Greek Calai Romual 2 (Greek Khuavang pawl Thuhla)

Greek Calai Romual

Bung (2)

Greek Khuavang pawl Thuhla

Chin mipawl in khawhrum le khuavang umnak tlang kan neih bang in Greek pawl khal in an rak nei. Miphun pakhat ih calai cu cui’ miphun in a zumh, a biak mi khawzing thuhla thawn qhenqhek a theih lo ruangah Greek calai khal Greek khuavang pathian thuhla thawn qhenqhek a theih lo. Curuangah Greek khuavang pathian pawl thuhla kan zoh hmaisat a qul. A cipciar cun a tamtuk ding ruangah, a tlangpi thu vial in kan thlir hnik ding.

Greek khuavang pathian pawl cennak hmun cu Macedonia le Thesolon karlak ih um Olympus Tlang a si. Hitawk ihsin Zeus khawzing in khuavang pathian hmuahhmuah le leitlun pumpi a uk. Zeus hi khawzing Cronus le khawzingnu Rhea ih fapa a si. Cronus hi Roman pawl in Saturn an timi a si. Zeus hi Roman pawl in Jupiter an ti. Cronus hi khawzing Uranus le Ge (Leilungpi pathian) tei’ fa, khawngkham tum zetzet a neitu Titan timi mikei paruk le mikeinu paruk lak ih tel ve mi a si. Rhea khal hi cui mikei tum zetzet paruk lak ih tel ve a si ruangah Cronus ih farnu khal a si ve.

Roman pawl in kumpiram an dik tikah Greek nunphung le calai an cawng, an cawmnung vivo ruangah an khuavang pathian khal an bang aw hai deuh thluh. An kawhnak hmin lawng an dang hai. Greek nunphung le calai hin Roman kumpiram run paltlangh in Europe khawmualpi a run fang suak vivo ih, tuini ahcun leitlun pumpi ah a darhsuak thluh thlang ti kan hmu thei.

Zeus a suah hlan ah a nu Rhea in fa dang panga a nei dah nan a nungdam khawsuak an um thei lo. Zeus ih pa Cronus in a dolh thluh ringring. Ziangahtile a fate pawl lakih pakhat cu amah Cronus hnak in a cak ding ih a lallukhum a long ding tiah kamsang thuphuan a um cia ruangah a si. Curuangah Zeus a suah tikah a nu in a pitlin tiang a thup. Zeus cu Crete tikulh ah a qhanglian. Zeus a pitlin hnu ah apa Cronus cu Crete tikulh ah a va tlawng. Cutawk ah huham le cahnak lam ih amah tluktu a fapa a va hmuh tikah Cronus cu a mang a bang ngaingai. Hmansehla ngian (thluak) hman thiam lam ah Zeus in a neh ban ding timi cu a thei lo.

Zeus cun a pa Cronus cu ngaina le ngaisang zet vekin a rak hmuak der ih a pa sunlawihnak puai tuah ding in thupek a suah. Vanduaithlak zet in Cronus cun sii telh mi sabitti no khat a in ngah ih a luak ciamco. Cutikah a rak dolh mi a fate panga khal a luak suah thluh. Zeus cun Cronus fimharh hlan ih rak tlan hlo thluh ding in a unaupawl cu a sawm hai. A unaupawl khal in Cronus ih hrem an qih ruangah an thlun hai ih, an unauza in Olympus tlangmual ah umhmun an khuar.

Cronus a hung harhfim ih thil umtudan a theihfiang tikah Titan pawl a kokhawm hai ih ralthotu a fate pawl do ding in raldo a phuang. Titan pawl lak ihsin a kum a tar zet mi Iapetus le Iapetus ih fate pawl a si mi Prometheus le Epitmetheus pawl lawng an ra suak lo. Prometheus cu hmailam caan thil thleng ding hmuhcia theinak laksawng ngahtu a si ruangah a cang ding mi ral ahhin Titan pawl an duai ding ti a rak hmu cia. Curuangah a unaupa le a pa cu khuilam hman ih qang lo ding in a sim hai. Ral cu kum hra sung an do aw ih a nehtu, a duaitu a lang thei lohli lo. Zeus le a milai pawl cu Olympus tlangmual zim ihsin qanhmun nasa zet in an khuar hnget.

