Bung I
Hebru Timi Simfiangnak
Hebru timi ttongfang hi Hebrew timi ttongfang kha Chin pawl in
kanmai’ lei tal mil ih kan kawhdan a si hmang. Hebru timi cu hlansan Kanan ram
ih ceng miphun pawl hman mi ttong phun khat a si (Encyclopaedia Britannica, Vol.
11, 1946.). Kanan ram cu tuisan Egypt ram ih Nile tivapi le Iraq ram ih
Euphrates tivapi karlak hmunram ah a tel ve. Ttongphungphai (linguistics) lam
ih thlir cun Kanan miphun pawl hi Semite hrin lakih tel ve an si ih an hman mi
ttong hi Semitic phunhrin pawl hman mi ttong hngettek pakhat a si.
Semitic phunhrin hi, Indo-European phunhrin siar lo ahcun, leitlun
ih phunhrin larbik a si. Santhuanthu kan theih hlatbik mi pawl ah miphun ropi
le ram-uk kau pawl in Semitic phunhrin ttong an rak hmang. Curuangah hlan san
calai romual ah an keneh a tam zet. Tuisan ah Indo-European phunhrin ttong in a
run luahlan ko nan, an sulhnu cu hmuh ding a tam zet lai thotho. Cun, hminsin
tlak zet pakhat cu cafangkom le cangan rak thiam hmaisa, rak nei hmaisa an
sinak hi a si (U Phay Maung Tin, Barthar Lawka Kyan, Myanmar Naingngan
Bartharpyian Sarpay Athin, Sarpay Beikman Poungnhyktaik, Yangon,1958).
Semitic phunhrin ttong ah saklam Semitic phunhrin ttong le
thlanglam Semitic phunhrin ttong ti’n an tthen leh. Tuisan ih an hmanmi Hebru
ttong cu saklam Semitic phunhrin ttong ih rung suak a si. Hebru ttong hmang
phunhnam pawl hi mi vaktawi, umhmun cer hmang phunhnam an si. An thlennak hmun
ih ttong khal an va cawng ih, an ttong ah an lalut vivo. Curuangah Hebru ttong
ahhin Aramaic, Greek le Latin ttong pawl tla an tel tam phah ve. Cun Hebru
ttong ihsi rung suak Yiddish ttong hi Hebru le Prussian ttong cawhpawlh mi a
si.
Hebru ttong hmangtu miphun kha Yehudha ti’n an ko. Curuangah
Yehudha pawl ih hman mi ttong khal kha Yehudhi ti khal in an ko lala. Yehudha
ihsin Greek le Latin ttong ih an thlengh tikah Judah tiah a suak. Cui’ Judah ttongfang
ihsin Jew timi a ra suak lala (Encyclopaedia
Britannica, Vol. 32, 1946). Tuisan ah Israel ram sung le ram leng ih um,
Hebru ttong hmang phunhnam cu Jew ti’n an ko. Jew timi cu miphun kawhnak hmin a
si ih, Hebru timi cu Jew miphun pawl ih hmanmi ttong le calai hminputu ttongfang
a si.
Tu hrih ahcun kan Chinmi tamsawn cun Jew miphun ti hnak in Israel
miphun ti hi kan hmang tamsawn a bang. Ziangkhalsisela tui ttum ahcun leitlun
pumpi ih an hman tam deuhmi Jew ti kan hmang hnik pei.
Bung II
Jew Miphun Sanphung
Jew miphun pupa pawl cu Euphrates tivapi kehlam kap ih hlan san
Sumerian ram khawlipi Ur khawpi ihsin, hlan lai Palestine (Filistin) hmunram ih
runglut miphun an si tiah sanphunglam mithiampawl in an ngan. Bible sung khal ah
Jew miphun pawl ih pupa a simi Abram (lehhnu ih Abraham rung si leh) cu Ur khua
ihsin ram thar pan ih a feh thu kan hmu. BC 2,200 hrawng ih thlahsin aw thok an
si ih, Abraham, Isak le Jacob pawl hi an pupa hminthang an si. BC 1,500
hrawngah Palestine ram ihsin Egypt ah an lut. Asinan Egypt ram ihsin BC 1,300 -
1,200 hrawngah Moses in a hruaisuak hai ih, Sinai tlang hram ah an beu lawk.
