Tlunlam Zoh Aw

Tlunlam Zoh Aw

Buzzard timi mulukolh ci khat khi kil li nei bawmte pakhat sungah ret awla, bawmte ih tlunlam cu a ong aw in ret aw. Buzzard mulukolh cu van sang ih zuang rero thei asinan, cuvek hmun ih na ret ahcun suahnak ding nei lo thawngtla ah a cang ding. Ziangahtile buzzard mulukolh hin a zuan thok ding ahkhin, leilung ah pii 10 lole 12 a tlan vurvo ta hnu lawng ah a zuangsuak ttheu. Tlan vurvonak ding a um lo ruangah, zuansuah khal a tum hman a tum lo ding. Ziangahtile zuansuah hlan ih tlan vurvo ta kha a zongsang mi a si ih, cumi lawng ah zuan a theih tiah a nun pumhlum in a rak ruat zo. Cuti’n tlunkhuh a nei lo mi bawm sungah a dam sungin a um lanta ding.

Zan khawthim lakah cak zurzo ih a zuang thei mi palap khal khi, a zawn ciahciah (level place) in a zuangsuak thei lo. Zial asilole hmun rawn ah ret awla, har ti zet in a talbuai rero ding. A umnak hnakih niam ih khir thlak theinak ding zawn a thlen lawng ah thli lakah a vorh aw ding ih a zuang thei ding. A zuan cengmang cun cak zurzo in a zuang lala fawn ding.

Bumblebee timi khuai khal khi rialno sungah thla awla, na laksuah lo ahcun, a thih tiang in a tang lanta ding. A tlunlam ah suahnak ding a um ti kha a hmu dah lo. A sir zawn ah suah theinak a um maw ti kha a hawl rero men. A thih tiang in thil um lo cu a hawl rero ding.

Minung lak khal ah, buzzard mulukolh, palap le bumblebee khuai vek tampi kan um. An ton mi buainak kha zuamnak nasa zet thawn cinfel an tum, luatsuah an tum ttheu nan, a hmaisa ah ziang tuah a ttul, luatsuahnak khui ah a um, ziangtin luat theih a si timi, hmu lo in nunnak cem tiang ih talbuai lanta an um ttheu.

Lamzin a pit thluh timi a um lo. Vei tampi ahcun luatnak lamzin cu tlunlam ah a um ttheu. Tlunlam hun zoh awla, Bawipa ah na thinlung hngat awla, luatsuahnak cu na hmu ding.

Sirhsan: Ngantu theih lo mi “The Buzzard, The Bat and The Bumblebee.”