Arab Calai Romual

Arab Calai Romual

India tikulh pi nitlak lam ah kil lip eng million khat vuakvellai a kau mi Arabia tikulh pi a um. Tui san khurram umdan ih rel cun saklam ah Turkey, nitlak-saklam ah Mediterranean tipithuanthum a um ih, tipithuanthum kap ah Syria, Lebanon, Jordan le Israel ram pawl an um. Tipi Sen cu tikulh pi nitlak lam kap hrut in a feh thla ih Eden tipithuanthum kel thawn an pawh aw. Cui tipikap tluan ah Saudi Arabia ram a um. Tikulh pi ih thlanglam tipikap ahcun Yemen, Thlanglam Yemen, le Oman ram pawl an um hai. Nisuahlam ahcun Persian (Iran) tipi kel inh tikulh pi le Iran ramri a khamsak. Nisuahlam tipi kap tluan ah Qartar, Bahrain, Kuwait le U. A. E ram pawl an um. Persian tipikel saklam ah Iraq ram a um.

Miphun phunzakip le ram tam zet umnak hmun Arabia tikulh laili cu nelrawn a si ih, a sir cu thlaicinnak le zinan (ti-alh-thei) cetzung pawl umnak khua le khawpi pawl ti qiatqi tete’n, kang nawn in an um. A sung lam ah Bedouin timi hlan san minphun pawl khua an sa. Tipikap sehvel ah Arabs pawl an ceng ih Mediterranean tipithuanthum kap ah Hebru pawl in umhmun an khuar.

Hitawk hmun ih tlangleng pawl hi hmun khatkhat ih umhmun hnget khuar hnak in hmun tin ih tawihvah vivo ngaina pawl an si. Curuangah mi khua le ram an va thlen tikah inntek pawl ih zatlang nunphung an va hliahkhuh cang a um ih, anmah hliahkhuh an tuar cang khal a um. Sanphung hmaisa lam ah Arab pawl hin Egypt le a kiangkap Africa ram pawl tiang an rak hliahkhuh dah. Lehlam ah Egypt, Syria le Iran pawl khal in Arabia tikulh pi pumpuluk an rak neh caan khal a um. Zabi 12 le 13 lai ih Asia khawmualpi suasamtu Tartars pawl khal in Arabia tikulh pi khal hi an rak ciil ve dah.

A tlun ih tarlangh mi thilthleng pawl khin zatlangnun, calai le nunphung tivek ah hngongsuah mi an nei hai. Arab pawl in ca an neih lohli theilonak sanh cu cenhmun qhawn kual vivo miphun an si ruangah a si ding timi zumnak a um. A tlangpithu in miphun pakhat ih calai sanphung kan zoh, kan hliakhlai tikah khanca pawl ihsin kan thok qheu. Asinan cuvek ih hliakhlai ding mi khanca khal Arab pawl cun an nei lo, asilole hmuh an si lo simaw, hmuh an si hrih lo maw a si ding.

Amahlawngte ca a um lo ruangah calai nei lo ih ruat ding a si lo lala. Minung sanphung fehdan bang in Arab pawl khal in ngan mi calai um hlan ah simhsin calai an rak nei. Arab calai sanphung thoknak ah hlan san pipu pawl thuhla, le hmuh-ruahdan phunphun kha Rawi timi thuphuangtu pawl in tluangzakip fang in an rak phuangsuak qheu. An rel an phuannak kalhmang ih an hman mi cu Kasidah timi bezai sau pawl an si. Iran calai ih an hman mi Kasidah bezai khi Arab simhsin calai cindan an cawn, an cawm mi a si.

Arabaia tikulh pi sung um Arab pawl ih umtudan kan zoh tikah hrinhnam ziangtluk tam khal sehla an zaten fun aw khawm thluh ih Arab miphun timi hmin thawn Arab ram dinhsuak thei ding ah remcang bawh in an zuam rero ti kan hmu thei. AD 500 sehvel ah Arab pawl funkhawm aw in Palestine tiang hmanh an rak nuai dah. Asinan calai, thiamzung le nunphung ah phunhnam huap nganca hngetkhoh an dinhsuak thei lo ruangah an erh-hnget aw ngaingai thei qheu lo tlangpi. Ca an neih lo ruangah an nunphung bulhram a niam ti ih ruah ding cu a si lo. Ziangahtile siarkopphung (mathematics) le tlolakphung (astrology) lam ah an tleng sang zet. Cumi pahnih ihsi an sersuah mi khawruahphung khal a cangkang zet fawn.

