Bung IV
Bible Calai
Thutluang
Bible hin Europe le Asia khawmual nitlaklam ram pawl ih calai a
hliahkhuh hmaisa. AD zabi 16 ihsin missionary pawl ih tlawmngainak zarah Asia,
Africa, Thlangta le Sakta America khawmualpi pawl sungih ram tampi ah Bible in
sulhnu a nei vivo. An calai le nunphung ah Bible sungih khawruahphung le
nunphung a lut vivo. A hleice in Europe khawmualpi le America calai ah Bible ih
hmelhmang cu hrelh le tthelh rual lo in a tam. Kan Chin khawvel khal ah Bible
hin ‘thok-palek’ a ttuannak a rei ve thlang.
Thutluang Zening (Prose Style)
Ziang cabu khal a ngantui’ hman mi thutluang zening ih zir in,
asilole biazai kalhmang ih zir in, siar a nuam in a nuam lo thei. Hebru Bible
siseh, Greek ih nganmi Thukam Thar siseh, cumi pawl ttong dang ih an lehlin mi
siseh thutluang zening ttha an si tlangpi; hnam tenau pawl ih lehlin mi cu a si
thluh lo men ding nan. English Bible lephei cu a thutluang zening an rem
leuhleuh ruangah English ttong ih ngan mi catluang lak ahcun belhcian dawlbik
ah a ding deuh ringring. Asinan Literal Translation (a ttongfang zulh rori ih
leh) hnget lutuk ih thlunmi ahcun cutluk in a thutluang zening a ttha lemlo tla a
si thei. Tu hrih ahcun, Chin ttong ih Bible lehlinmi ah Dr. Stephen Hre Kio ih
lehlin mi Baibal Thianghlim hi a thutluang zening a tthabik.
Amah Hebru ttong ih an rak hman mi thutluang zening khal a ttha
zet. Thuhla tampi, kaupi kha tluangtlamte le felte’n an ngan. Curuangah
nitlaklam calai mithiam pawl in Bible ih catluan remkhawmawk dan cu ceibawl le
thuam mawi ciamco um lo in, tluangtlamte le fiangfelte’n nganmi a si ruangah
thazaang a nei ttha tiah an ti (Will Durrant). Rotling calai tamsawn cu hivek
an si hai. Phunhnam ropi dangdang ih rotling calai kan zoh khal ah san le can a
rei hnu khal ih fiangfel ringring thei thutluang zening an hmang deuh thluh hai.
Cumi cu an damreinak thuthup pakhat a si cih fawn.
Phun le hnam tin hin Lei le Van sersiam thuhla, Minung semsuahdan
thuhla tivek le sualnak ra um thokdan thuhla tivekpawl hi mah le zumdan kan
nei. Mahte cio in sirhsanmi thuanthu khal kan nei. Asinan Khristian sakhua a
thlennak le Khristian sakhua in a hliahkhuh mi nunphung ahcun cupawl cu a
thleng danglam aw ttheu. Cui rak zum cia mi thuhla pawl ih zawn ah Seemtirnak cabu sungih Lei le Van
sersiam thuhla, Minung semsuah thuhla, sual ih an tluk thu, Tilik thu tivekpawl
an lut ih, mai’ rak zumdan kha an ra luahlan. Himi sersiamnak thuhla hi minung
khawruahphung hmuahhmuah ih hramthlaknak zawn khal a si cih ruangah, Seemtirnak
cabu in phunhnam tampi a hliahkhuhdan ding cu a langfiang mai.
Russian nunthuleng nganthiam ropi Leo Tolstoy cun Seemtirnak cabu
sungih Joseph thuanthu hi nitlaklam calai ih thuhla relkirsalmi thuanthu
(retold narrative) fehdan ah a tthabik mi a si a rak ti (John Macy). Joseph ih
thuanthu kan zoh asile nunthuleng ruang-am ttha zet hmang ih duansuah mi a si
ti kan hmu thei. Joseph a thih hnu, Egypt ram ah Joseph theilotu Pharoah thar a
suah thu tiang kan siar tikah, Seemtirnak cabu ngantu ih thuhla remkhawm
thiamdan, mi thlimthluai a thiamdan tivekpawl fiangte’n kan hmu thei.
Israel pawl Egypt ram ih hremnak le rekbehnak phunphun an tuar
ihsin Moses in a hruaisuahdan thuhla pawl cu Suahlannak cabu ah kan hmu thei.
Suahlannak cabu sungih kan hringnun hliahkhuhtu bik ih lang cu, Sinai tlang ah
Pathian in Moses a pek mi Thukham Pahra hi a si hmang. Puithiamhnattuan,
Mipumsiarnak le Daanpeksalnak pawl khal ah kan suangtuahnak khawvel le thih hnu
khawvel kan ruahsandan tivek in hliahkhuhtu thuhla tampi an um. Seemtirnak
ihsin Daanpeksalnak tiang, cabu panga hi Chin nunphung bulhram ah a cang
deuhthaw thlang a bang asilole a rak cang pumhlum zo khal a si thei.
Moses ih cabu panga (mihrek cun JEDP nganmi an ti) ttheh ah Joshua
cabu kan hmu. Himi sungah Jew pawl in Jordan tiva an tan thu, Jericho khawpi
hauhruang a cim thu, ni le thla an din thu tivek thumaksak zetzet kan hmu thei.
