Hitler ih Ca Siar Dan

Hitler ih Ca Siar Dan

 

Ca siar nguaingo ringring pawl, bu khat hnu bu khat hlah le hrelh nei lo ih siartu pawl ka hmu qheu. Hi pawl hi ca siar nehsawh, siar tam, thei tam pawl ah ka ruat cuang lo. An theih mi a tam, a ramri a kau zet ti cu a dik. Hmansehla an khawkhawm mi thu le hla pawl a hranpa tetei’ hminsin cinken dan thiamnak thluak an nei lo……….

Ca siar cun amah lawng in sullam a nei mai lo, rahsuah pakhatkhat ngahnak hrangih siar lawng ah a qha…………… Ca siar dan thiamtu cu cabu sah qhenqhen le khungkhai zet pawl siseh, mekazin siseh, cabu fate le kutzem casual tete a va si hman ah, a siar vete’n himi cu ka tumtah mi in bawmtu ding a si, himi cu manmual a nei qha ih cinken ringring tlak a si, tivek in amah thawi’ rem aw ding mi kha a hrilsuak lohli thei ringring.

Adolf Hitler, Mein Kampf (Ch. II, The Art of Reading)

Thil qha kan timi khal ahhin a hmangtui’ mumal lo ruangah simaw, an hmandan kalhmang ruangah simaw, thil qha lo pipi asilole thil qha lo tuahbawmtu, thil qha lo tuahnak ih hlawhtlingtertu ah a cang thei mi an um. Qhimnak ah Mozarh ih sersuah mi awnmawi pawl hi nelrawn ramcar ih tartahak tluk rori in a beidong mi thinlung tampi hrangah, hring dildel fing le tlang hmun ih a hruaithlengtu an si dah zo ih, an si hrih lai fawn ding ti khal rinhlelh ding a um lo. Asinan Hitler ih Nazi ralkap pawl in sualnak nei lo minung million tampi ren lo baksak ih an hrem, an thah caan ahkhan an hrem, an thah mi pawl ih qapraak awn hupphentu ah Mozart ih phuah mi awnmawi pawl hi ring mangkheng in an suah qheu ti a si. Mozart ih thlarau hman hmaisong a um nasa!!!

Cui ralkap sualral pawl kaihruaitu, Jews miphun mipum million 6 lenglo sahnar rawn ah hranhram ih nor liamtu Hitler hin amai bulpak calaibuuk (private library) ah cabu 1,6300 hrawng a nei. Thiamzung (art) lam a si mi architecture, thuanthucawn (drama), zuksuai le lemser lam thuhla ngannak cabu 1500 hrawng, nuam men ih siar ci nunthuleng qukqak bu 800 hrawng (nunthuleng picang a siar mi thu cu nelam ah kan rel ding), ral doawknak sanphung (history) le raldo siangpahrang pawl ih nunthuanthu cabu 7,000 hrawng a um tiah Frederick Oechner in a sim. Nunthuanthu cu German le Prussia siangpahrang pawl thuhla an si ih, raldo sanphung ahcun Napoleon le Prussia siangpahrang pawl ih raldonak thuhla hmuahhmuah an kim thluh deuhthaw. (Munich khawpi ih cabu 10,000 hrawng a ret mi cu Russian pawl in an la ti thuthang a um nan hmuhsuah sal an si hrih lo).

Hitler ih ca siar paihzia cu a cabu neih zat pawl ihsin a lang mei ko. 1920 hrawng, rethei zet ih a rak um lai khal ah a paisa tamsawn cu cabu leinak ah a rak hmang. Nazi Party hohatu a hung si hnu, 1930 le 1940 kum pawl khal ahkhan sun ah thupek rapthlak zetzet pe in sual nei lo thisen lungter rero hmansehla zan ahcun a ca siarnak pindan ah daite’n ca a siar ringring qheu. Cabu cawhlet le haidarh a paih zet ih, a remsal lam khal ah amah rori in a saduhthah ih a rem lawng ah a di a riam ti a si.

Hugh Trevor Roper in The Last Days of Hitler sung ih a ngan vek a si le, Hitler ih ngainatbik mi cabu cu sanphung mithiam Thomas Carlyle ih Frederick Ropi (Prussia siangpahrang) ih nunthuanthu cabu a si. Hitler hin Frederick Ropi thawn mi bang aw ih a ruahawk ruangah a si hmang. “Hmun kip, ka kip in ral pawl ih in kulh dan, ral kan neih tam dan tla an bang aw,” tivek in amah le Frederick Ropi cu a khaikhin aw qheu. A nun ni netabik pawl ih leihnuai pindan thup sung ah a relh lai pawl khal ahkhan thupom thehdarhtu tlangbawi pi Dr. Paul Joseph Goebbels in Frederick Ropi ih nunthuanthu cabu hi ring zetzet in a siarsak qheu. A siarsak lai ahcun Hitler cu a mitthli a hal kelkel qheu tiah Goebbels in a nitinbu ah a ngan.