Himi thuhla pawl hi cangan nei ding ih nortu an si bang in AD 500 hnu deuh ah cangan an nei thok thei. Zabi 8 le 9 ahcun a qhangso zet zo. Cutikah AD 520 ihsi suak mi Kasidah bezai pawl kha Abu Tamman (805 – 845) in zohfel in Moallakat, Muffadiyalat le Hamasa timi bezai pawl a cabu in a tuah. Cui bezai pawl cu Islam nunphung rung suah hlan ih rak suak mi bezai an si. Profet Mohammed suah hlan kum malte duh ah Moallakat bezai phuah thiam mi ropi pasarih an rak um ti a si (John. D. Yohannan – kawhhmuh zo).

Moallakat bezai komkhawm bu sung ih bezai lar pawl cu Imr-ul-Kais lole Imru al Qais (520 – 565) ih bezai pawl an si. Imr-ul-Kais hi Byzantine kumpi Justinian thawn an san a rual aw. Arab mi-uk hrin a si ruangah siangpahrang a rian ve. Asinan fiangpahrang fanu thawi an hnawihnihawk ngah pang ruangah ram sung ihsi dawisuah a tuar. Siangpahrang phenthlam hnuai ihsi a tlansuah lai ah siangpahrang ih milai pawl in tur in an hrai that ti a si. Tur hnih mi korfual an hruhter ih a thi titu khal an um.

Imr-ul-Kais khal an Arab dante’n tluang tin fang ih ral tin do vet u a si. Thlennak hmunhmun ih rak um remcang tapoh nupi ih nei, nupi tampi neitu a si ve. Himi thu thawn pehpar aw in thuanthu pakhat a um.

Vei khat ah Imr-ul-Kais le fala pakhat an ngai aw. Imr-ul-Kais in falanu kha, “Ka thu polh mi na leh thei le’n nupi ah ka lo nei ding,” a ti. A polh mi thu cu ‘2 le 4 le 8 kom ziangzat’ ti a si. Cutikah falanu cun 2 timi cu minu awm par ih um mi hnawi pahnih, 4 timi cu kala-uk pawhte zat, 8 timi cu sehal pawhte zat tican a si ti’n a let. Cutikah Imr-ul-Kais cun a falanu cu nupi ah a qhi ih, tarkun tiang nei aw in fanau tampi an run nei.

Kasidah bezai hin cindan hranpa a nei. Bezaipu cu khualtlawng pawl ih tanta mi riahbuuk pakhat ah a ra thleng. Cui riahbuuk ahcun cawl lawk in khualtlawng veivak pawl a ko khawm ih hlan san tenghkhengh ihsi khual rak tlawngtu pawl thulha, duhdawtnak lam ih amah a hmuingil thei lo thu, nelrawn ah veivak phah ih ei-hawl le umhmun hnget khuar a harsatzia thuhla, asinan a rualpi a si mi rang asilole kalauk cu a bawipai’ hrang ih mi qangkai a si zia thuhla, nelrawn ih ram an tawih thuhla, sa em an nei thuhla tivek kha bezai ah phuah in khualtlawng pawl hmai ahcun a samh. Khawhnet ah a bawipa siangpahrang, mi-uk fapa tivek sunlawihnak bezai a samh. Hivek cindan ih phuah mi Moallakat bezai komkhawm bu sung ah Imr-ul-Kais ih bezai pawl hi an cal a cang bik.

Islam Nunphung Dinsuahnak

Arab sanphung mithiam pawl in Islam biaknak ra suah hlan san hi Arab nunphung qhansoh hrih lo san tiah an ret. Cumi san lai ih Arab pawl sakhua ah Hebru le Khristian khawruahnak a lut tel ve ti tla in an sim. Mecca khawpi ih Kaa’ba timi hmun ah a rong a dum mi lung tumpi pakhat a um ih, raibiaknak khal a um cih. Cutawk ah Arab hrinhnam dangdang pawl ih biak mi milem le biakqheng tam zet a um. Mohammed a rung suah tikah cui milem pawl cu hlon in Kaa’ba biakbuuk khal Islam biakbuuk ah an run hmang (E. W. F. Tomlin – kawhhmuh zo).

