Mangbangza Mitkharh

Mangbangza Mitkharh

Ka nui’ pa, ka pu, hi thingthiam (carpenter) a si. Ni khat cu an kawhhran in Tuluk ram ih hngakttah tlawng ah kuat an tum mi hnipuan pawl retnak ding ah thingkuang pawl a tuah. Inn a tlun zin ah, a mitkharh la ding in a zalte a vun pur nan a rak um lo. A tannak ding a vun ruat tikah ziang a cang ti a thei sal. A theih lo sungah a mitkharh cu a zalte ihsin thingkuang pakhat sungah a rak tla. Cui’ thingkuang cu a khen pit zo fawn. A mitkharh thar cu Tuluk ram ah a thleng ding tinak ah a cang.

Cumi can cu Amerikan ih Tlaksiatnak Ropi (Great Depression) a luar laifang a si ih, ka pu cun fa paruk a nei fawn. A mitkharh cu cumi zing ah $20 ih a lei thar mi a si. Mitkharh dang lei a ttul ding thu a vun ruat tikah a lung a ngai zet. Amahte’n ninghnang zet in, “A dikdawh lo. Na hnattuannak ah ka thei tawk in can le paisa hmang ding ah ka rinum ringring. Tu ahcun hivek ka tong,” tiah Pathian hnenah a phunzai.

Thla tampi a liam hnu ah Tuluk ram ih hngakttah tlawng director cu Amerikan ah cawlh can ngah in a ra tlung. Tuluk ram ih Pathian hna an ttuannak ah a rak bawmtu kawhhran hmuahhmuah hnenah tlawn a duh. Cuti’n Nipini vei khat ah Chicago khawpi ih ka pu tei’ kawhhran fatakte ahcun thu a ra sim.

Missionary cun hngakttah tlawng somdawlnak ih zumnak thawn an ttan ruangah mipi hnenah lungawithu a sim. Cu thluh ah, “Cumi hmuahhmuah lakah, kan dung kum ih in kuat mi mitkharh thu ahkhan lungawithu lo sim tengteng ka duh. Nan theih vekin, communist pawl in hngakttah tlawng an ra cek ih, ziangkim an ra siatsuah thluh. Ka mitkharh khal an siatsuah. Ka bei a dong zet. A leinak ding paisa nei khal sehla, cuvek mitkharh lei ding cu a um lo hrimhrim.

Khua ka hmuh tthat thei lo ruangah, ni tinte’n ka lu a na ringring ih, ka hnattuanpi pawl thawn cumi hrangah nasa zet in thla kan cam. Tawkfang ah nan thingkuang pawl an ra thleng. Ka hnattuantu in a sin a vun on tikah, tluntabik ah mitkharh a rak um kha an hmu.”

Missionary cu ttong peh thei lo in a um lawk. A lung a zur tuk. Tawkfang ah, “U le nau tla, mitkharh cu ka vun bun tikah, keimai’ hrangih rak tuah mi vek rori a si! Cumi mangbangza thlawsuah ih nan rak tel ruangah ka lung a awi zet,” tiah a sim.

Mipi pawl cun cumi an theih tikah an lung a awi zet. Asinan missionary cun an kawhhran hi kawhhran dang thawn a theih sual a si ding tiah an ruat. Ziangahtile an kuat mi thilri cazin ah mitkharh a tel lo. Asinan a dunglam tlar ah daite’n to in, a biang ih mitthli luang rero phah in, Thingthiam Ropibik in maksak zet in amah a rak hmang a si ti theitu zaran thingthiam putar pakhat cu a rak um.

Hram: Theih lo mi cangantu ih “The Miraculous Glasses.”