Duhamnak Tifinriat

Duhamnak Tifinriat

Mifim pakhat hi siangpahrang umnak khawlipi sungih lamzin ah a feh rero. A feh lai ahcun lamzin ah sui tangka pia khat a sar. Mifim cu a nun tluangtlam ih a di a riam cia ruangah cui’ sui tangka pia khat cu hman ttulnak a nei lo. Curuangah a ttultu taktak hnenih pe ding in a ruat. Sunvute’n lamzin ah a vak ih a ttultu taktak a hawl nan a hmu thei lo. A netnak ahcun cawlhnak hmun ah a thleng ih, a zan cu cutawk ah a riak.

A thaizing ah a tho ih, ni khat hrangih a tuahttuan a ttul mi pawl a ttuan. Cu lai ah siangpahrang cu ram dang pakhat do ding in a ralkap pawl thawn an feh rero ti a hmu. Anmah zoh ih dingtu mifim a hmuh tikah siangpahrang cun a ralkap pawl cu cawl lawk ding in thu a pe.

Cule mifim cu va pan in, “Mifim Ropi, ka ram a kauh vivo theinak ding ah ram dang pakhat do ding in ka feh tum. Curuangah hlawhtling ding in thlawsuah i pe hram aw,” a ti.

Mifim cun thu a ruat hnu ah, a sui tangka pia khat cu siangpahrang a pe. Siangpahrang cun mak a ti zet ih a thinlung a hnok. Ngaih khal a ngaih lo. Ziangahtile siangpahrang lian bik a si ruangah sui tangka pia khat cu a hrangah a ttul lo mi a si. Asinan mifim cu upatnak thawn, “Himi sui tangka pia khat hi ziangruangah i pe?” tiah a sut.

Mifim cun, “Siangpahrang Ropi! Mizansun ah na khawlipi sung lamzin ih ka veivahnak ah himi sui tangka pia khat hi ka sar. Asinan kei cun hman ttulnak ka nei lo. Curuangah a ttul taktaktu hnenah pe ding in ka ruatcat. Siimlam tiang in na khawlipi ih lamzin tinkim ah veivak in cuvek minung cu ka hawl nan pakhat hman ka hmu lo. Mi hmuahhmuah in nun lungawi an nei. An neih mi ah an di a riam hai a bang. Curuangah himi sui tangka pia khat pek ding mi ka hawl hmu lo. Asinan tuini ahcun, himi rampi ih siangpahrang cu a neih cia mi ah diriam lo in, a dang neih bet duhnak a nei ti ka hmu. Curuangah himi sui tangka pia khat hi na ttul tiah ka ruat,” ti’n a sim.

Siangpahrang cun a sualmawhnak a thei ih, ral a do tum mi cu a tthulh sal.

Kannnih khal in kan neih tawk ih lungawi thiam ding in kan zir a ttul ve. Kan neih cia mi hnak ih tam le ttha neih bet cu kan duh cio. Asinan cumi ngah duh tuk ruangah, na neih cia mi pawl lungawitei’ hman ding can kha hlohter hlah. Na neih mi vek a nei ve lotu an um tla a si thei ih, na neih mi hnakih tampi a neitu khal an um thei. Midang thawn khaikhin aw ringring hlah, nangmah ah lungawi tum awla, thinlung le taksa le thlarau ih a harhdam mi nun neih tum sawn aw.

Sirhsan: Theih lo mi cangantu ih “The Needy King and the Sage.”