AD 500 hrawng ihsin Arab pawl in phunhnam huap lungrualnak nei thei ding in an zuam thok. Tawkfang ah phei cun Palestine hmanh an do neh. Hitivek ih sanphung a her danglam rero lai ah Arabia nelrawn ih um miphun pawl ih meifar Mohammed cu Mecca khawpi ah a suak. Mohammed hi Kaa’ba hmunh ih cal lang zet Quarash hrin a si. Quarash hrin pawl hin zabi 4 hlan ihsin Mecca khawpi an rak hliahkhuh zo.

Mohammed kum 6 hrawng a kim ah a nu le pa cu dung-hmai naih aw zet in an thi. Curuangah a pu le pawl in an fingkhawi. A nauhak lai ah kalauk mawngtu mi siaqha zet a pu thlun in Syria ram a thleng dah. Cutawk ah nuthlawi milian Khadijah thawi tong aw in 595 kum ah innsang an dinh. A nupi ih rak thok mi hnaquan hoha in hna a quan ih milian ah a cang.

Asinan Mohammed ih thinlung luahtubik cu Arab miphun rualrem funkhawmawknak neih thei ding kha a si. Ni khat cu Mohammed in Allah pathian ih aw a thei. Pathian cun Mohammed cu Arab miphun hnen ih a thucah phuangsuaktu ding ih a hril thu a sim. Cuimi ihsi thok in Mohammed cun Allah pathian ih phuansuahter mi thucah cu a nupi, a pu le pawl, le an sungkhat naivai pawl sim thok. Caan a rung rei ih, Mohammed khal in a thucah phuannak ramri a kauter vivo. Lehhnu cun Islam sakhua cu hmun kip, ram kip ah a darh ih ram a la vivo.

A nupi le a pu an thih hnu ah Mohammed cu Mecca ah a um hrih lawk. AD 622 ah Medina khawpi ih Islam sakhaw duhtu palai pawl in Mohammed cu Mecca ihsin Medina ah an hruai. Mecca ihsin Medina ih Mohammed a feh hi Hegira an ti. Cuihlei ah himi kum hi Islam sakhaw kum siarthoknak khal ah an hmang. AD 632 ah Mohammed cu Islam sakhaw thluntu 40,000 thawn Mecca ah a ra kir sal. Cuihnu ah a dungthlun pawl kha Allah ih duhan ih nung ding in a cah ta hai ih, cumi hnu rei lo te ah a thi.

Mohammed in kum 20 lenglo a rawngbawlnak ih a phuansuah mi thuhla pawl cu a dungthlun pawl in lungpheng, thinghawng le savun par tivek ah ca in an rak ngan. Mohammed a thih hnu ah a ai run awhtu, Islam kumpi hohatu Abu Bekr in Mohammed ih phuansuah mi thuhla pawl cu Arabi qong in a ngan. Cumi cu Koran (Qur’an) an ti. Qur’an sung ah bung (Surah ti’n an ko) 114 a um (Hornstein, Percy & Brown – kawhhmuh zo). Bung an retdan ah bezai sau pawl an ret hmaisa ih bezai tawi pawl kha neta ah an ret. Bezai tawi pawl hi Mecca ih Mohammed a um lai ih ta an si ih, bezai sau pawl cu Medina a um hnu ih ta an si. Qur’an cabu hi AD 646 ah an zohfel sal hnu ah Islam cathianghlim ah an nemhnget (John D. Yohannan – kawhhmuh zo).

Mohammed in Kaa’ba biakbuuk ih milem pawl qhiatdarh in Islam biakbuuk ih a hman thu kan rel zo. Milem a hlon bang in thlungdar, hlasak le laam khal a hnong fawn. Islam sakhua thawi kaih aw lo mi calai dang khal a hnong. Qur’an cabu lawng sunhsak ding in a zirh qheu. Curuangah Islam sakhaw thluntu pawl cun cat bang lo in Qur’an cathiang an siar, an samh qheu. Himi ruangah calai mithiam pawl in mipi tambik ih siar mi cabu cu Qur’an a si an ti qheu. Hmansehla himi san ah Islam calai lo bak cu calai qhangso dang hmuh ding a um lo (John Macy – kawhhmuh zo).

