Gulliver ih Khualtlawnnak pawl VI

Gulliver ih Khualtlawnnak pawl

Bung VI

Ka Ral pawl Hnen Ihsi Luat in Ka Suahsemnak Ram ih Ka Thlendan

Blefuscu ram ah duat zet in in cohlang ko nan ka hrangah ral a muang lo in ka thei thotho. Ka ral pawl cun cutawk hmun ah reipi in umter lo ding ti ka thei. Cutin, ka innsang le suahsemnak ram umnak ih tlun ka caknak cu a luar sinsin. Sihmansehla cuvek ih khualtlawng thei ding cun vokkuanglong pakhat a ttul ih, Blefuscu ahcun tipithuanthum khualtlawnnak dingah rinsantlak khop ih tum le hngetkhoh vokkuanglong pakhat dinsuah ding cu thil cang thei a si hmel lo.

Blefuscu tikulh ih ka thlen hnu ni thumnak ah lungngai zet in tipikap vunnel pawl lakih ka veivah lai ah tipithuanthum tidaizawl parah thil pakhat a run fen aw kha ka hmu. Ka ding ih ngunngaih zet in ka cuan, cuisin ziangha a si ti a kiangnai ih hmufiang thei ding in tidai ka hi leuh. Cumi cu vokkuanglong ngaingai pakhat - keimah tia hrangih tuahmi vokkuanglong - tidai parah a khupzawng ih rung fen aw a rak si ih, ka lungawi dingzia cu vun ruat mai aw! Khuitawk ihsin a ra fen mi a si ti cu ka thei lo. Asinan thlipi hrang ruangah long pakhat ihsi tla hlo in, vantthat thilthu ah Blefuscu tikulh lam ih rung fen aw vivo a si men thei.

Vokkuanglong cu a tumtawk ruangah keimahte cun tipikap ah ka dir thei lo. Curuangah khawlipi ah ka tlung ih Siangpahrang hnenah a neihmi long tumbik pahra le long-ralbawi ih hoha mi long minung 300 pawl in san ding in ka va dil. Cui long ralkappawl bomnak thawn vokkuanglong cu leimual parah kan dir ih a ling kan let thei.

Vokkuanglong cu a siat tam lemlo ih ka lung a awi ngaingai. Cuihnu ah thingkung tumbik pawl thawn hlaufung ka tuah ih tipikap thleng ding in long in dirh bawmtu long pawl le long-minung pawl cu ka vokkuanglong sungah phur in longcawlhhmun tiang ka hlau.

Blefuscu ih minung pawl cu longcawlhhmun ah an rung hai ih  cui’ vokkuanglong  an hmuh tikah a tumzia le a saktu ding minung pawl ih thazang cah dingzia cu an mang a bang ngaingai.

Tu ahcun, a netkhawt ah, tipithuanthum tankai thei ding in ka kut sungah vokkuanglong pakhat a um thlang. Asinan ka pawhsuah thei hlan ah vokkuanglong cu tiar cia ih um ding in bawmtu tampi ka ttul. Long-puanzar pawl a ttul ih, ei-in khal a ttul fawn. Curuangah Blefuscu Siangpahrang hnenah bomnak ka dil sal lala. Asinan cui’ ttum cu thutluknak a tuah man hlan ah Lilliput ihsin thuthang siava a ra thleng.

Caan reipi ka hloh ruangah Lilliput Siangpahrang ih thin in a tuar nawn lo ih, a netnak ahcun rampi phatsannak sualmawh thawn hremnak pek ding ka si ruangah ka kutke pawl ttawntar in nazi pahnih sungah Lilliput ram ih in kuat kir sal ding in Blefuscu Siangpahrang hnenah theihternak ca a rak kuat.

Lilliput ram thawi’ an doawknak ah Blefuscu ram cu a duaitu an si ruangah Blefuscu Siangpahrang cun Lilliput Siangpahrang ih thupek cu a el ngam lo. Ka va tlawn lai ah, amah le a ram mipi pawl thawi’ rualpi ttha kan si hai ruangah in tuahmawh a siang fawn lo. Curuangah a thupte’n i ko ih, amah rian in Lilliput Siangpahrang hrangih ka laksakmi Blefuscu longpawl cu va la kir sal ding in i fial.

Asinan Siangpahrangpawl rian ih um cu ka nin thlang ruangah ka suahsemnak ram ih tlun lawng ka duh thu ka sim sal.