Netalam ahcun Cronus in raldodan relkhawmnak tonkhawmpi a tuah ih a qanrualpi pawl hnen ah, “Olympus hnak ih a sang sawn mi tlang pakhat tuah uhsi, cutawk ihsin olte’n kan do neh ding ih an ci kan mitter ding,” tiah a sim hai. Cuti’n Ossa Tlang ihta lung tumpipi an thiar ih Pelion Tlang ah an va dawl khawm ciamco. Tlang pakhat kha a pumhlum ih thiar suak in a dang tlang pakhat par ih kan sekkhawm thluh ahcun kan ral pawl ih qankhuarnak tlang hnak cun a sang sawn ding ti ih an ruat ruangah a si.

Asinan a fanaupawl an him lo ding phang zet tu Rhea cun a pasal Cronus dungtun in a fanau pawl a ngaihsak sawn. A fanaupawl hnenah va feh in Cronus le a qanpi pawl ih tumtah thup mi cu a va sim hai. Cun leilungpi hnuai thuk zet sungah huham le thazang cak zet a neitu Cyclop pawl, le mi tumpi pawl kharhkhum an si thu khal a sim. Cu pawl cun cui an umnak hmun ihsi hman in leilungpi hnin thluh ko in an tuah thei. Cuihlei ah Cyclop pawl cu qekhlum (thunderbolt) hriamhrei serdan thuthup theitu khal an si. Cui’ hriamhrei cu Zeus hrangih thil qangkaibik ding khal a si. Curuangah Zeus cu leihnuai khawvel ah a vung qum ih amah an bawm ding asile an thawngtlaknak ihsin a suah hai ding thu a vung sim. Mi tum pawl le Cyclop pawl khal in an rak lungkim qheh. Mi tum pawl cu hnuailam ah ral do ding tiar aw cia in an rak um. Cyclop pawl cu Zeus in Olympus ah a hruai hai ih qekhlum hriamhrei an ser thok lohli.

Cronus le Titan dang pawl cun an hnaquan cu an peh vivo ih a rei hlan ah an tuah mi tlang cun Olympus a hun can. Cutikah tiar aw cia ih rak um mi tum pawl cu Zeus in raldo thok ding in a kawhhmuh hai. Cutikah an umnak hmun, leilungpi laifang ihsin leilungpi cu an sawi hnin ciamco ih Cronus le a qanpi pawl ih tuah mi tlang thar cu a cim thluh. Zeus in Cyclop pawl ih tuah mi qekhlum hriamhrei thawn a ral pawl cu nasate’n a do hai fawn. Cumi an hmuh cun Titan pawl cun nehnak cu an ral pawl ih kut ah a um sawn ti an hmuthiam ih an tlawm.

Zeus in Titan pawl ih umnak ding hmun cu Tartarus timi hmun thuk zet, ttihnung zet le fihnung zet si seh tiah thu a pe. Ni kua le zan kua sung an tlak hnu ah cui’ hmun cu an vung thleng. Cui hmun ah sanmureng in hlamsiah an si lanta. Asinan Iapetus ih fapa Atlas cu hremnak phun dang deuh a tuar. Anih cu kumkhua in leilungpi hi a liang ih pu ringring ding in hrem a si. Kum tar Iapetus le a fapa pahnih, Prometheus le Epimetheus, cu leilung parih an duhnak hmunhmun ah vaktawi ding in thlah zalen an si.

Zeus cu khuavang hmuahhmuah uktu khawzing pathian ah a cang ih, minung khawvel uk thluhtu khal a si. Cuti’n pathian pawl ih hrinkumpi ram pahnihnak (the second dynasty of the gods) cu a thok ih, minung pawl cun Olympian pawl tiah an ko.

