Bung III
Hebru Bible Thuhla
Hebru Bible cu Khristianpawl in Thukam Hlun kan timi khi a si.
Anmah cun TaNaCh (Ttanakhah asilole Ttanatkhah) tin an ko. TaNaCh timi cu Torah
cabu, Nevi’m cabu le Ketuvim cabu, an pathum pawl ih hmin cafang hmaisabik
lakkhawmmi a si (News from Israel, Vol. XX, No. 24, Dec. 15, 1973).
Hebrupawl cun TaNaCh cabu hi BC 1,300 hrawng ihsin kum thawng khat sung hrawng ah
mi dangdang in an ngan vivo tiah an zum.
Torah cabu ah butthen panga a um. Cui’ butthen panga cu Khristian pawl
in Pentateuch (Cabu Panga) tiah an ko. Semtirnak, Suahlannak,
Puithiamhnattuan, Mipumsiarnak, Daanpeksalnak tipawl an tel. Lei le van sersiam
thuhla, thlahsintu pupa pawl thuhla, Jew pawl Egypt sal ih an tan thuhla, Kanan
ram ah lut in ram an din thu tivek le an thlun ding mi daan phunphun, serh le
sang phunphun thuhla pawl a um. Himi cabu panga pawl hi Moses in Pathian hnen
ihsin a rak donson mi thuhla pawl an si tiah simsin thuanthu a um ih, an zum
hnget fawn.
A tthenhnihnak Nevi’im cabu cu tthen hnih ah tthen a si. Tthen khatnak
ah profet hmaisa pawl ih cabu a um ih BC 1250 hrawng ah Joshua ih hohanak
thawi’ Kanan ram an lut ihsin BC 586 ih Jerusalem Biakinn hmaisa a siat tiang
ih Jew pawl tontehmi le Israel ram hawiherawkdan tivek thuhla pawl nganmi a si.
Nevi’im tthenkhatnak sung ih tel mi cabu pawl cu Joshua, Thutthentu, Samuel
cabu pawl le Siangpahrang cabu pawl an si hai.
Nevi’im cabu tthen hnihnak ah profet neta pawl ih simsungnak thuhla pawl
a um. Cu pawl cu Isiah, Jeremiah, Ezekiel le profet te deuh 12 ih cabupawl an
si.
Ketuvim cabu ah butthen 12 a um. Cumi butthen 12 cu hmun thum ah an
tthen leh. Tthen khatnak ah Saam, Thufim le Job an tel. Tthen hnihnak ah
Solomon Hla, Ruth, Thusimtu, Ttahhla, Esther pawl an tel. Tthen thumnak ah
Daniel, Ezra le Nehemiah ti’n bu khat ih kom mi le Sansiarnak cabu ti’n bu hnih
a um.
Cuti’n Torah cabu panga, Nevi’im cabu pariat le Ketuvim cabu 11,
an zate kom in bu 24 a suak (Enclyclopaedia Britannica, Vol. 3,1946.). Himipawl
hi Hebru ttong ih ngan mi an si ruangah phunhnam dang ttong hmangtu, a hleice
in saltannak tivek ruangih Greek pawl le Greek nunphung hnuai ih tthanglian Jew
pawl tivek in, an theithiam nawn lo. Curuangah BC 300 hrawngah Greek calai
mithiam Ptolemy Philadelphus in mithiam sawmsarih pawl kha Greek ttong in
an lehter hai. A lettu mipum zat hmin cawi in Septuagint (LXX) tiah an ko. (Sawmsarih
maw, Sawmsarih le Pahnih an si deuh timi buainak tenau deuh cu a um.) Himi
Septuagint hi amah Hebru ttong ih ngan mi si lo ahcun a dik, a tthabik ti ih
pom mi a si.
Hebru Bible hi Jew miphun biaknaklam zirhtu Rabbi pawl in
hrilkhawm in Jesuh suah hlan kum 100 hrawngah an rak nemhnget. Anmai’ tthendan
ih bu 24 um mi kha English ttong ih an lehlin mi ah bu 39 ah an tthen sal. A
hrampi Pentateuch bu nga le cabu dang 34 kom mi ti zawng khal in rel a theih.
Profet tenau 12 pawl cabu pakhat ih an rak komkhawm mi kha bu khat ciar ih an then
sal ruangah, le cabu dang khal kop mi le tthenbet mi tivek an neih vivo ruangah
a si.
Hnon mi Cabu (Apocrypha)
Thukam Hlun le Thukam Thar kan timi karlak ahhin kum 200 sung
hrawng a tla. Mihrek cun kum 400 sung lai a si an ti. Cumi kum pawl ah mithiam pawl
in cabu dangdang le Thukam Hlun sungih thuhla tthenkhat simfiangnak cabu pawl
an ngan. Cumi an ngan mi lakih filawr deuh cabu 14 hrawng a um. Cu pawl cu
Hebru mithiam pawl in Bible sungah an telh lo. AD 382 ah mithiam Jerome in
mizaran hman mi Latin ttong thawi’ Bible a lehlin tik khal ah telh a tum lo
nan, mipi pawl in telh ding ih an dil ruangah a telh sal. Jerome ih lehmi Bible
hi Vulgate (ttong tualleng) tiah an ko. Himi cabu 14 pawl hi hnon mi cabu
(apocrypha) tiah an ko. Asinan calai mitthawi’ kan zoh ahcun an mawihnai in an
cuangmuar ve zet thotho ko.