Cumi hnu ni thum a rei tikah Blefuscu Siangpahrang cun puhmawh phunzakip a tel mi cakuat pakhat cu Lilliput ram ah a kuat. Lilliput Siangpahrang ih fialdan vekin ka kutke ttawntarh ding cu a harsat tuk thu, ka thinling tuk ko ih in tuah pang ahcun an ram a pahnih in siatnak nasazet ka thlenter ding thu tarlang phah in, ka hmuhmi vokkuanglong thuhla, le a rei hlan ah ka suahsemnak ram ih ka tlun thlang ding ruangah an ram hnih in ka tanta hai thlang ding thu pawl a tel.

Lilliput ram ihsi thuhla ra kir sal khal hngak lo in, Blefuscu Siangpahrang cun tipithuanthum par tluangtlawnnak hrangih vokkuanglong ka tuahremh-nak ah ka ttul mi hmuahhmuah in bawm thluh. Ka long-puanzar hrangah an ram ih puanthan sahbik cu thuah hleithum in an thuah ih hnattuantu 500 pawl in an tthi. Khawlpat hnakih tum lo an hridai 20-30 hrawng cu ka hrual khawm ih, an ram ih thingkung tumbik pawl khal lawng-puanzar ban dingah ka hau.

Ka tlawnvahnak hrangih lamcaw daihcang aw ding in caw le naa za khat le tuu za thum sa cu ka vokkuanglong sungah ka san. Cuihnu ah vantthat thilthu in ka suahsemnak ram ah nungdam ih ka thlen sal pang asile ka vulh dingah ti’n cawpi nung lai paruk, cawcang pahnih le tuu pawl khal ka phur cih. Ziangtluk ih ram danglam ah ha ka thlen ti ka rualpi pawl ka theihter theinak ding ah hmuhsak ding thilri tthenkhat khal ka la tel. Minung pingkirh te pawl khal cu ken tel ka duh nan, anmah in thlun in duh hman ah hruai hai lo ding in siangpahrang in  tiamkamnak in tuahter.

Pawhsuah ka man tikah Siangpahrang le a innsang cu in thlah ding in an ra. Kei khal in an kut pawl hnam thei ding in leilung parah ka bok. Siangpahrang cun sui tangka 200 cio a tel mi dip sawmnga le amah tia ih suai mi suaizuk pakhat in pe ih, suaizuk cu him ttha seh tiah ka kuthruh sungah ka ret.

Cuihnu, thli a hran tthat caaan ah Blefuscu mipi pawl ih duhsaknak co in ram dangdai Lilliput le Blefuscu cu kumkhaw hrangah ka tansan ta.

Ni thum a rei hnu lawngah long pakhat ka hmu ih, cui long cu ka suahsemnak England ram ih feh ding mi long a si ruangah ka vanttha ngaingai. Long Captain cun lainat zetin in cohlang. Asinan ka thlennak ram danglam zet le ka kutzung hnakih a tum lo mi cui’ ram minung pawl thuhla ka rel tikah ka aa ah a ruat lawk. Caw le tuu fatakte pawl a hmuh hnu lawngah thudik ka rel ti a zum sal ih, ka rel mi pawl cu mangbang zet in a ngai.

Cutin thuanthu dangdai rel ding nei in inn ah ka tlung. Ka nupi fanau pawl cun ka thi zo ti ih an ruahnak hman reipi a rak si thlang. Ka tlunh mi caw le tuu fatakte pawl cu a hmutu hmuahhmuah in an mang a bang ngaingai. Cuihnu, caan a rei hnu ah cu pawl cu sumpai tampi thawn ka zuar hai. Long-minung dang pawl khal in cui’ mangbangza minung pingkirh te pawl umnak Lilliput le Blefuscu tikulh pawl cu hawl hmu ding in vei tam zet an zuam. Asinan zohman in cui’ tikulh pawl cu an hmu sal nawn lo.

Hi bang zuamsuahnak pawl ka ton hnu ahcun inn ah to in ka nupi fanau pawl thawn nuam zet ih um thei ka si. Asinan khualtlawn ka cakhiarnak le hmunram thar le minung hmel thar hmuh ka duhhiarnak cun daitei’ cawl-um thei lo ding in i tur-hnawh. Cutin thla hnih sungah tipithuanthum par ah thleng in khual ka tlawng sal lala. Cui ttum ih ka ton mi harsatnak dangdai pawl cu Lilliput ram ih ka rak ton dah mi pawl hnakin a let tampi’n ttih an nung sawn.

..............Tthen Khatnak A Cem.................