Tuluk Calai Romual 6 (Sung San Rotling Calai)

Tuluk Calai Romual

Bung 6

Sung San Rotling Calai

Tang san ah rotling calai an tharthawh, an phorhsuak sal mi kha Sung san khal ah an run hnuthlurh vivo. A hnuthlurhtu pawl lak ah Saklam Sung Hrinkumpi san ih hminthang pawl cu Ouyang Hsiu, Wang An-shih le Su Tung Po pawl an si.

Ouyang Hsiu cu khawruahphung mithiam, bezaipu le sanphung ngantu a si. Siangpahrang riantu a sin an farah zonzai pawl parah a ngilnei. A bezai pawl ah qong tualleng a hman ruangah zatlang mipi in an theithiam ol zet. Asinan a hminthannak sawn cu Sun Chi (AD 998 – 1016) thawi’ an ngan tlang mi Tang Hrinkumpi sansiarnak (chronicle) cabu ruangah a si. Cui sansiarnak cabu cu Hrinkumpi Panga san cem zawng ih rak ngan dah mi hnak in a qha sawn.

Wang An-shih (AD 1021 – 1086) cu calai mithiam le ramkhel mithiam a si. A ngan mi thutluang pawl cu zatlangnun thlengh le tuahremh-nak lam thuhla bulhram pawl phorhsuahnak an si. A thu bulhram pawl ih laimu cu rampi hi lothlo pawl parah a hngat aw. Lothlo pawl ih nun dinhmun khaisohnak ding ah thlaicindan kalhmang qhansohter, thlenghter a qul. Cumi hrangah a phungqhang ei ih hnaquanterawk kalhmang hi hlon a qul tivek pawl an si (Leiram neitu pawl in lothlo pawl cu leiram man tampipi la in an quanter qheu).

Wang An-shih cu a ruahdan a hlawhtlin theinak ding ah amah rori in zatlangnun le eihawlnak lam qhangso ding in a zuam. A duansuah mi kalhmang thawi’ rem aw ding in ukawkdan bulhram khal ah inn hra kha hlawmqhen khat, inn hra hlawm sawmnga cu hlawm khat, hlawm za khat kha hlawmpi pakhat tivek in a dotdot in hlawmqhen umtudan a tuah. Mipum khal a siar. Himi remh le thlengh nak pawl hi sanphung ngantu Ssu-ma Kuan (AD 1019 – 1086) timi in a dodal. Ssu-ma Kuan cun cindan hlun kha a uar sawn.

Wang An-shih ih thuneihnak qhat vang lai ahcun a tai lo ih a dinhmun ihsi hman in a suah phah. Asinan Wang An-shih ih thuneihnak a tolh niam hnu cun a dinhmun ah a ding thei sal ih siangpahrang ih lungkimpinak thawn Wang An-shih ih remh le thlengh mi pawl cu an hnuk kir sal thluh. An hnuk kir sal ruangah Kin miphun pawl in Sung Hrinkumpi an run tawhthai tikah an cecang thei nawn lo phah a si tiah tui san sanphung mithiam pawl in an zum (C. P. Fitzgerald – kawhhmuh zo).

Siangpahrang inn sung bezaipu pawl lak ah Su Tung Po (AD 1036 – 1101) hi a hmin a thangbik. A hmin ngai cu Su Shih a si. Siangpahrang riantu ah dinhmun sang zet a luah lai khal ah rampi mipi lam qang in a qong qheu ruangah phiarthup le tukforhtu pawl ih hmuibah mi ah a cang ih, a dinhmun a tolh thlak caan a tam zet. Culai ih minung um hrotlonak Hainan tikulh ih dawisuah tla a tuar dah.

Tang san bezai tam sawn cu ngaiawknak, duhdawtawknak le mai bulpak thuhla tivek deuh an si. Su Tung Po cun cuvek si lo in mi farah zonzai pawl ih nun umtudan le an kiangkap boruak thuhla pawl a ngan qheu. Pher par ih it qheu men fang attune in a fang pawl zuar in siah a pen an a daih lo ruangah a caw le na zuar ih siah cu a pe, tih-thing a neih lo ruangah a inn qhiat in tih-thing ih a hman thu pawl bezai ih a phuah mi (le a phuahdan) cu riatsiat thlak ngaingai a si (Feng Yuan-chun – kawhhmuh zo). Su Tung Po hi Sung Hrinkumpi san calai mithiam pawl lak ah a cuangmuarbik mi, khuarel thuhla bezaipu a si.

Ssu-ma Kuan khal sanphung mithiam pakhat a si. Sansiarnak Thlalang timi cabu a ngan. Cui cabu cu BC zabi panga ihsin Sung Hrinkumpi san (AD 960) tiang huap ih ngan mi a si. Cui Sansiarnak Thlalang cabu cu Chu His (AD 1130 – 1200) in a run zohfel sal. Cu pa cu Buddhist sakhaw thluntu a si ih, phungki khal a si dah. Asinan lehhnu ahcun phungki ihsin a suak sal ih Confucius ih cabu pawl a buaipi. A ca zohfel dan le thu-onnak ngandan a fiangfel zet tiah calai mithiam pawl in an fak (H. A. Giles – kawhhmuh zo).