Hnon mi cabu pawl tla cu:
- Adam
le Evi Cabu Pakhatnak (The
First Book of Adam and Eve)
- Adam
le Eve Cabu Pahnihnak (The
Second Book of Adam and Eve)
- Enoch
ih Thuthup Cabu (The
Book of the Secrets of Enoch)
- Solomon
ih Saam Hlabu (The
Psalms of Solomon)
- Solomon
ih Merhbulnai Bezai pawl (The
Odes of Solomon)
- Aristeas
ih Ca (The
Letter of Aristeas)
- Maccabee
Cabu Palinak (Fourth
Book of Maccabees)
- Ahikar
ih Thuanthu (The
Story of Ahikar)
- Pupa
Hleihnih Thutiamkam (The
Testaments of the Twelve Patriarchs)
- Testament
of Reuben
(Reuben Thutiamkam)
- Testament
of Simeon
(Simeon Thutiamkam)
- Testament
of Levi
(Levi Thutiamkam)
- Judah
Thutiamkam (The
Testament of Judah)
- Issakhar
Thutiamkam (The
Testament of Issachar)
- Zebulun
Thutiamkam (The
Testament of Zebulun)
- Dan
Thutiamkam (The
Testament of Dan)
- Nafatali
Thutiamkam (The
Testament of Naphtali)
- Gad
Thutiamkam (The
Testament Of Gad)
- Asher
Thutiamkam (The
Testament of Asher)
- Joseph
Thutiamkam (The
Testament of Joseph)
- Benjamin
Thutiamkam (The
Testament of Benjamin)
Thukam Hlun cabu ngan tlai deuh mi pawl le hnon mi cabu pawl an
ngan rero lai can ahhin Jew pawl cu miphun dangdang pawl in sehsol ah an hmang;
miphun dangdang kuthnuai ah an talbuai rero. BC 500 luan hrawng, Persian pawl
in Babylon Kumpiram an din lai ah Jew hrekkhat cu Jerusalem ah tlunsaltheinak
canvo an rak ngah. Asinan BC 400 luan hrawng ihsin Jesuh Khrih piansuah tiang
ah Alexander Ropi (Alexander the Great) tivek Macedonia siangpahrang pawl,
Ptolemy tivek Egypt siangpahrang pawl le, Antiochus tivek Syria siangpahrang pawl
in anmai’ hman mi Greek nunphung sungah Jew pawl sengh-lut tum in an nor
ciamco. Roman Kumpiram hnuai ah lephei cun Jew pawl cu vansannak tongkhong in a
nuai ciamco hai ih, an Bible in a rak simcia mi Rundamtu Messiah an ruahsannak
a sang sinsin. Miphun dang ukbehnak hnuai ihsi zalennak sualsuahpitu ding an
hngak a si bik.
Thukam Thar (The New Testament)
Jesuh Khrih a rung suah tikah Messiah a si ti ih zumtu le zumlotu
an um. Messiah ka si rak titu an um ttheu zo ih hlei ah, phunhnam dang nunphung
le khawruahphung (philosophy) in a hliahkhuh phang emem tu Jew miphun tam zet
thinlung a buai. Ziangti thu khal va si sehla Khristian sakhua cu a karh ve
vivo ruangah Khrih hrangih ram nortu pawl in Jesuh cu Khrih (Messiah) a si thu,
le a tanta mi khawruahphung kilhimnak hrangah ca an ngan. Cui’ an nganmi cu
Thukam Thar kan timi hi a si. Thukam Thar hi Khristian pawl hrangah a si bang in
Jew miphun sakhuanaklam zirhtu pawl in Jesuh kha Messiah a si ti a zumlotu Jew pawl
tamsawn hrangih an nganmi Talmud khal a um.
Khristian pawl ih Thukam Thar khal siseh, Jew pawl ih Talmud khal
siseh, Thukam Hlun kan timi Hebru Bible thawn an pehpar aw veve. Talmud thu cu
neta ah a hran in kan rel leh ding. Thukam Hlun hi Hebru calai a ropitzia
pholangtu lawng si lo in Jew miphun sanphung hminsinnak cabu pi khal a si.
Thukam Thar cun miphun pakhat thuhla a thlurh nawn lo nan Khristian sakhua ih
hnukhripi le cangvaihnak thuhla pawl a tarlang (John Macy).
Thuthangttha Cabu Pali:
- Matthai
- Marka
- Luka
- Johan, le
Kawhhran dinsuahnak thuhla ngan mi
- Tirhthlah cabu
Cakuat Hleihnih a si mi
- Rom
- Korin I & II
- Galati
- Efesa,
- Filipi,
- Kolose
- Thessalon I & II
- Timote I & II
- Titas
- Filemon
- Hebru
- Jeim
- Piter I & II
- Johan I & II & III
- Judas
Simsungnak cabu a si mi
- Thuphuan
ti’n a zate kom in cabu 27 a um.
Thukam Thar khal hin hnon mi cabu a nei ve. Hnon mi cabu pawl cu:
- Jesuh Khrih le Edessa Siangpahrang
Abgarus ih Cakuatpawl (The Epistles of Jesus Christ and
Abgarus King of Edessa)
- Tirhthlah Paul in Laodecean pawl a
kuat mi Cakuat (The Epistle of Paul
the Apostle to the Laodiceans)
- Tirhthlah Paul ih Seneca hnen
Cakuat, Seneca in Paul a kuat mi khal tel (The Epistles of Paul the Apostle to
Seneca, with Seneca's to Paul)
- Clement in Korinth pawl a kuat mi
Cakuat Pakhatnak (The First Epistle of Clement to the
Corinthians)
- Clement in Korinth pawl a kuat mi
Cakuat Pahnihnak (The Second Epistle of Clement to the
Corinthians)
No comments:
Post a Comment