Ruahsan Lo mi Duhdawtnak (Nunthuleng Tawi)

Ruahsan Lo mi Duhdawtnak

“Siang Uk kha maw? Thei tuk kei cu. Tlawng kai lai ih rak um tlang dah kan si si. Tui a nupi thawi’ an tonawk thok dan hman ka thei hun si ah.”

“A no lai thu vun rel ding ahcun…tlawng kan kai tlang lai thu kha ka lo simfiang thei bik ding. Anih hi ttong nei lemlo, mi ngawicawi te a si. Asinan ca siar tam ti nafam ah, fala cakuat ngan tivek cu a thiam nasa. A ngan mi cakuat sung ah tla cun zilthli nemte, va ai-awn mawi, na biang no cemci te tivek…..aa… ka thei cawk hnuaihni lo. Ka lamkal zawng kha si hlah. Ka sim duh mi sawn cu ttongkam mawi zetzet hmang in fala cakuat a nganthiam. Kei hman cakuat tampi I rak ngansak ve sapbai.”

“Khatlam ahcun, ningzah a neihtuk lawmam kha cu ka ningkhong ngah riai. Kum kul ka kim hlan cu fala ka nei hrimhrim lo ding, fala ka hrial ti tla cun a rak ti sapbai. Kan unaupa hi ziah, fala nei ngam ding hrimrim a si lo cuh. A hmel kha a ttha huarhi fawn ih, fala cun an naihniam phah ttheu nan, tingaihnak um hlah. Tuihnu ah mi pitling ah a rung suak men na.”

“Phun hra kai tlang kha kan si sikhawh. Khuihnik, khami kum ih inn hlang tlangtu pawl kha Lal Pek, Siang Uk, Ngun Lian le kei kan si in ka thei. Bualrawn Tlawng sak, hnuaita zin ah kan um. Siang Uk hi cu kan lak ahcun ca a thiambik. Tuition tla a kai dah lo nan camibuai a sung dah lo. Mi dang pawl cu kan nikhua lo khawmkhawm nasa.”

“Vun ruat hnik awla. Khawteberek ah phun li tiang kan kai. Cozah in saya in pek daih thei lo ruangah ca tthate’n kan zir ngah thei lo. Kum a hung liam vivo cun kan phun len santer vivo a rak ttul. Cuti’n thiam mi mumal nei lo in phun li kan ong. Phun nga kai ding in Falam ah kan rung. Khawpi fa pawl cu ca an thiam si, aaa…. kan tai lo, kan ban kan phar si ko. Siang Uk ih ca thiam thei ualsawh hi cu, mumallonak ci khat ah ka ruat men…..hehehe.”

“Aw,… a nupi thawi’ an tonawk thuhla lam kha vun rel sal sehla. Khami lai kha tlawng pih zawng, camibuai phit lai a si. Khami ni kha English kan phit ni a si. Himi ni cu ka cing ttha zet. A san le vang khal a um. Cumi ni, kan rualpiza in tlawnginn ihsi kan tlun lai ah Sungte in Siang Uk a rak bia. Sungte cu Lothlo Zung ih bawi pakhat fanu a si. A hmel cu sipesial si ko. Vun rel lawlaw sehla, an rualpiza hi hmel sia an um lo. Ruangrai ttha, ngo deuh lampang,…aa…fala hmel ttha le mawi cu na theihzawng tak a si ih, na theihvek khan rak ruat ve mei.”

“Sungte tei’ rualpi za cu hnipuan ttha le mawi an hruh thei. Paisa tla an nei. Tuition tthate’n an kai. Ca khal an thiam. Aa…kannih thawi tahtthim cun a ttha hlir nei thluhtu an si bik mei. Anmah heltu mipa pawl khal khawpi fa deuh hlir an si. Kannih vek tla cun Sungte tei’ rualpiza cu ‘ti hiarho’ lam cun kan be ngam lo. Tlawngkai tlang kan si ruangah rualpi nel in kan nel men. Tui kan rel mi kan rual Siang Uk phei hi cu khawteberek di inn sia te ih khawsa an si thu hngilh dah lo a si fawn ih, anih cun Sungte tei’ rualpiza cu a zoh hman a zoh dah mumal khal ka zum lo. Amah thawi pehparawknak nei lo, le nei dah lo ding ah a ruat si bik in ka thei.

“Tlawnginn ih paisa khuan ding a um caan ah tla cun Siang Uk cu a mitthli a hal kelki deuh ringring ti sehla ka porh deuh ke maw, zianglehlam. A nu le pa in paisa an kuat thei hrot lo tikah rualpi ih paisa cawi cop tete tla in tlawng khuan a pe ttheu. Mi dang pek caan ih a pek thei lo caan a tam deuh. Kannih pawl len, paisa nei thei ve lo hlir. Asinan kannih cu ningzah kan nei lemlo ih, kan hrang ah tuardan a zia ko. Ca kan thiam lo ruangah vuak kan tuar tam ih, kan ningzah khal a reh vivo si ta hmang maw ka ti men.”