Noah san lai ah Pathian fapa pawl in minung fanu pawl nupi ah an tthit thu kan hmuh bang khan Greek khuavang pathian pawl khal in minung fanu le fapa pawl thawi’ neihawk le tlanlen tlang an rak hmang zet. Zeus khal in khuavang fala le minung fala tampi nupi ah a tthi ih fa khal tam zet a nei. Zeus ih nupisur cu amai’ farnu Hera a si. Hera hi Roman pawl in Juno ti’n an ko.

Hera hi a hmel a qhat zet ruangah a uangthuang in a hngal zet. A pasal Zeus khal a nehsawh zet fawn. Nimthla le ttek hriamhrei neitu, nikhaw umtudan herhawitu Zeus rori hman nupi zawn lung ih a um caan a um tinak a si cu! Hera hi ling hnintertu, arsitla (nuhmei fungthul) umtertu a si. Asinan nunau pawl a kilkhawi hleice ruangah fa neih duh pawl in an be ttheu. Zeus le Hera in raldo khuavang Ares (Roman – Mars), meisa khuavang Hephaestus (Roman – Vulcun) le Hebe lasi an hring.

Zeus le lasi dang pakhat in Phoebus (Apollo) le Artemis (Diana) timi faphir an hring. Phoebus hi ni (sun) khuavang a si. Hmelqhatnak, rinumnak, thinlung thianhlimnak, thluak tthatnak timipawl neitu a si. Awnmawi, biazai le harhdamnak lam petu khavang khal a si. Fala hnahkhat Artemis cu thlapi kiltu a si. Naukeng (fapawi) pawl kilkhawitu lasi a si. Zeus le lasi dang pakhat khal in Hermes (Mercury) timi tirhthlah khuavang an hring. Hermes cu tirhthlah quantu khuavang a si vek in a fehcak theinak ding ah a ke ah thla (wing) a nei.

Zeus in a duhbik mi fanu cu tipithuanthum tisuar ihsi hung piangsuak Aphrodites (Venus) a si. Hmelqhatnak lasi ti’n siseh, duhdawtnak lasi ti’n siseh, innsang kilkhawitu lasi ti’n siseh a hmin a thang. Leitlun huap ih lar hiamhiam a si ih hlei ah mawinak ngaina zet Roman pawl lephei cun an tlaihsan zet. Roman pawl in Venus ih mawinak phorhlang ding ih an tuah mi milem hminthang tam zet a um.

Venus khal hi a hmelqhat a uanthuan ttheu ruangah a pa Zeus in ke khatlam ttha lo Hephaestus thawn a neihawkter. Asinan duh le ngaitu a ngah zet ruangah mi dangdang a kop phah thotho ih, Ares thawn khal in Eros (Cupid) timi fapa an rak nei dah. Eros hi samhrisihtu khuavang a si ih, a liang khatlam khatlam ah thla a nei. Duhdawtnak fei le thal keng in a vak ttheu. Ngaizawng aw ding ih a duh mi fala le tlangval tuak khat cu a thalfang thawn a sai hai qheu. Cuti ih a sai mi cu ngaiawk tengteng a si ko.

Zeus le Demeter (Ceres) in Persephone (Proserpina) timi fanu an nei fawn. Persephone hi mithi khaw siangpahrang Pluto ih nupisur a si. Pluto hi Zeus ih u a si ruangah Persephone cu a tunu khal a si ve lala. Zeus in a pai’ siangpahrang tohkham a lon ttum ahkhan Pluto in a rak bawm. Curuangah Zeus in Pluto cu mithi khua uktu ah a tuah. Cubang in a rak bawmtu thotho a si mi a u Poseidon (Neptune) khal tifinriat a ukter.