Hitler hi a calaibuuk ah raldo thuhla tambik hmansehla calai (literature) le thiamzung lam khal a hlah cuang lo. Spanish calai mi ropibik Cervantes ih deusiah nunthuleng hminthang Don Quixote, English nunthuleng hmaihruaitu Daniel Defoe ih zuamsuahnak nunthuleng Robinson Crusoe, English deusiahca nganthiam (satirist) Jonathan Swift ih rotling deusiah nunthuleng Gulliver’s Travels, American nunthuleng nganthiam Harriet Beecher Stowe in vundum pawl sal ihsi luatter duhnak lungput thawn a ngan mi Uncle Tom’s Cabin nunthuleng tivek pawl khal a uar zet. Rotling calai kutsuak (classic works) an si thu khal a pom ve. William Shakespeare ih kutsuak hi a ngaina hleice ih, German calaimi ropi Goethe le Schiller hnak in a thiamsawn tiah a pom. Julius Caesar le Hamlet thuanthucawn pawl sung ih qongkam pawl tla thu a rel caan ah a hmang phah qheu fawn.

Asinan a thinlung zun duahdo ko ih a duh mi nunthuleng ngantu cu Karl May a si. Karl May hi cam khat lai ih rak lar zet dah German nunthuleng ngantu a si. “Karl May ih nunthuleng ka siar ngah hmaisabik mi cu The Ride Across the Desert a si. I hnuklut cak nasa. A cabu pawl ta rori ka siar ruangah tlawnginn ih ka hmat ngah zat hman theih cing theih cing in an tla niam zutzo,” tiah Hitler in a rel sal. Karl May hin Mein Leben und Streben (Ka Nun le Zuamnak/My Life and Struggle) timi maingannunthu (autobiography) a rak ngan dah. Hitler in a tonteh mi pawl le a hmuhruahdan a ngan mi cabu ih thulu ‘Mein Kampf (My Struggle) khal hi Karl May ih hliahkhuhnak pakhat a si ding tiah zumnak a um. Karl May ih kutsuak pawl cu calai manmual (literary value) lam iih tlamtling lemlo, nunthuleng ciaplap deuh hlir an si.

Hitler’s Private Library timi cabu ngantu Timothy W. Ryback cun ‘Hitler in thlarau khawvel thuhla a ngaihven zet’ tiah a tarlang fawn. Hitler ih calaibuuk ah sakhawlam cabu 130 lenglo hmuhsuah an si. Theihthiam har zetzet sakhawlam thu thuk pawl khal Hitler hin theihthiam tum in a siar nasa ti cu catlang tampi a rin mi ihsin a lang tiah Ryback cun a ngan. Zabi 19 lai German khawruahphung mithiam (philosopher) Johann Gottlieb Fichte ih cabu pawl khal a culnel nasa. A rin mi catlang lak ih pakhat cu,

‘Jesuh in kumkhua ih a tirhthlah pawl hliahkhuh thunun theinak huham kha khui ihsin a ngah?’

‘Amah le mah Sanmureng Pathian thawn bangrep ciah ih a retawknak ihsin a ngah’

Timi thusuh-sannak catlang hi a si.

Ryback cun ‘Hitler hin kumkhua in leitlun ih a hngilh nawn lo ding mi mi cungcuang si ih a zumawk thu, German ram runsuahnak ding le leitlun ah zatlang nunphung thar pakhat dinsuak ding in Pathian ih hril le hriakthih a si ti a zumhngetawk thu, cui quanvo pawl ih lamzin ah kangsia cakkhai phunphun um hmansehla netabik ahcun a neh thluh ding thu, le ziangvek boruak khal thleng sehla a nun sungril thlarau in tuah a fial mi cu thlun tengteng ding ih tumhngehnak a neih thu’ pawl tla a ngan. Hitler hin a nun sungril thlarau ih fial mi cu Pathian ih fial mi ah a pom cih a si hmang.

Hitler amah le mah a thahawknak leihnuai pindan thup sung ah amai ngan mi Mein Kampf cabu bu khat, a duh zet mi German awnmawi mithiam Richard Wagner ih kutsuak netabik a si mi Parcifal hliakhlainak cabu, Nazi Party le Pathumnak German Rampi hminsinnak zuklem ( Z linglet kawkalh aw zuk) ih sanphung cabu, khuavang le thlarau khawvel thuhla ngan mi The Dead Are Alive cabu, French miphun pol hminthang Nostradamus (1503 – 66) ih simsungnak cabu pawl, thlarau khawvel le dawi lam cabu pawl tla hmuhsuah an si.

