ih, na parah lungawi in hla ka sak (Zefaniah 3:17). Na parih thil ttha tuah hi ka bansan dah lo ding (Jeremiah 32:40), ziangahtile ka hril hleice mi na si (Suahlannak 19:5). Ka thinlung le ruahnak zate'n nangmah lo dinsuak ka duh (Jeremiah 32:41).

Thil ropi le maksak pawl lo hmuhter ka duh (Jeremiah 33:3). Na thinlung zatei' i hawl ahcun, i tong ngah ding (Daan Peksalnak 4:29). Ka parah na lungawinak hawl awla, na lungthlitum ka lo pe ding (Saam 37:4), ziangahtile cuvek lungthlitum pawl a petu cu keimah ka si (Filippi 2:13).

Na ruah ban mi hnakih tam in na hrangah ka tuah thei (Efesa 3:20), ziangahtile thazang lo petu ropi bik ka si (2 Thesalon 2:16-17).  Na ton mi harsat buainak hmuahhmuah ah a lo hnemtu na pa khal ka si (2 Korin 1:3-4). Na riahsiat can ah na kiangnai ah ka um (Saam 34:18). Tuukhaltu in tuu fano a cawi bang in, ka thinlung kiangte ah ka lo cawi a si (Isaiah 40:11).

Ni khat ni ahcun, na mit ih mitthli hmuahhmuah ka lo hnul sak ding (Thuphuan 21:3-4) ih, hi leitlun ih na tuar mi natnak hmuahhmuah ka hloter ding (Thuphuan 21:3-4). Na pa ka si ih, ka fapa Jesuh ka duhdawt tluk in ka lo duhdawt ve (John 17:26). Jesuh cu ka sinak ciahciah tarlangnak a si (Hebru 1:3). Nangmah dodaltu si lo in, nangmai' hrang sawn ah ka si ti langter ding ah (Rom 8:31), le na sualnak pawl ka siar lo a si ti lo sim ding ah a ra a si (2 Korin 5:18-19).

Rualremsalnak na ngah theinak ding ah a thi (2 Korin 5:18-19). A thihnak hi ka lo duhdawtnak phuansuahnak famkim a si (1 John 4:10). Na duhdawtnak ka ngah theinak ding ah, ka duhdawt mi hmuahhmuah ka hlan thluh (Rom 8:31-32). Ka fapa in a lo pek mi laksawng na cohlan ahcun, i cohlang tinak a si (1 John 2:23) ih, ka lo duhdawtnak ihsin zianghman in a lo tthentthek nawn lo ding (Roman 8:38-39).

Inn ah ra tlung awla, vancungram in a hmuh dah mi puai ropi bik thawn ka lo hmuak ding (Luka 15:7). Na pa ka rak si dah ringring vekin, lehhnu khal ah na pa ka si ringring ding (Efesa 3:14-15).

Ka lo sut duh mi cu, ka fa si na duh maw timi a si (John 1:1-13).

Ka lo hngak lai (Luka 15:11-32).

Duhdawtnak thawn,
Na pa, Ziangkimtithei Pathian

Hram: God's Letter - http://varietyreading.carlsguides.com/christian-stories/call.php

Posted via Blogaway