Thiam Cengmang ah Thiam Lawlaw

Thiam Cengmang ah Thiam Lawlaw

John Aikin (1747-1822) ih "Fables from Boccaaccio and Chaucer" (Boccaaccio le Chaucer ih Thuanthufim pawl) timi cabu sungah thiamtlinnak thawn a pehpar mi thuanthu mawi zet pakhat a um. Mi tampi cun kan thei zo tla a si thei.

Rampai hngawng-sau pakhat hi thu ruat phah in hrampi hring a cuk rero ih, a kiangah hrampi a rak piat vetu rang pakhat thawn an tong aw. Cutikah rampai hngawng-sau cun, "Nang hnakih  rannung cungcuang le famkim ka si hrimhrim. Ziangahtile na tuah thei mi hmuahhmuah cu thil pakhat lawng ah an lut thluh. Kei cu nangmah vekin leilung parah ka feh thei, thli lakih zuan theinak ding thla ka nei fawn. Cu lawng si lo in, a nuam zet mi cu, tili sungah ka lek thei ih, tidai ah ka tha ka hringter thei. Kei cun vate, nga le ke li nei rannung pawl ih huham phunphun ka nei thluh," tiah rang cu a nautat.

Cutikah rang cun ngainep zet in, "Nang cun thil pathum tuah theinak na ngah timi cu a dik ko. Asinan cumi pathum ah cungcuang zet ih tuah thei mi na nei lo. Na zuang thei ko, asinan na khing a rit ih na thlazap khal a buai hnuaphno. Curuangah vanva le peleng pawl vekin sangpi tiang na zuang thei lo. Tidai na leuh thei ko, asinan nga pawl vekin a sungah na nung thei lo ih, tidai sungah rawl na hawl thei lo. Tluang zuahzo in tisuar lakah na tawlh thei fawn lo. Cun, leilung parah na feh thei, asilole, na pai cuapco thei. Na ke hlaipi le na hngawng saupi thawn na talbuai ih na kiangih ra fehtu pohpoh na rak siksik kual. A lo hmutu pohpoh ih huat ding in nangmahte'n na tuah aw. Kei cu leilung par lawng ih feh thei  ka si ti ka cohlang ko. Asinan zah-um zet in ka feh thei. Ka ruangrai a mawi, ka taksa a cungcuang, ka thazang a ropi. Zamrang zet in ka tlan thei. Ziangkim tuah thei rampai hngawng-sau si hnak cun, thil pakhat lawng tuah thei cing ih ngaisan hlawh mi si ka duh sawn," tiah a ti.

Sirhsan: Robert Greene, 48 Laws of Power, New York: Penguin Books.