Gulliver ih Khualtlawnnak pawl V

Gulliver ih Khualtlawnnak pawl

Bung V

Ka Ral pawl in Siatsuah In Tumdan

Ni malte sung cu Lilliput ram ih mi larbik le ngaisan hlawhbik ah ka cang. Ram pumpuluk siatralnak ding ihsi ka runsuah ruangah mi hmuahhmuah cu thinlung takin ka parah an lung a awi. Asinan uktu dang pawl vek thotho in, himi Siangpahrang thawi’ rualpiawknak khal hin, rei a daih lo thu tarlang a ttul hi ka riah a se zet. Siangpahrang cun Blefuscu raldo longcpawl ol-aitei’ ka kaihdan a hmuh tikah a duh-amnak a pung vivo.

Siangpahrang cun a tanglai mi Blefuscu long pawl khal va kaihter in duh ih, Blefuscu tikulh cu Lilliput ram ih kuthnuairam ah ret a duh. A ngaingai ahcun Blefuscu ram minung pawl khal kha, Lilliput ram daan vekin, arti an ei tikah a zimlam ihsi khuai thawk hai ding ih fialtu ding ah in duh fawn.

Asinan Siangpahrang ih duhdan pawl ka theih tikah bawm lo ding in ka el. Mi zalen le ralttha pawl sal ih tuah cu ka duhdan a si lo tiah ka sim. Tu ahcun Lilliput ram cu dotu ding ral lak ihsin a him zo ruangah ram pahnih karlak ah tawhawk buainak um ding zawng ih bom cu ka duh lo.

Cuti ih ka sonnak ttongkam a theih tikah Siangpahrang cu a thin a heng zet ih, lehhnu tiang in in ngaidam sal nawn lo. A hleice in Blefuscu Siangparang hnenah a ram va zoh ding ih siannak ka dil tikah amai’ parih rin-um nawn lo vek tiang in i ringhlel. Cumi ihsi thokin in zum ngam nawn lo.

Zan khat ah, ka rak bom dah mi ka rualttha zungbawi pakhat cu ka inn ah a thupte’n a ra ih biakawknak caan in dil.

A  zawnlang-tohkham (sedan chair) cu cabuai parah ka ret sakih a ttong mi ngai ding in zial parah ka to. A ka cu ka hna kiangte run naih in thuthang pakhat i run sim tikah ka thin a thir ngaingai. Siangpahrang thuron petu pawl cu a thupte’n thu relkhawmnak an nei ih ka thuhla an rel thu, ka ral a si mi Sumkiltu in Lilliput ram phatsantu a si ti’n in puh thu, caan rei zet sung an relbuai ciamco hnu ah Siangpahrang thuron petu pawl cun keimah cu thih hremnak pe ding in an lungkim thu in sim. Sumkiltu le a rualpi pawl cun keimah cu nung cing ih meisa thawi’ ur ding in asilole tur hnih mi conkiang thawi’ sai that ding in ruahnak an pe. Asinan Siangpahrang cun lainatnak a langter ih ka mit pawl phorhsak in ka mit a cawt hnu ah ti-lo-rawl-lo ih ret in nuamtetei’ in that ding ah a ruatcat sawn ti thu pawl khal in sim.

Ni thum sungah Siangpahrang ih thupek cu theihter ka si ding ih, a ralkap pawl cun hremnak in pe thok ding a si ti’n ka rualpa cun in sim fawn. Asinan kei cu sualnak neitu ka si lo ruangah daan tatnak rak hngak cuahco cu ttul in ka thei lo. Cuhnakin tlansuak ding in ka ruatcat sawn.

Ka hrangih hmun ralhim cu Blefuscu ram lawng a si. A ram ih va tlawng ding in Siangpahrang hnenah siannak ka dil zo fawn ruangah, tu ah va feh cih lawlaw ding in ka ruat cat. A hmaisa ah, ni rei lo te sung khual ka tlawng ding ih a rei hlan ah ka ra kir sal ding thu Lilliput Siangpahrang hnenah ca ka kuat. I thah a tum thup ti ka theih thu kha a theih ka duh lo. Cu ttheh in long-cawlhhmun ah ka va suk ih raldo long pakhat la in ka neih mi thilri hmuahhmuah cu tthaten ka ttawnkhawm. Cutin muangcang nawn lo in, long cu ka dir phah ih, Blefuscu lam ah tidai cu ka hei leuh phei.

Khatlam tikulh ka va thlen tikah long-cawlhhmun kiangkap ih mi pingkirh pawl cu site vekin hmun tin ah an vak hngelhngo rero. An hnen ah vei khat ka thleng dah zo ih, harsatnak ka pe hai ti an vun mangsuak.

Asinan tui ttum ahcun rualpi pakhat dinhmun ih ra ka si thu ka langter thei lohli. Ka neih mi thil hmuahhmuah cu long thawn tanta in khawlipi ih fehnak lamzin in khihhmuh hai ding in hoih-hawm zet in ka dil hai.  Mi pahnih in in bawm ding in rem an ti ih, an pahnih cu ka kut sungah hum in tikulh cu ka paltlangh thok. A rei hlan ah khawlipi cu kan va thleng ih, lamhmuhtu pahnih cu Blefuscu Siangpahrang hnenah thlah in ka ra tlawn thu ka va simter hai.

Siangpahrang cu keimah tong ding in a innsang zate thawn an ra poksuak ih, a ram le a ram minung pawl ka hmuh duh hai ruangah rei lo te sung ra tlawng duak ka si thu ka sim. Ka parih Lilliput Siangpahrang in i huat thu cu ka sim tel lo, ziangahtile keimah rak cohlan a ttihnunzia a theih pang ahcun in rak cohlang ngam lo ding asilole cui’ tikulh parah in umter ngam lo ding.

Tui ttum ahcun rualpi pakhat dinhmun in ka ra a si timi langternak ah leilungah it-zau in Siangpahrang ih kut cu ka hnam. Mi ralttha a sizia cu vei-le-khat ih amah tthial cip thei thluhtu ding tluk ih tum ka si cing in amah ka hei naih lai ah zaam lo tei’ a rak um theinak in a langter. I ttih lamlam cu rel hlah, lainat zetin i bia ih hahdamtei’ ka um theinak dingin a tirhkahpawl cu a tawlrelter hai.  Cutin ni malte sung cu siatsuahtu ding doral ttihphan ding um lo in daite’n ka um thei ih, ziangtivek kawngzawng in ha ka luatsuak thei dingih ka suahsemnak ram ah ka thlen thei dan ding ti ka suangtuah rero.