Hitler ih cabu pawl hi rampi calaibuuk le phunsangtlawng calaibuuk pawl lawng si lo in mi bulpak hnen khal ah tampi an thleng ve. Cabu khawlkhawm paih pawl le mithiam pawl in an ngaihven nasa. Calai fakseltu pakhat a si mi Walter Benjamin in, “Bulpak calaibuuk pakhat ih cabu pawl cu a khawlkhawmtui’ thinlung umtudan pawl kha tlaituan ih a tarlang ringring tu rinsan tlak theihpitu an si,” a rak ti. Mithiam pawl in Hitler ih cabu pawl an ngaihvennak san cu himi ruangah a si men thei.

Hitler ih siar mi cabu pawl kan zoh tikah leitlun tuahqhatu cabu ropi zetzet, leitlun tuahqhatu pawl in kutken cabu ih an rak hman mi cabu ziangmawzat an tel ti kan hmu. Asinan anih cun thil qha suahpitu ah a hmang lo. Qhimnak ah vundum pawl sum-lei-sal dinhmun ih an um hman zang an faktuk thu langsar ding ih ngan mi Uncle Tom’s Cabin nunthuleng tla a siar nan, Jew miphun million 6 lai a that thotho. Thuanthu sung ih pacangqha tlamtling pawl deusiah zokzetnak cabu Don Quixote a siar nan, thuanthu sung ih pacangqha tlamtling (minung ngai pawl ih si ban lo mi) vek si a duhnak thinlung a reh cuang lo. Minung ih depdet sualralzia zokzetnak Gulliver’s Travels cabu a siar ko nan kut hrothak zet ih mi rekbeh a bang cuang fawn lo. Cutivek in, a dang cabu qhaqha a siar mi pawl khal in lamzin dik parah an hruai thleng thei cuang lo.

Ziangahtile, a ca siardan a rak dik tawk lo. Qan lam nei qengqeng cia in cabu a siar. Mithiam pal ih thlir le rel an ah ‘Hitler ih cabu siar dan hi a pawnlang ih zoh cun dik zet vek a bang nan, calai ihsin fimthiamnak thutak hawlsuaktu pawl ngaingai ih ca siar dan a si lo. Mai qankhawhcianak sirhsan dawlhngettu ding ah hmun tintian ihta ‘pawl va sawm’ vivo qheu ‘lung khat phur’ minung pawl ih tidan a si’ ti a si. Cang-ai kaw sung ihsi vandumkulh thlir tum a bang deuh.

German khawruahphung mithiam Friedrich Nietzche le Arthur Schopenhauer ih khawruahnak vandumkulh, Charles Darwin ih hersuahkual theory (evolution theory) thu khungkhai pawl, Henry Ford ih Jew miphun dokalhnak The International Jew casual pawl le tarlang zo mi cabu phunphun pawl kha ‘qan lam nei cia’ in vei ziangmawzat a coklet. Cutin coklet nasa hmansehla sanphung umtuzia a thlirdan dik lo pawl khal kha a hmusuak aw cuang lo. A dik sawn mi cabu siar cing keukeu in a varpawh cuang lo. Cumi hnak in amai ruahdan um cia (a dik maw dik lo maw) bawmtu ding catlang pahnihkhat te hawl na in a rak khawsa.

A tlangpithu in ca siar tam zet pawl cu an theihnak a karh, midang nun le tontuarnak kimcang zet ih theihthiampi hna an thiam, an thinlung vang a kau, lainatnak an nei cuang ih, ziangvek thuhla khal khimkhuah zet ih relbawlnak cang an thiam, a relbawldan khal an thei tia  si qheu. Himi hi hmun tamsawn le caan tamsawn ahcun a dik zet fawn.

Hmansehla cabu a tor le seng siartu Hitler hin lainatnak, midang hringnun theihthiampinak, remdaihnak le thudik ngainatnak thinlung tivek neitu ih a cansuahlonak san pakhat cu a ca siar dan mumal lo ruangah si in a lang. Ryback lephei cun, “A cabu siar mi ropi zet hai hmansehla a ngah mi cu fanghra man theory qoihhnok men fang a si,” tiah a rak ti.

Mozart ih sersuah mi awnmawi pawl khal Hitler ih ralkap pawl in thil qha lo tuah mi hupphentu ih an rak hman vek in, amah Hitler khal in leitlun tuahqhatu cabu pawl cu leitlun suasamnak ah a rak hmang ve ti theihnak lai a um. Ziangtivek ih qan lam nei cia va si khal sehla a qannak kha thil qha lam rak si ngah sawn sehla cu a poidan a nep deuh tla a zum um.

Hitler a fehsualnak san cu qan la nei hnget cia tuk ih ca a rak siar kha a si ih, - cuhnak ih poi sawn miangmo cu a siar mi cabu qha pawl ihsin ‘qan lam nei cia ih ka feh hi a dik lo a si hi’ timi thudik a rak hawlhmuh thei lo kha a si.

Ref: Pe Myint, World of Books, Pe Myint Sarpay, 1^st Edition, December 2009. Page 311-324 ‘The Books Hitler Read’