AD 661 in 750 tiang hi Damuscus khawpi ihsin Ommayad Caliphs siangpahrang hrin pawl lal san a si. Himi san ah Arab siangpahrang hrin pawl in huham an nei zet. Dengfelphung, qongkalhmang zirnak lam, dan le dun zirnak lam, sanphung le sakhaw lam thuhla tivek an qhangso cak zet. Siangpahrang innsang pawl khal in biazai an ngainat ruangh biazai khal a qhangso zet. AD zabi 8 ah Mu’tazillites timi pawl rung suak. Annih hi zalen zet ih thu ruat uar zet pawl an si. Curuangah Islam calai a si lo mi, calai dang khal a rung hmuingil phah. Himi san ah Indian nunphung ihsi an ngah mi Sanskrit thuanthu pawl tla Arabi qong in an let. Zabi 9 a thlen tikah Mu’tazillites pawl an hnong lala. Asinan Mu’tazillites pawl ih rahsuah a si mi Sufi timi pawl an rung suak.

Sufi pawl cu thuk le khunkhat zet ih biazai buaipi pawl an si. Zabi 12 ah Islam sakhaw thluntu Al-Ghazali in a somdawl ruangah an karhzai in, an hngelhnget vivo. Sufi pawl ih khawruahphung ahhin Buddha ih khawruahphung, Veda cabu sung ih um khawruahphung, le Khristian khawruahphung tivek pawl an zeptel aw phah vivo titu khal an um (E. W. F. Tomlin – kawhhmuh zo.)

Sui San

AD 750 ihsin Caliphs siangpahrang pawl in Baghdad ihsin Arab pawl an uk. Himi san hi Abbasid Caliphs siangpahrang san an ti. AD 1258 tiang an lal. AD 750 – 1055 tiang ih Arab Calai Sui San tiah an ko. Biazai lam ah hlan san siangpahrang inn sung biazai, putcawi (lomh le faknak) biazai, le duhdawtnak biazai pawl hnak in an cangkang deuh vivo. Hlan san tidan hlir thlun lo in relbawldan thar tete tla an phorhsuak. AD zabi 8 lailak hrawng ah Ibn Ishaq in tirhthlah Mohammed ih nunthuanthu a ngan.

AD 763 ah Arab pawl ih suan emem mi siangpahrang Haround Al-Rashid a suak. Anih hi a no lai ihsin ralbawi a quan ih Byzantium Kumpiram a do neh. AD 786 ah a pai’ zaangcan sawng in Baghdad khawpi ah siangpahrang a quan. Huham a nei zet ih ei-hawl pursumnak lam an hmuingil fawn ruangah Haround Al-Rashid san hi Calai Sui San vawrtawp a thlen laifang a si kan ti thei. Himi san ah biazai le awnmawi mithiam Abu Nuwar a suak. AD 809 ah siangpahrang Haround Al-Rashid a thi ih cuihnu kum khat ah Abu Nuwar khal a thi ve. Hmansehla himi tei’ pahnih sunlawih thangqhatnak calai phunphun tam zet an rung suak. Cumi pawl lak ah leitlun deng suak ih rung lar cu Arabian Zan Thuanthupawl (Arabian Nights) timi thuanthu pawl an si.

Zan Thawng Khat Zan Khat Thuanthu pawl ti khal ih hminthang Arabian Zan Thuanthu pawl hi Arab miphun pawl cennak ram ah zabi 10 sung ah an rak ngan ti a si. Thuanthu 264 cu hlan pi le pu pawl ihsin an simhsinawk vivo mi thuanthu pawl an si. Lehhnu lam ah an run bet vivo ih 1450 kum ah tui kan hmuh mi thuanthu pawl an rung suak kim ti a si. Thuanthu pakhat le pakhat pehzomawknak zawn um vivo ih duansuah mi an si. Hitivek thuanthu pehzom aw pianhmang hi Roman bezaipu Ovid ih bezai, English Biazai Khaipa Geoffrey Chaucer ih thuanthu bezai pawl, le Italian thuanthu nunthuleng ngantu Giovani Bocaccio ih thuanthu pawl khal ah kan hmu thei (Horstein Percy & Brown – kawhhmuh zo).