San Netalam Dinhmun

Sung Hrinkumpi ih rung lal siangpahrang pawl cun saklam Tuluk ram cu an uk cingpen, an ti baibah thluh. Curuangah ram mipi tam zet cu thlanglam ah an suk thla. Hivek san ah bezaipu pawl in ralbuai lai h an tonteh mi harsatnak thuhla pawl cu bezai ah an phuah. Cu bang pawl lak ah bezaipi Li Ching Chao (AD 1011 – 1145) cu a hmin a thang zet. Bezaipu tampi cu thlanglam ih umhmun thar khuar phah khal in saklam san qhat lai ngai in san sia cem lohli seh ti ih ruahsannak thuhla bezai ah a phuahtu an si.

Himi lai can, thlanglam ram ah phunhnam duhdawtnak cokthotu bezaipu Lu Yu (AD 1125 – 1210) a suak. Lu Yu cun phunhnam duhdawtnak a qulzia, a thupitzia pawl bezai ah a ngan. A thih zawng ah a fapa hnenah, “Saklam Tuluk ram ah siangpahrang ih ralkap pawl in rampi an lak, an dinh sal thei asile, ka thlan hmai ih na ra kun tikah i run sim aw,” timi sullam nei bezai a phuah ih a pek ta.

Lu Yu vek in Hsin Chi Chi (1140 – 1207) khal in Saklam Tuluk ram zalennak a hloh thuhla bezai phuah in miphun le ram duhdawtnak thinlung harh thar sal ding in a rak zuam ve.

Tahfung tling ban biazai, thutluang a um hranpa lo nan, Sung san ahhin nunthuleng le thuanthucawn cun qhansoh lam an pan deuh. Tuluk calai mithiam pawl cun himi san ihsin nunthuleng le thuanthucawn qhansoh a thok an ti. Tang san ah thuanthu simh thiam pawl ih thuanthu a lar. Sung san a thlen tikah a qhangso, a tlamtling vivo ih a lar sinsin. Cui thuanthu pawl ah khawpi sung minung pawl thuhla, sansiarnak thuhla le Buddha ih simh mi thuanthu pawl an tel. Asinan Buddha ih thuanthu pawl cu an hlovai thluh sal.

Thuanthucawn cu a qhangso zet. Thlanglam thuanthucawn ti hman in hmaihngalpi tlak khop dinhmun a rak thleng. Cu pawl cu Ming le Ching Hrinkumpi pawl san ih thuanthucawn hrangah hmaitlan an si tiah an sim. Cu bang lai ih rak lar mi thuanthu, thuanthucawn hla le thuanthucawn qongkam pawl cu tui san tiang ih rung tang a tam lo nan, a umsun hliakhlai tikah an lehhnu ih rung suak mi thuanthucawn pawl an hliahkhuh natsatzia a lang tiah thuanthucawn mithiampawl in an ti (Feng Yuan-chun – kawhhmuh zo).

Cabu Dang pawl

Sung san ah dictionary an tuah hai. Tlangbawi (minister) pakhat a si mi Chen Peng-nien (Ad 961 – 1017) in Tuluk qongfang 26,000 simfiangnak hlansan dictionary a phorhsuak ih, a zohfel sal. Lehhnu ah Sun Chi ih tuah mi dictionary, Tuluk qongfang 53,000 tel mi, in Chen Peng-nien ih dictionary cu a run hliahkhuh ta.

1237 ah ca ngannak lam thawi’ pehpar aw cafang pawl thuanthu a hung suak.

Theihfimnak lam thawn pehpar in vandumkulh thuhla, arsi pawl thuhla, thingkung hramkung pawl thuhla, khuarelthil thuhla tivek pawl khal a thuhla mil in an remh khawm hai ih zabi 10 ah a cabu in an hung suak. A ngantu cu mi tampi qangrual an si.

Sung san cem zawng ah Ma Tuan-lin (1240 hrawng- 1280) timi thukimbu nganthiam in hlanlai ih thukimbu pakhat kha remh le belhsah nei in a tuah qha bet. Cui thukimbu ahcun Hrinkumpi pawl, dinhmun ropi neitu pawl, arsi umtudan pawl, khuarel thilthleng ropi pawl tivek cazin a tel.

Cumi san thotho ah taksa ruangpum thuhla khal an rak ngan. Cui cabu ahcun kum khat ah ni 365 a um bang in minung in ruh 365 kan neih thu, lung ah dar paisa pheng tia ruh a um thu, mipa in hnakruh 12, nunau in hnakruh 14 an neih thu tivek pawl a um. Ci le kuang dik le dik lo thu khal ah nu le pair uh par ah te le fa ih thisen forh sinh sehla a theihtheih thu a ngan. An forh mi thisen kha ruh in a rak zuk lut ahcun ci le kuang dik tican a si. Nupi le pasal khal an thisen kha cawhtolh ah sung khawm sehla a rawiawk ahcun nupa dik, nupa taktak ah ruat ding an si ti’n a ngan.