Tuluk Calai Romual 7 (Yuan San Nunthuleng le Thuanthucawn)

Tuluk Calai Romual

Bung 7

Yuan San Nunthuleng le Thuanthucawn

 

 AD 1126 kum ah Mongolian pawl nisuah-saklam in an rung lut ih Jin Hrinkumpi an run do neh ruangah Tuluk pawl cu thlanglam Tuluk ram ah an tlan thla ih Thlanglam Sung (Song) Hrinkumpi an dinh sal. 1234 kum ah Genghis Khan ih Mongolian ralkap pawl in Jin Hrinkumpi an qhiatbal sak thluh. 1279 ah Genghis Khan ih tupa Kublai Khan in Sung Hrinkumpi qhiatbal in Yuan Hrinkumpi ram a dinh. Kum 16 sung a lal. 1368 ahcun Mongol kumpi netabik cu Tuluk ram ihsin a tlan suak. Curuangah Yuan san cu kum 89 lawng a rei.

Kublai Khan hin Burma khal a run do ve ih, Pagan siangpahrang ram cu a run siatsuah ve.

Mongolian pawl ih suasamnak ruangah Tuluk calai le nunphung qhan a herh phah nasa. Kublai Khan hi nunphung le thiamzung ngaina lo cu  a si hran lo. Buddhist biaknak a thlun nan Confucius phungthluk khal tha a pe zet. A sn lai ahcun Tuluk ram ah khawruahphung, hmuh-ruahdan phunphun pawl zalen zet in an hlawm aw, an qawm aw hai. Amah Kublai Khan khal in Tuluk calai, thiamzung le nunphung a sunsak, tha a pe hai. Mi ramhtu pawl hin inntek ram miphun nunphung kha an la, an cawng, an hmang tlangpi. Cuvek si lo phundang deuh umsun cu Mogolian pawl in Ch’in ramkulh an lak lai ah anmai cin le dan an hman mi, rang par to phah qingriset (qazaw) tum phah in thinlung cok tho thei zeet zaihla an sak qheu mi kha Saklam Tuluk awnmawi mithiam pawl in anmai nunphung awnmawi ah an rak laklut mi hi a si an ti (Wang Chi-ssu – Selected Plays of Kuan Han-ching, Foreign Language Press, Peking, 1958, Tuhmaihruai).

Hmansehla Kublai Khan hi Mongol Hrinkumpi ram a dinhsuahnak ahcun a kut a kha in a hro a thak zet. Cu bang lai ah biazai cu a qhangso lo nasa. Asinan Wen Tien-hsiang timi bezaipu ih bezai pawl cu miphun duhdawtnak, ram duhdawtnak cokphurtu tlamtling zetzet an si. Cu pa cu Kublai Khan ih kut hnuai ah a pe aw lut duh lo. Curuangah Kublai Khan in a kut hnuai ih lut ding in a duhduh dil ding ih a sim tikah, “Bawi pahnih rian quan kop ka duh lo, pakhat lawng hrangih rinum ka duh, curuangah ‘thih’ laksawng ka lo dil,” tiah ralqha zet in a sim. An thah zik zawng, thawnginn sungah kahpathir bang ih hngetkhoh mi miphun duhdawtnak, ram duhdawtnak cokphurtu bezai fing khat a phuah ta (H. A. Giles – kawhhmuh zo).

Thuanthucawn Nganthiam Ropi pawl

Cu bang san ah biazai cu ziang ciamco a al lo (thu ngai hla ngai dinhmun luah ban a si lo) nan thuanthucawn a qhansoh ruangah nunthuleng khal a qhansoh phah ve. Mongolian pawl kut hnuai ah Tuluk pawl ih dinhmun cu a calcau zet. Uktu pawl in thil dik lo le mawi lo khal an duhduh in an tuah. Cuvek dinhmun ah thuanthucawn lawng in dolet sal duhnak thinlung a kaihthawhsak thei.

Kan ral dah zo mi, thuanthu simh thiam pawl in an rel mi thuanthu sung thuhla pawl cawng phah, an qongdan cawng phah ih an rak rel qheu mi biazai pawl kha Yuan san a rung thlen tikah, khawte ihsin khawpi ah a ra thleng. An relbawldan khal a danglam deuh. Nunau pakhat in phung le phai nei zet in hla a sak. Thuanthucawn sung ih um mi thu a rel, a qong tik khal ah taksa canghvaihnak thawn a langter kop cih. Cu nu ih hlasak le qong cu thlungdar tumtu pawl in an rak thlun. Himi vek ihsin Yuan san thuanthucawn a rung qhangso tiah Kantung khawpi, Son Yet Sin Phunsangtlawng ih Tuluk calai professor Wang Chi-ssu in a sim (Wang Chi-ssu – kawhhmuh zo).