Vei khat lai ah siangpahrang Sultan Shahriar in Arab ram a uk. Cui siangpahrang ih nupi cu a rak uire qheu. Curuangah siangpahrang cun a nupi cu a thah. Cumi ihsi thok in siangpahrang cun nunau tapoh cu a ringhlel thluh. Curuangah nupi pakhat a neih tinte’n zan khat a kualpi hnu ah khua a van vete’n a thahter hai ringring. Cutin, ni khat nupi pakhat a nei ringring.

Siangpahrang Shahriar ih khawnbawl pakhat in fanu a nei. Cui khawnbal ih fanu in siangpahrang cu pasal ah nei in zing tintei’ mi a thah qheu cu banter thei a tum. Curuangah a pa ih sian lo cing in siangpahrang ih nupi ding ah a va hlan aw. An neihawk zan ah siangpahrang cu thuanthu ngai nuam zet pakhat a sim. Asinan cui thuanthu cu khawvang tiang ah a cem hrih lo asilole a nupi cun cemter lo in a umter hrim.

Siangpahrang cun cui thuanthu ngai cu laklawh a tituk ih a khawh hrih lo ruangah a nupi cu that hrih lo in ni khat sung a zuah hrih. A thaizan ah a nupi cun thuanthu a sim lala nan a cem hrih lo lala. Cutin, ni khat a zuah lala. Cuti vivo in a nupi in thuanthu a simh qheu ruangah an tarkun khuk-kha-suan tiang an nei aw lanta. Siangpahrangnu ih simh mi thuanthu pawl khal leitlun dengsuak Arab calai ah an rung cang.

Zan Thawng Khat le Zan Khat thuanthu pawl hi Europe khawmualpi ahcun zabi 18 tir lam ah French calai mithiam Antoine Galland in a rak let. England ahcun zabi 19 sung ah Sir Richard Burton (1821 – 1890) in a let. Zabi 19 ne lam ah Russian awnmawi mithiam Rimsky-Korsakov in Zan Thawng Khat le Zan Khat thuanthu sung ih tel thuanthu pakhat sirhsan in Scheherazade Opera thuanthucawn a rak tuah. Lehhnu lam cun leitlun miphun tampi in anmai qong in an run let vivo hai.

Zan Thawng Khat le Zan Khat thuanthu pawl sung ahhin minung pawl in titsa cakhiarnak an veizia, thuneihnak huham an ngainatzia, pumpi khat khat cawmnak hrangih an retheihzia, khawpi sung ih hlawnthilri tamzia le nelrawn ih ei-in harzia tivek pawl a lang tam zet. India, Persia (Iran) le Egypt nunphung sulhnu pawl khal an lang fawn.

Calai Sui San sung ah Arab siangpahrang Caliphs pawl cun Syria, Iran, Iraq, Egypt, Afaghanistan tivek ram pawl an neh. Himi san thotho ahhin sanphung lam thiamnak, siivai dengfelphung lam le khawruahphung lam khal hma an sawn zet. Himi san ih suak bezaipu Mutannabi (915 - 963) hi Arab calai mithiam pawl in dinhmun sangbik an pe. Zabi 10 cem zawng ah Arab calai phunphun khongkhawm in an remhfel sal.

Zabi 11 tir lam ah bezaipu Al-Ma’arri (973 – 1057) a suak. Arab calai kan zoh tikah hlanlai ihsin sakhawlam calai si lo pawl cu hnon le kham an si phah qheu ruangah lehhnu lam ah tu le tu qawnhremnak sung ihsin talsuah thei tum ih an zuam thu kan hmu thei. Mu’tazillites pawl le Sufi pawl khal kha talsuah zuamtu pawl an si. Bezaipu Al-Ma’arri khal zalen zet ih bezai phuah uartu a si.

Al-Ma’arri ih bezai pawl hi Omar Khayyam ih bezai pawl thawn an dinhmun a can aw, an level aw ti a si. Hlan san Muslim pawl cun Omar Khayyam ih bezai pawl cu, tulai qong tak in kan rel asile, an ei lo. Sakhaw hruangri lenglam ah suak in zalen zet ih khawruahnak hmelhmang pawl tarlangh mi an si ruangah an duh hrotlonak a si. Lehhnu pi lawng ah Omar Khayyam cu a rung lar leh. Al-Ma’arri ih bezai pawl khal hivek thotho a si an ti. Amahlawngte Al-Ma’arri ih bezai pawl cu Omar Khayyam ih bezai pawl tluk cun leitun ah a lar lo. English miphun Reynold A. Nicholson (1868 – 1945) in ‘Meditations’ timi hmin thawi a run lehhnu lawng ah leitun in a hmeltheih thok fang. A rei hrih lemlo ruang khal ah a si thei.

