Tuluk Calai Romual 10 (Calai Dothlenghnak Khaipa)

Tuluk Calai Romual

Bung 10

Calai Dothlenghnak Khaipa

Tuluk calai dothlenghnak hohatu canganthiam Lu Hsun hi Calai Dothlenghnak Khaipa tiah Tuluk calai sanphung mithiam pawl in an ko. Lu Hsun ih nun thuhla cu Tuluk san thar calai ih sanphung a si ve cih ruangah duh-am deuh in kan tarlang hnik pei.

Lu Hsun timi cu cafung hmin a si. Lu Hsun nu ih hrinhnam hmin cu Lu tiah an ko. A nui hrinhnam hmin cu la in Lu Hsun timi cafung hmin a hmang. A hmin ngai cu Chou Shu-jen a si.

Lu Hsun hi 1881 kum September 25 ah Zhejiang ramkulh, Shaohsing khawpi ah a suak. A pu cu cathiam, siangpahrang riantu a si. A pa khal a pu vek in cathiam pakhat a sin an khaw sung mi zaran men a si. A nu khal cathiam sung ih rung suak a si. Lu Hsun kum 13 a ti ah a pu cu siangpahrang hremnak a tuar. Cuihnu kum thum ah a pa a thi. Curuangah Lu Hsun cu a nui’ nunsimh lamhruainak ah um in, rethei zonzai zet in a hung qhanglian.

Lu Hsun cu kum 17 a kim tiang a suahnak khua ah rotling calai pawl zir in tlawng a kai. Thluak qha zet a si ih a nauhak lai ihsin hlan san calai pawl tla amai san thawn khaikhin ih fakselnak cang a rak thiam qheu. Khawte lam thuanthu le zuk suai hi a thawtnak zawng an si. Khawte lam umtudan khal thei le nel zet tu a si.

Kum 18 a kim ah Lu Hsun cu Nanjing khawpi ah feh in Tiralkap Tlawng ah a zir lawk. Cumi ihsin Lei-par Ralkap Tlawng thawi’ a pehzom aw mi tlangleng le khursungsuak thuhla lam zirnak tlawng ah qhawn in a zir. Hitivek ih fimthiamnak a zir lai ah ram dang qong ihsi leh mi san man dengfelphung le thlimthluai calai pawl a hliakhlai. Cu lai ah 1899 kum dothlenghnak a suak ih, a lehhnu kum pawl ah ‘Boxer Rebellion’ a suak lala. Lu Hsun cu English cinungphung (biology) mithiam Huxley ih ngan mi, a dotdot ih thlenghawk vivo nak cinungphung fehdan pawl a hliakhlainak ihsin Darwin ih thlir-ruahdan pawl a hmufiang thiam thlang.

Cutawk ihsin Japan ram ah siivailam thiamnak a va zir. Asinan Japan ram ih a um lai ah Tuluk mipi pawl ih nambeh an tuarzia a va hmusuak. Curuangah siivai thiamnak tansanh in calai lam ah a lut. 1908 kum, Ching Hrinkumpi dodal canghvaihnak ah a mipum rori ih tel in a rak cangvai ve.

Lu Hsun cu 1909 kum ah Tuluk ram ah a ra kir sal ih cinungphung le chemistry pawl tlawnginn ah a zirh. 1912 kum, Tuluk Hrilhoturam an dinh tikah Lu Hsun cu Fimthiamnak Zung ah hna a quan. Himi sungah Tuluk rotling cabu pawl zohfel in simhfiangnak pawl a ngan. Buddhist biaknaklam calai pawl tla a hliakhlai. Rotling calai pawl hliakhlai phah ih amai sanzul khal thlir ringring tu a si ruangah leiram nei mi-uk phungphai le ram dang minung pawl ih sumhram nei phungphai pawl ih an qhatlonak pawl a hmu vivo.

Cumi hmuh-ruahdan thawn Lu Hsun cun a vuavang canganthiam pawl thawi qangrual in ‘New Youth’ journal an suah. 1918 kum ah Lu Hsun timi cafung hmin a hman hmaisabiknak kutsuak ‘Mi-aa Pakhat ih Nitinbu’ timi nunthuleng tawi a ngan. Cui nunthuleng tawi cu Russian canganthiam Gogol ih ngan mi ‘Mi-aa Pakhat ih Nitinbu’ a siar ihsin a ra suak mi ruahnak kha a ngansuah mi a si.

May 4 Canghvaihnak a suah tikah dothlenghnak canganthiam pawl ih quanvo khal a tam, a tum sinsin. Cui canghvaihnak ih hotu pakhat si ve Lu Hsun khal in dothlenghnak tha petu cahram le nunthuleng tawi pawl a ngan. 1921 ah ‘Ah Q’ nunthuleng a suah. Lehhnu ah cui nunthuleng cu a dang nunthuleng tawi pawl thawn kom in ‘Lu Hsun ih Nunthuleng Tawi Komkhawm’ ti’n bu khat ah a suah. Himi nunthuleng tawi a suah ihsin Lu Hsun ih hmin cu calai canghvaihnak hruai thar dinhmun in a hung lar so.