Yuan san thuanthucawn ah a tlangpithu in bung li a um. Vei hnihkhat ah bung kerlak ih ther mi bung tesep um cang a nei. Thuanthu cawngtu cu mipa siseh, nunau siseh, pahnihkhat lawng an si. A cawngtubik in thlungdar bomnak thawn hla a sak. Cawngtu dang cun qongkam hlir an hmang.

Yuan san ah hnaquan le sinak dinhmun ngahnak hrangih camibuai tuah qheu mi kha qhiat in Mongolian pawl covo hleice an run pe. Cutikah cathiam, mithiam inntek Tuluk pawl cu thuanthucawn ngan, hla phuah, thuanthu cawn, le thuanthucawn group dinh tivek an run hmang vivo. Thuanthucawn ihsin palbeh, rekbeh an sinak phunphun tarlang in ram dang, miphun dang ih ramh le suasamnak kha an dodal.

Cuvek dodalnak lam luhcilhtu pawl ih hruaitu ti ding tlak cu thuanthucawn nganthiam ropi Kuan Han-ching a si. 1234 kum sehvel ah Bejing khawpi ih suak a si an zum. Miphun dang, ram dang hliahkhuh dodalnak thuanthucawn 60 lenglo a ngan. Tu ahcun thuanthucawn 18 lawng a lar. Kuan Han-cing cu thiamzung mithiam pawl thawn nel aw zet ih ceng tlang a si ruangah thiamzung thiam pawl ih hringnun a thei fiang zet. Culai san ah awnmawi le thiamzung thiam nunau pawl cu nunau hlothlau le nunau zuva ah ret in an rak hmu niam deuh. Kuan Han-ching cun cuvek ih hmuhdan nikhua lo neitu zatlang nun cu a soisel, a do. Hringnun umzia theifiang zet tu a si vek in leitlun ih naunehawknak umtudan a hmufiang zet.

Nunau pawl dinhmun le canvo niamzia khal a thei. Curuangah cuvek pawl thawn pehpar in thil qha lo pawl kha kengkawhdik (realism) relbawldan thawn a phosuak. ‘Dai a tla serso mi Qhal caan’ timi thuanthucawn ah nuhmeipawl nekrawk an tuar asile Qhal caan ah dai a tla ding timi thuhla a ausuahpi. A tumtah mi cu palbehnak hnuai ihsi tal suah an duh theinak ding ih forhfial a si ih, a tumtah mi khal a hlawhtling.

Kuan Han-ching bang ih zatlangnun thlauthlakawknak soisel le dodaltu dang pakhat cu thuanthucawn nganthiam Wang Shih-fu a si. A ngan mi thuanthucawn pakhat, Dunglam Inn timi, ah sumpai le sinak dinhmun mithmai lawng dawi rero innsang ih sualnak a tarlang. Kuan Han-ching in a thuanthucawn ah qong tualleng hmang in mipi a hip. Wang Shih-fu cun calai qong thawn mipi a hip. Mithiam pawl in Dunglam Inn thuanthucawn an duhsawnnak san khal calai qong a hman ruangah a si hmang. Cui thuanthucawn cu Tuluk mithiam qhenkhat in nunthuleng a si an ti fawn.

Thuanthucawn le nunthuleng an rel rawi qheunak sanh cu thuanthu simh thiam pawl in an rel, an samh mi bezai hi thuanthu ih thutlangpi pawl an si. Cui thuanthu ih thutlangpi cu thuanthu simh thiam pawl in a tawizawng in an baihat. Cui thuanthu riruang sirhsan in anmai phur dandan, an kaa a feh dandan in thuanthu cu an arhter, an karhter vivo thei. Himi pawl ihsin nunthuleng tawi pawl an rung suak. Cui thuanthu riruang rung qhangso vivo cu thuanthucawn ah an ngan lala. Curuangah Tuluk thuanthucawn pawl cu nunthuleng vek ih siar khal an theih. Hivek ruangah thuanthucawn le nunthuleng an rel rawi qheunak a si.