Bezaipu Pakhat ih Cafung

Bezaipu Pakhat ih Cafung

Nun a har.....ziangkim ah ttuan ttentto a ttul.  Duhnak si lo’n ttulnak ram ah lungleng caurau ih um cang khal a tam. A suk a so ah thlansa phulkai in “Huiha! Pa Teng bang ing e”.........

Sorsia bang ih tlangmual le horkuam phuntling ka hrawhkualnak ah hmasia bang ih ka kentel ringring mi biazai hrik cun ka hmuh le ka theih mi pawl ruangah in vua in vel ringring.

September 29, 2011 sun nazi pahra hrawngah Insein Bazar sungah rak vak ve awla cun lungzi pawl le angki ttial a hruhtu mi pakhat (Kianghrol timi pa) na hmuh ka zum. Tahan ih a hung tlun lawk a ttul ruangah hnipuan malte tal lei ve sehla ti in hnipuan a zoh rero kha na hmu ding. Hmansehla Kianghrol timi pa cun hnipuan pawl cu a vun lei zik taktak tikah a tthulh sal cingcing ti kha na hmu fawn ding (Hnipuan leinak ih paisa hman a ui thei tuk cuh.....). Hmansehla na zoh thlun vivo ahcun Ekari timi cabu dawr ih a lut na hmu sal ding. Cutawk ahcun Kawlram canganthiam hminthang Mg Htin ih Kandawin Tankhyek timi cabu paa takte 2000/- ih a lei kha na hmu fawn ding.

Cutikah Kianghrol timi cu ei ttha si lo, hruh ttha si fawn lo, cabu tivek men leinak ih paisa hmang ttheu mi mumal lo deuh a si ti na theithiam thei cih ding. Cutin a aat a sah man hlan ih tuamhlawmtu a ton lo ruangah tu ah tla cun calai nat in a tlakbuak nasa zo ih, tuamhlawm dam theih teh a si nawn pei maw tiah sungkhat laina pawl tla an buai phah a zum um. 

Anih cun a thlacamnak bezai hi rak siarsak ve awla a hrangih thil ttha tuahtu ah a lo ruat cih ding.

Zingnui’ siam khualrel ih nauhniang

Van hnuai sungih thilnung tinkim

A te bik in tumbik thleng tiang

Nun rualremnak zing thlizil fim

Hawp ngah in thlangam cio hramseh.

Tlun ih zuang mi vate pawl khin

Nun rualremnak biathli dong in

Thin hnangamnak nei cio hramseh.

Rialti sungih ngate pawl cu

Nun lungawinak zaihla neitu

Kut hnuai ah thlangam cio hram seh.

Phenthlam petu thingkung hmuah khi

Daihnak petu, neitu zilthli

Si ding ah, nungdam cio hramseh.

Vawlei thuamtu, ceitu hramhring

Ramlak riantu hramhri phuntling

Hmuifu co in dam cio hramseh.

Cuti ih thla ka vun cam hnu ahcun ka fehnak kip ih ka hmuhton mi bezai catlang pawl in ka nun in ciahnehnak ihsin a ra suak lehsawng mi bezai catlang pawl ka vun zoh sal. Cozah zung le tlawng tinkim ih kan hmuh ttheu mi “Siikan laih-na be-kin-kua” timi bezai catlang te khi Lai ttong in ziangtin kan ngan ve ding timi in ka thinlung ih hna a ttuannak tla a rei zet zo. Lehhnu ahcun bezai thlarau in i run ciahneh salih “Dandun thlunkim, nunnak him” timi le “Dan hnuai ah ngam, siatral kham” timi catlang pawl an rung suak.

Hivek thuken tete midang ttong ihsi leh hi thil ttul lo tla a si pang pei maw tiah ka ruat lawk. Hmansehla tuihlan kum tampi ah Kawl pawl cun an rak tuah zo ruangah tu ah tla cun, ram dang calai thei lemlo pawl tla cun, anmah Kawl pawl ih ta hrimhrim ah kan ruat mi tla an um. Curuangah kannih teh calai ropi a nei thei mi miphun kan si ve si si, a buaipitu kan um lo ruangah kan ttong ih mawinak hi a langlo menmen a si, timi thinlung thawn ka thinlung cu ka hun tuah ttha sal.

Thiam le thiam lo cu ret tthat, hlasak paih ve pakhat si ih ka theihawk ve ruangah awnmawi thuhla lam  thuken tla hi kan neih ve a ttha ding tiah kan vun pol ciamco. A hung suakmi cu “Phunhnam nun cawi, zaihla mawi” timi a si. Dik le mawi ve thawkhat ih ka theih ve cu! Mai thu thaw, mai vawih thaw! Ttelh (rhyme) mawi zet thawi’ thuken pakhat pol suah hi a har zet ruangah himi hnakih ttha run polsuak ve cio dingah hranhram in ka lo dil hai.