Moses cu Pathian in Sinai tlang parah ko in Thukham Pahra a pe.
Moses in cui’ Thukham Pahra ngannak lungpheng cu Levi hrin hnen ah a ap. Jew pawl
cu an tumram thleng thei lo in, nelrawn ramcar ah kum 40 sung an vakvai. Moses
a thihhnu ah Joshua ih hohanak thawn Kanan ram an do neh. Cui thok in Jacob ih
fapa 12 pawl ih tefasin hrin 12 pawl cu ram zem aw in umhmun hnget an khuar.
Hrin dangpawl saklam ah an um ih, Judah hrinpawl cu thlanglam ah an um. 
Kanan ram an thlen hnu kum tawkfang sung cu Thutthentu pawl in
rampi ukawknak an kaihhruai. Lehhnu ah Siangpahrang ukawknak an run hmang. Saul
in siangpahrang a ttuan hmaisabik. Siangpahrang Saul hnu ah Jew pawl sanphung
sungih hminthang zet Siangpahrang David a rung lal. David a thih hnu ah a fapa
Solomon in siangpahrang a ttuan. Solomon san hi Israel ram le miphun an par
laifang, an hmuingil laifang a si. Ram sung mipi an hnianghnar, ral a dai ih
venghnen ram pawl thawn an rem aw.
Solomon a thih tikah Israel ram cu Judah hrin ram le Israel ram
ti’n a tthen aw. BC 721 ah Israel ram cu Babylon kut hnuai ah a tlu. BC 586 ah
Judah ram khal a tlu ve. Babylon siangpahrangpawl kuthnuai ah kum reipi an um.
Zalennak ngah ding in vei tam zet an zuam. Maccabees timi puithiampawl in
phunhnam hruaitu an ttuan san ah mahte ukawknak an rak ngah ve thei.
Asinan Roman Kumpiram huham tuar lo in BC 63 ah Roman Kumpiram
kuthnuai ah an tlu lala. Himi san, BC 6 - 4 hrawngah Jesuh Khrih a suak. Kum 30
in sakhuanaklam rawng a bawl thok. A
dungthlun an karh vivo tikah nahsiktupawl heknak a um. AD 26 in 36 tiang Judah
ram a uktu Pontius Pilate in puhmawh hawl in thinglamtah ah a thlai that.
Khristianpawl in a thih hnu ni thum ah a thosal tiah an zum. AD 70 kum ah Roman
siangpahrang Titus in Jerusalem a tthiatdarh ih Jew miphun hmuahhmuah cu a
thuneihnak ram ihsin a dawisuak thluh.
Cuimi ihsi thokin Jew pawl cu khua le ram mumal nei lo in Asia le
Europe khawmual ih ram dangdang ah an vak an tawi hai. England ram ih bukhuar pawl
cu zabi 12 ah England ihsin dawi an tuar bet. Zabi 17 ah England ih lut an
siang sal. Cumi ihsi cun England ram ah England rammi sinak nei in an tlangleng
ih milian, bawi upa le sumdawng neinung tivek tla an tam zet. Siangpahrangnu
Victoria san ih Tlangbawipi Benjamin Disraeli, Earl of Beaconfield, tla kha Jew
miphun a si hngehgne.
Miphun dang ram ih um Jew miphun pawl cun miphun thleidannak
ruangih rekbehnak le sulhsiatnak phunphun an tuar. Curuangah Jerusalem khawpi
umnak Zion tlang a ngainatupawl (Zionist) ih cangvaihnak cu 1897 ah a suak.
1921 ah an cangvaihnak au-aw a ring sinsin ih Leitlun Ralbuai Ttumkhatnak le Ttumhnihnak
karlak ih din mi Palestine ram sungah Jew miphun hrangih hmunram pakhat pe ve
ding in an dil. Hitler in 1933 ih Germany ram a uk tikah, Jew miphun cu nuai
cimih tum in a hrual ciamco ih, million 6 lenglo an thi.
Leitlun Ralbuai Ttumhnihnak a cem tikah Leitlun Ram Ttangrual
Pawlkom (United Nations Organization) in Israel ram a dinsak. Cutin 1948, May
14 ah Jew miphun cun ram zalennak an phuang.
No comments:
Post a Comment