Al-Ma’arri le Omar Khayyam hin hmuitin mi dang deuh veve an nei. Omar Khayyam cun taksa khawvel lam a naih ih, Al-Ma’arri hi cun thlarau khawvel lam a naih deuh. Omar Khayyam hin a taksa kha duat in, caan rei lo te sung lawng a ngah thei mi thin diremhnak kha kimcangtei’ ngah a duh. Al-Ma’arri ve thungh cun taksa hi a hawng (a kawm) lawng a si, a sung ih um mi thlarau lawng in manmual qha a nei timi khawruahnak thawn bezai a phuah.

Ngun San

Al-Ma’arri cu 1057 kum ah a thi. Himi hnulam hi calai le thiamzung ih Ngun San ti a si. Sui San ihsin Ngun San ih qumsuk vek a bang nan Tartars pawl ih an ra ramh hlan deuh hrawng ah Arab calai le thiamzung cu Spain ram tiang a thleng darh. Caliphs siangpahrang hrin Mutamid lephei cu Spain ram ih Islam sakhaw dinhsuaktu bezaipu ropi a si. Himi san ah Islam cathiang lam ih mithiam tla Spain ram ah an suak. Himi rual thotho ah Spain ram ahhin Islam bezaipu ropi pawl tla an suak ve.

Uktu le mithiam Al-Ghazali (1059 – 1111) san ah amah rori in Islam sakhua a thlurh ih a kilkhawi. Asinan siangpahrang Ibn Rashid (1126 – 1198) cun Al-Ghazali a dokalh. Cutin sakhawlam enghtaiawknak a suak. Asinan rei a daih lo. Ziangruangahtile 1258 ah Hulagu Khan in Baghdad khawpi a run lak ruangah a si (John D. Yohannan – kawhhmuh zo).

Cumi ihsi thok in Arab pawl ih huham cu a cuai vivo ih Tartars miphun, Turkey miphun le Persian (Iran) miphun pawl sawn an rung dingcang. Himi san pawl ah Arab pawl ih nunphung cu Baghdad ah a qhum aw thei nawn lo. Nunphung sutpiban cu Egypt ah siseh, Syria le Spain ram lam ah siseh a qhawn kual rero.

Himi san ah Arab bezai cu a hang a dal vivo. Asinan sanphung le nunthuanthu calai pawl an karhzai. Egypt ram ih Mameluke Hrinkumpi (Dynasty) siangpahrang pawl san ah Zan Thawng Khat le Zan Khat thuanthu pal an cingfel qhehsuak thei.

Sui San a cem ihsin Arab pawl ih thuneihnak huham pawl a tla niam vivo ih, 1453 kum ah Ottoman timi Turkey miphun pawl in Constantinople khawpi an la. An hotu Amurath I in Ottoman Kumpiram a dinh thok. Cutikah Arab pawl cun an ram neih cia an hloh vivo. 1492 kum ah lephei cun Spain khal an hloh lala. Ottoman Kumpiram hi 1918 tiang a qunghmun lai.

Leitlun Ralbuai Qumkhatnak cem hnu ah Arabia tikulh pi ih ihsin Turkey pawl an suak. Cuihnu ah Saudi Arabia ram a rung ding. Himi ram hi Arabia tikulh pi ih qhen nga qhen li uktu a si. A kiangkap ah Jordan, Iraq, Kuwait, Oman le Yemen ram pawl an um. An zate’n Arab nunphung ih qhum aw hlir an si. A ngaingai cun Arab nunphung hi Syria, Egypt le Sudan ram tiang a rak darh.

Tui san ah Arab miphun pawl ih ram cu a dangdang tei’ an qhenawk thluh ruangah mah le calai le thiamzung thawn an qhangso cio. An zatei’ vun thlirkhawm cun a bulhram Arabi qong le calai hmuihmel a lang nan, hngeqek dangdang ah cang in Egypt khal in Egyptian Calai, Iran khal in Iranian Calai, Saudi Arabia khal in Saudi Arabia Calai tivek in mah le thlawhhma cio an sial. Mah le duhdan deuh in an tungding aw hai.