Zeus in a thluakbawm ihsi piang Pallas Athene asilole Athena (Minerva) timi fanu khal a nei fawn. Raldo lasi a si ih a rung suah lai khal ah ralthuam famkim hruh cia ih rung suak a si. Thluakbawm ihsi piang a si ruangah fimnak lasi titu khal an um. A hmel khal a ttha zet. Lasi hmel qha hrilnak ah a zuam ve. A zuam mi cu Zeus ih nupisur Hera le mawinak lasi Venus an si. Himi thu hi Homer ih Iliad bezaipi thuhla ah kan peh leh ding.

Zeus le minung fala in an hrin mi lakah Perseus hin khuavang thawn a pehpar mi calai sungah hmunram a luah nasa. Perseus hin tidai mikei hnenih raithawinak ah hman ding ih hrentarh mi Andromeda a runsuak. Cumi a runsuahnak ah Hera khal in a bawm. A runsuak ngah in an nei aw ih khawpi an din. An thih hnu ah Zeus in van ah hmunram a pe. Tuini tiang in kan hmuh thei mi Perseus le Andromeda arsihlawm khi an si.

Zeus le minung fala in an hrin mi midang pakhat cu Hercules a si. Hercules hi Hera in a molh ruangah a nupi fate pawl a thah hai. Cumi sualnak ruangah hremnak ci hleihnih thawn hrem a si. Cumi hremnak pawl lakah kiosa, rulpi, mura (khau tumbik), caw-aa, rangpi sual tivek donak le thahnak pawl khal an tel. Caw 3,000 retnak hmun, kum 30 sung thianfainak tuah lo mi, Augeas siangpahrang ih caw-inn ni khat sungih thianfaiter thluh ding tivek hremnak khal a tel. A netabik ih an fial mi cu mithikhua kiltu uicangpi minung ram ah vung hruai suah hnu in, mithikhua ih vun thlah kir ding timi a si. An hremnak pawl hi midang ih ttuansuah rual lo hlir, Hercules lo bak cun ttuansuah theih lo ci lawnglawng an si ruangah hnaquan khunghar tuk cu ‘Hercules ih hnaquan a si’ timi ttongfim khal a rung um lanta (Myanma Swesone Kyan, Vol. 14).

Greek pawl in khuavang an biaknak ah minung ih raithawi tla an rak cing dah timi sulhnu hmuh ding khal a um. Homer ih san a thlen tikah Olympus tlangmual par ih ceng khuavang pawl (Olympians) kha Greek pawl in an bia. Khuavang cu an sin an an cetcangdan le lungput mizia cu minung thawn an bangrep deuhthaw. Duh le huat, doawknak, phiarthupawknak, bumawknak tivek khal an nei, an hmang. Asinan minung pawl ih felnak le qhatnak pawl cu an ngaina, an vei ve zet lala fawn. Homer san ahcun minung ih raithawi an hmang nawn lo tiah sanphung mithiam pawl in an zum.

Khuavang hnenih thusuh khal an hmang nasa. An puithiam pawl in thusut duhtu ih khuavang a pek mi ar, vate, tuu, kel/me, vok, caw tivek pakhatkhat ih thin le lung zoh in an rak simfiang ttheu. Lehhnu lam ahcun khawpi kiltu khuavang, khawte kiltu khuavang pawl an thupi vivo. Athens khawpi in Athena lasi an bia. Corinth khawpi in Poseidon an bia. Lehhnu lam vivo ahcun khawpi-ram dinhmun an hung thlen vivo ruangah rampi kiltu khuavang tiang an run nei (M. Cary and T. J. Haarhoff, Life and Thought in the Greek and Roman World, University, Paperbacks Matheum, London, 1961).

Khuavang, khawzing biak caan le an hrangih con tuah caan tivek ah hlasak, laam tivek an run nei vivo. Curuangah an biak mi le con an tuahsak mi khuavang thawn a pehpar mi biazai le thutluang phunphun khal calai khawvel ah an rung lut. Hmun tam zet ah phei cun khuavang biaknak hi calai ih bulhram vek in a lang ttheu.