Hivek thuhla pawl an relbawldan hi Epic bezai relbawldan thawn khaikhin theih a
si ve tiah an ti (John Macy). Thutthentu cabu ah siar le ngai a nuam zet mi
Samson le Delilah ih thuhla kan hmu thei fawn. Himi thuanthu densen ih English
bezaipu ropi John Milton in Samson Agonistes (Samson ih Tuarnatnakpawl) timi
bezai a phuah. Amah Milton khal upat hnu ih mitcaw a si ve ruangah Samson a mit
a cawt tikih a tuarnatnak pawl a ngan tikah a thiam ngaingai ih, cui bezai khal
leitlun ih bezai hminthang ah a cang.
Ruth cabu hi a tawi zet nan a thupi zet. Nunthuleng ttha zet
pakhat a si. Mo ttha le fel zet Ruth cun amai khua le ram a si mi Moab ram
tanta in a thi zo mi a pasal ih ram a si mi Israel ram ah a ni (a pasal ih nu)
thlun ih a feh thuhla hi English bezaipu hminthang P.B. Shelly cun bezai a rak
phuah. Himi ah Ruth cun amai’ khua le ram a ngai dingzia kha bezaipu Shelly in
a rak suangtuah sak. A bezai ‘Ode to the Nightingale’ (Hlazaiva Hnenah) timi ah, “Ruth in midang khua le ram
ih thlawh-lai lorawn ah amai’ khua le ram ngai in a mitthli a hnul rero bang in,
nang, hlazaiva khal in inn na ngai ruangah zaihla na vawr si na hlam?” tiah a
rak ngan hngehnge. Nitlaklam calai mithiam pawl in Hebru calai theifiang ding ahcun
Ruth cabu hi tthatei’ siar a ttul tiah an sim.
Esther cabu khal hi nunthuleng pakhat a si. BC 500 ih thilthleng
ngan mi a si ih BC 300 hrawng ih ngan mi a si hmang. Duhdawtnaklam nunthuleng
hmaisabik a si ti hman a theih hial ding titu an um (Mya Than Tint). India
ihsin Ethiopia tiang ram 127 uktu kumpi siangpahrang Ahasuerus le, farahfa
Esther an coawknak thuhla, siangpahrang inn sungih Haman le Mordekai ih thubuai
umtudan tivekpawl tla khi siar an nuam zet. Asinan Pathian timi ttongfang
pakhat hman a lang lo ruangah Bible sungih telhmi cabu ahcun danglam ve tak a
si.
John cabu khal hi thuanthu ngai nuam zet a si ve. Calai mithiam pawl
cun Job cabu hi minung le Pathian karlak ah Satan a rung therluh-awk ruangih
buainak suak mi ngannak thuanthucawn (drama) a si. Cui thuanthucawn cu minung
mizia le minung hualvan karlak thubuai pholangtu a si tiah an sim (John
Macy). Himi thuanthucawn hmelhmang nei
cabu hi Hebru bezai ropi vekih siar theih le siar ttha khal a si tiah calai
mithiampawl in an ti (John Drinkwater). Job cabu sungih ttongkam bungrua an
hman mi pawl hrimhrim hi siar le hminsin tlak zet an si hrimhrim.
Biazai
Bible sungih biazai hmuihmel lang hmaisabik cu Suahlannak bung 15
ih Moses ih hla le Thutthentu bung 5 ih Deborah le Barak ih hla hi an si tiah
an ti ttheu. Hebru bezai hmaisabik an si titu khal an um. Asinan Hebru biazai
ih hangfim taktak cu Hlapawl ih Hla a simi Solomon Hla ah kan hmu thei. Pathian
thu a simi Cathianghlim sungah leitlun hmuihmel a kengmi biazai a rak tel sual mi
a bang zet nan, Khristianpawl cun Khrih le Kawhhran lainatawknak hmuaithlam a
si ti’n siseh, minung nunau le mipa karlak ih a um dingmi duhdawtnak thianghlim
umtudan zirnak a si ti’n siseh, an zum. Himi Solomon Hla hi leitlun calai tam zet
ah sulhnu a ngah nasa.
Amahlawngte Solomon Hla hi cu biazai hnakin hla rim a nam deuh.
Solomon Hla hnakih biazai kalhmang thawi’ rem-aw sawn cu Saam hi a si.Saam
sungih biazai lawng hi Bible sungih biazai diktak a si tiih pomtu calai mithiam
khal an um (John Macy). Saam Hlabu cu Pathian thangtthatnak thuhla a tambik.
Saam timi ttongfang ih Greek ttong sullam khal ‘thangtthatnak’ tican a si.
Biazai rim a nammi cabu dang pakhat leh cu Thufim cabu a si. Kan nun pumhlum
kaihruaitu ih kan hman uar zet mi a si ruangah Thufim cabu ih cangan relbawldan
hin cabu dang pawl hnak hman in in hliahkhuh cuang men thei.
Profet pawl cabu dangdang khal ah biazai hmuihmel tampi an um ko.
Bible hi sakhuanaklam cabu a si ruangah thlarau lam deuh hlir ih thlir le siar
kan uar deuh hrih a bang. Matthew Arnold cun Bible hi calai kutsuak pakhat
dinhmun ih siar ding in forhfialnak a rak tuah dah. Bible ih ropitzia kan hmuh fiang
sinsin theinak ding ahcun Bible hi kilkip ihsi kan thlirthiam a poimawh ding.
No comments:
Post a Comment