“Kei tla cu phun hra len ka ong lo ding ti a fiang, eh….si lo,……ka fiang cia kan ti sawn ke. Kum hnih phit non khal ka tum hran cuang lo. Ong lo ding thotho cu ziang! Curuangah khami kum cu ka panghel ka suah. Siang Uk ka tlon ih, cakuat tampi ka nganter. A tir ahcun a ngan duh lawk lo. Cakuat cu zatzat cu zianghrangah maw i ti. Kei khal in zep hnuaihni lo in khawpi fala pawl ngiarnak ah ka ti mai. Mi hnoksaktu men ah cuvek ngan ka paih lo i ti sanh lawk lailai.”

“Asinan taimak ka suah ve. Khawpi fa si ruangih mi uang aw pawl ka nin thu, hmai kum lam cun khawte ih lo ka thlawh thlang ding thu, curuangah ka dam sung hrangih cinken ringring ding ah ka duh thu tivek tla ka ruah. Ei le in khal in ka tlon phahphah. Culai hrawng ah camibuai tuahnak ding hrang tlawng khuan a um ih paisa a nei lo. Van tthat ah paisa ka rak nei ngelcel ih ‘cakuat I ngansak awla, tlawng khuan ka lo peksak ding’ ka ti. Cuti’n amai dan tak ah ‘mi hnoksaktu men’ cu i ngansak hai. ‘Lo duh pang hai sehla’ ti cu I ti lo nasa. Kei khal in in duhtu an um ding cu zum hran cuang hlah.”

“Cakuat cu tampi a ngan. Ka siar hai ih an ttha zet. Na theih vekin tu khal ah canganthiam ah a rung cang tho. Fala lam thuhla nganter leh a cak um khop mei.”

“I ngansak mi cakuat pawl cu kei khal in fala dangdang hnenah ka kuat hai. Ka thinlungte’n khawpi fala pakhat tal ngiar ngah thei sehla ti cu ka ih zawng ah ka suangtuah phah ttheu. Cumi ttum ah panghel luarkainak pakhat ka nei bet. Cumi cu ka rualpi pawl ih hmin khal in fala dangdang cakuat ka pek hai mi kha si. Anmah sim lo in a thupte’n ka tuah.”

“Sungte in Siang Uk a biak thu ahkhan kir leh sehla. Sungte in, “Tuisun na phi thei maw?” ti’n a sut. Cuvete’n Siang Uk cu um ngaihnak a thei lo. I rak zoh. Ka zumh sual lo ahcun a thinheng a bang. Ziang le ziang si maw a ruat. Sungte ih ttong khal cu a sawn lo. A mithmai a hun remh. Harsa ti hmel zet in a hung hni-no. Mithmai pante’n Sungte cu a zoh sal ta hnu ah, zianghman ttong lo in a feh.

A zan ihsin Siang Uk cu an khaw pawl ih inn hlan mi ah a va riak. A va riahnak sanh kan sut khal ah in sawn lo. Khawpi fala in a biak ruangah a lung a molh si ding tiah hnihsuak ah kan sai ih kan hni rero. Thuhla kungkhai ah ruat lemlo in kan um. A beidong thlak, mipa pakhat si ve si ih khavek ih um cu a ningzah thlak tuk aw, ttia lo lutuk, kan ti thul. Vun ruat ve awla, nunau pakhat hmai men ih ding ttha ngam lo. A hmai sen natsatzia tla cu mi hrong ei cu si ko. Ziangsi? Kum khat sung rori tlawng kai tlang mi tla a zah ciamco? Ttul lo tuk. Sungte in ‘I duh maw?” a ti len si lo. Nunau cun cuvek cu a sut hmaisa awm si lo. “Phi thei e, ka kut na lo pi,” ti sehla cu vial si ko si, tivek pawl tla kan rel ruri in ka thei. Khami laifang ahcun a kiang ih ka feh tla kha cu ka sir-awk van ka ban.”

 “A zan cu it phah in cakuat thu pawl ka ruat. Ca in khirhtu pakhat hman an um lo ih kaih lo tak si. Sinan, “Tuisun na phi thei maw?” timi ttongkam kha cakuat sung ah telnak um vek in ka thei. Cuvete’n Siang Uk ka vun mangsuak dukdi. Cumi sun ih a cangvaihdan khal ka vun mangsuak sal. Anih cun amai ngan mi ti takah cakuat sungih um mi thuhla fehdan pawl a rak thei thluh khi a rak si.”

“Rualpiza ih um khawm ringring kan si veve ruangah a pak ih tonawk a har. Curuangah English phit ni ah ‘Tuisun na phi thei maw?” ti’n I rak sut asile ka duhdawtnak hi na cohlang zo tiah ka ruat ding…..timi kha a cakuat pakhat sung ah a tel. Cumi cu amah Siang Uk ih hmin in Sungte ka rak kuat ngah mi si cuh!!!”