1920 kum ihsin Lu Hsun cu Peking Phunsangtlawng le Phunpihuap Zirhtu pawl Zirhnak College ah zirhtu a quan. Hmansehla 1926 kum ah Peking khawpi thuneitu pawl ih nambehnak a luartuk ruangah Amoy Phunsangtlawng ah qhawn in professor a quan. Cumi ihsin 1927 kum ah Kan Tung khawpi ah qhawn in Son Yet Sin Phunsangtlawng, Tuluk Calai Department ah hotubik a quan lala. Hitawk ih tlawngta buainak a suah tikah Lu Hsun cun tlawngta pawl lam ah qang in, a sinak a bansanh tai h Shanghai khawpi ah a qhawn.

Shanghai khawpi ah The Torrent mekazin a dinh. 1930 kum ah miphun duhdawttu pawl in Tulukram Zalenhnak Pawlkom andinh tikah Lu Hsun khal cui pawlkom sungah a tel ve. Cumi ihsin Shanghai khawpi ih Tuluk Keh-thla Canganthiam Zomkhawm pawlpi an dinh tikah hruaitu pakhat a hung si. Hmansehla a tlun ih rel zo bang in 1936 ah phunhnam zate huap lungrualnak thawi Japan do a qul tikah, cui lungrualnak hrang ruat sawn in an zomkhawm pawlpi cu an qhiat. Cui kum October 19 ah Lu Husn cu Shanghai khawpi ah a thi (Feng Hsueh-feng (ed.) – Lu Hsun: His Life and Works, Foreign Languages Press, 1956).

Lu Hsun cu phunhnam zalenhnak hmuitin in Russian canganthiam pawl ih ca khal a let. Mi dang pawl in an leh theinak ding khal in khua a khansak. Amah rori ih a leh mi pawl cu Fadeyev ih ‘Nineteen’, Yakovlev ih ‘October’, Furmanov le canganthiam dangdang ih nunthuleng pawl, Gorky ih ‘Russian Fairy Tales’, Gogol ih ‘Dead Souls’ nunthuleng le fakselnak cahram dangdang pawl an si. Cuihlei ah Mikhail Sholokov ih ‘Don Tiva Nemte’n A Luang’ timi nunthuleng le Russian canganthiam dang pawl ih kutsuak nunthuleng pawl tla Tuluk calehthiam pawl in an leh tikah a kaihruai.

Lu Hsun cun Tuluk rotling calai sung ih san hlun thuanthu pawl khal a ngan, a suah sal. San hlun thuanthu thawn san thar a deusiahnak a si (Lu Hsun – Old Tales Retold, Foreign Languages Press, Peking, 1961). Himi qum ih a deusiah nganca cu a hlan hnak in a rorum, a luar in a kheng fuh cuang. Lu Hsun amah cun a ngan mi deusiah nganca cu thudik phorhsuahnak a si a ti. Thudik pholang thei lo cu deusiah nganca ah a tling lo a ti bet. Khatlam ah, a nganca pawl cu leitlun thinnatter ding zawng ih ngan mi an si lo, leitlun dungtunh (hmuh lo ram ta rori ngainak) khal an si lo, thil qha lo do neh ding ih forhfial thapeknak sawn an si.

Cu lai san ah zalenhnak hrang ih zuam rero tu Mao Tse Tung cun Lu Hsun ih ca pawl cu dothlenghnak hrang zuamnak thawi’ canghvaihnak pawl thawn khaikhin in hivek deusiah nganca hi cu neih ringring tlak a si tiah a fak (Ting Yi – kawhhmuh zo).  Mao Tse Tung cu bezai ih thaw zet a si. Bezai le cahram tampi a ngan dah. Amah khal calai mi a si ruangah calai le mipi pehzom aw ding in a forh ringring. Calai cu mipi ih hmanrua si ding in tuah a qul thu le calai thawtnak khal mipi hnen ih thlenter a qul thu a sim qheu.

Lu Hsun cu Tuluk calai kha Tuluk mipi hnenih hruai luh lam khal ah a cuangmuar zet. Misenpi hman mi qong (qong tualleng) hmang in, mipi theihthiam thei ding in, tawi-fel-dengfuh zet in a ngan qheu. A ngandan kalhmang tla lehhnu ih canganthiam pawl in an run cawng nasa. Lu Hsun ih nganca hmelhmang timi sullam nei Lu Hsun Feng mekazin khal an run suah hngehnge.

Lu Hsun ih nganca pawl cu thlimthluai calai ih tel cahram (belles-lettres) bu kop 16, nunthuleng tawi, nunthuleng, hlan san thuhla cahram pawl, thutluang le biazai rawi aw cahram pawl komkhawm bu kop 3 tla an si. Hi pawl hi Tuluk mipi hrangih a roh ta mi calai robawm an si. Curuangah lehhnu lam minung pawl in Lu Hsun ih nganca pawl cu Tuluk ram mipi pawl ih nun le zalenhnak zuamsuah dan phunphun tarlangtu thukimbu a si tiah an ti.