“Pi-ngia sui-u lu ma khu” an ti maw? Kannih teh in ziangtin kan hmang ve? Keimah bulpak cun “Ruksak theih lo, fimnak ro” tiin hmang sehla a ttha men ding tiah ka ruat. “A-ching sih khaih, lungh-lah saih” timi khal hi “Tikcu um lai, tthahnem ngai” tivek in ti sehla teh ziang a bang?  Mah hman sumpai nei hnai si lo ih ka ruatsuakmi thil pakhat cu “Lu-maih neh ngui, a-ttu ma ni” timi hi “Mi-aa le sum, umtlang lo pum” timi hi a si. A mak duh khop!

Kan pupa ttongfim ah “Ral i hnu ih, selkip tlo” timi a um. A sullam cu ral pawl an um nawn lo hnu ih hrosuang ciamco, lehhnu khawtlai ih ral rel tinak a si. Cumi thawi’ bang aw ve deuh  “Yan-tu pian hmah du-li pin” timi hi ka vun ruat rero tikah “Ralreh khawtlai, thalfang sai” timi a rung suak. Hihnakih ttha khal pol a theih ding a bang ka ti rero nan tu tiang cu ka pol suak thei hrih lo. Thuthangca ih nitin kan hmuh ttheumi “Taa-nga phuanhphiu, pih a-cuu” timi khal hin ka thinlung ih a run densuah mi cu “Sa-nga pungtthang, rampi hrang” timi bezai catlang a si. Hiteh ziang a bang?

Tlawng kan kai lai ih kan theih nal emem mi “Pi-ngia lu, u di ma sih” timi tla hi ka ruat rero ih Lai ttong cun hitin a suak. “Fimnak zir ding, tar um hlah ing” , “Zircawn ding ah, tartuk um hlah” , “Zir le cawn ah, tar um hlah” tivek tete’n a rung suak. A ttha pakhat tal a um maw zianglehlam?

Thu dang ah vun pial leh lala sehla. Lamzin sir tivek ih kan hmuh ttheu mi “U-du ya-ti, ttaw ku hmi ih” timi tla hi tulai cu Ecology lar san a si ruangah kan ttong khal in kan neih ve a ttha ding tiah ka vun ruat ve tikah “Nikhaw herdan, thingkung hngohsan” , “Nikhaw fehdan, ram-thing hngohsan” tivek in ti sehla a ttha men ding ti ah ruahnak a um.

The Mirror (Kyimon) thuthangca tivek ih hmuh ding um ringring “Set-hmuh suan-aa, khit caw-hlua” timi khi cu anmai’ hmanmi sullam khi ka uar tuk lemlo. Curuangah ‘mai thuthu te sawh’ ti bangin “Cetlam thazang, san thawn fehtlang” tiin hmang sehla a ttha pei maw tiah ka ruat. Calai hrik pakhat ih ruat aw ve tiah calai lam thuhla tete tla hi ka vun ruat ttheu. “Sa-pi minh hmah, lu-miu ttinh me” an timi khi “Calai dingcang, phunhnam khaisang” tiah ka hei let ve i.......ttha na hen tu kawm? Mt. Paul ih ttong vun sangin ‘ka nolh sal hrih ding’...... “Phunhnam cawinung, Calai ro sung” ti in. Ka nolh sal lala ding..... “Calai ttha in, phunhnam a din” timi thawn. C2M2 ih Pa ttha Nei Khar le pawl in United Chin Publication Board an din ttum ih ka polsak mi thuken pakhat khal hi himi zawn ah bet sal ka duh. “Phunhnam kiltu, fimnak cabu” timi a si. An thuken ah an run hmang ta hngehnge.

           

Mirang in “Unity is Strength” an ti ih Kawl pawl in “Sii-lung-chin di khun-aa” an timi khi “Ttangrual `uantlang, tha le zang” ti ve sehla teh? “Untited we stand, divided we fall” an timi khal hi “Ttanrual cahnak, kuaidarh bahnak” tiin ka hei let ve i.......a paraphase style tuk deuh maw? ‘Sava in ar e a ti’ ti bangin calai lam ih kan kirsal asile “Calai sumtual, fimnak mual” timi tla  a um lai. Bezai a ngainatu pawl hrang deuh ah “Thinlung kuaitu, bezaibu” timi hi cu a huat um lemlo men thei. “Leiba mankung, dawtnak man sung, nu-pai’ dawtnak, kumkhaw sam tlak” timi tla hi  theih ve rengreng cu a sual lo men ding.

“Kuh-tu lee yah, wann lee wah” an timi vek tla hi “Bualkhaw tlawn le far lak cem” tivekin kan nei tho nan, bezai rim nam deuh ding in “Thlawsuah khal siar, mah khal puar kiar” , “Hmuifu khal siar, pum khal hnianghnar” tivek in ka hei tuah ve bet. “Tta chiat khuk, hna chiat piat” an ti maw, “Veikhat sat, pahnih cat” kan ti ve thei ko lo ding maw?

Cutin....khatin....ka ruat, ka pol, ka ngan rero mi pawl a rak siartu tla hmaisong umza a si men thei. Hmansehla in siarsaktu pawl parah lungawinak thawn:

Thinlung hnangam

Taksa dam in

Nunram nuam in

Lo thuam hramseh.

timi maw......

Taksa harhdam

Thin hahdam in

Nun lam nuamte

Zawh cio uh e.

timi ah nan duh mi sawn kha thlaza ka lo camsaknak ah cang sehlaw!