Mi Duham Anansi

African Thuanthu Roling (37):

Mi Duham Anansi

Anansi timi mipa nauhak pakhat a rak um. An ram ah pam nasa zet a tlung. Anansi le a naupa te pawl le a farnu te pawl cu an ril a rawng zet. Anansi cun rawl lo bak cu ziang dang hman a ruat thei lo. "Rilrawng in ka thi thlang ding!" a ti ttheu.

Ni khat cu inn ihsin a suak ih tipithuanthum kap ah a va feh. "Nga fate pakhat tal kaih ka tum ding," tiah a ruat.

Tipikap cu a zoh rero, a zoh rero, a zoh rero nan zianghman an ra lo. Vei le khat ah tipithuanthum sungih tikulh hring pakhat a hmu thutthi. Anansi cu long sen te sungah a lut. A rei hlan ah tikulh hring ah a va thleng. Long ihsin a suak ih thingkung pakhat hnuai ah a ding. Tlunlam a hun zoh tikah thing rah tumpipi an um ti a hmu. Thing parah hung kai in thing rah hung lawh a tum. Asinan kai a har zet.

Thing parih kai thei a tum rero. Asinan thing rah cu a lo ngah thei lo. Thing rah pawl cun an hnihsan! Anansi khal in, "Ka lo lo ngah thotho ding, thing rah pawl!" a ti ve. Vei tampi a zuam rero. A netnak ahcun pakhat a lo ngah. "Tu ahcun ka lo ngah zo!" ti phah in a long sungih vun thlak a tum. Asinan thing rah cu tipithuanthum sungah a tla. Anansi cun, "A dang tampi an um lai pam!" tiah a hnem aw. Asinan a pahnihnak khal tipithuanthum sungah a tla thotho. Cutin vei sarih tiang a um. Thing rah ttha tumpi pasarih cu tipithuanthum sungah an tla! Thli in a hran ih hmun hlapi ah an thleng. Anansi cu a ttap rero nan thing rah cun hna an neih ve lo ruangah a ttah awn an thei lo ih, an ra kir nawn lo.

Cu thluh ah Anansi cu hramlak ah a feh. Hramlak ahcun inn fatakte pakhat a va hmu. Inn sung ihsin putar pakhat a ra suak.

Putar cun, "Ka fapa, ziang duh in na ra? I ttih hlah. Ziangkim i sim thluh aw," a ti.

Curuangah Anansi cun pam a tlun thu le an innsang an ril a rawn thu a sim. Cu thluh ah thing rah thuhla a sim ih, a ttap lala.

Putar cun Anansi ih kut kai phah in, "Ka fapa, ttap hlah! Lo pek ding mi ka nei. Thing rah hnak in a ttha sawn mi a si," a ti. Inn sungah a vung lut ih bel fatakte pakhat a rak keng.

"Himi bel hi inn ah tlunpi awla na nu va pe aw. Tu ihsi cun nangmah le na innsang cu nan ril a rawng nawn lo ding. Na nu in nan innsang hrangih zanriah suan a duh tikah, 'Bel, bel, putar hrangih na tuah mi kha, ka hrang khal ah tuah ve hram aw!' timi lawng a ttong a ttul."

Anansi cun lungawithu a sim hnu ah a feh sal lohli. Long te sungah a lut lohli ih, "Bel, bel, putar hrangih na tuah mi kha, ka hrang khal ah tuah ve hram aw!" a ti.

Cutikah bel cun zanriah thaw zet a pe. Anansi cun a zate'n a ei thluh ih a tha khal a cak sal. A rei hlan ah inn a thleng. Asinan bel cu a nu a pe duh lo. Amahte'n, "Keimai bel a si. Keimah ka nei ding ih, ka duh can ah rawl ka ei ding," a ti.

Curuangah Anansi in bel cu an inn ih kerkawm thim lakah a ret ih, an inn ih zohman an um lo can ah rawl pek a fial ttheu. Ni tinte'n a nu le a unau pawl cu rawl hawl ding in an vaksuak.

Asinan Anansi cun a thlun hai lo. "Ka dam lo. Ka feh thei lo," tiah puhmawh a hawl.

Inn ih amah lawng a um tikah bel umnak ah a feh ih, bel cun zanriah thaw zet a rak pe ttheu.

Anansi ih unau pawl cu ni khat hnu ni khat an ttawl deuhdeuh. Asinan Anansi cu a thau deuhdeuh.

Ni khat cu a unaupa pakhat in, "Ziangah a thau ciamco? Thuthup a neih ka zum. Ka hawlsuak ding," a ti.

Curuangah a thaisun cu rawl hawl ding in a nu a thlun lo. Inn ah a um. Anansi cun inn ah zohman an um lo si hmang a ti ih, bel umnak ah feh in, "Bel, bel, putar hrangih na tuah mi kha, ka hrang khal ah tuah ve hram aw!" a ti.

Bel cun zanriah thaw zet a rak pe lala.

A unaupa cun a ttong mi cu a rak ngai thup. Bel thuhla a theih zo ruangah, a nu a sim. Cutikah zangfakza a nu cu a ttap.

"Fapa ttha lo pakhat ka nei a si hi!" ti'n a ttap rero.

Cumi sun ah Anansi cu a unau pawl thawn suakvak ding ah a fial. Anih cu inn ah a um ih bel cu zanriah pe ding ah a dil. Bel in zanriah a pek tikah, "Inn an ra thlen ahcun ka fa le pawl cu an va lungawi zik ve," tiah a ruat rero.

Anansi cu a unau pawl thawn an ra tlung ih, a nu cun zanriah a rak pe hai.

Asinan Anansi cun, "Ka dam lo tuk. Ka ei thei lo ding. Ka it men ding," a ti.

Asinan a va it lo. Bel umnak ah a va feh. Asinan bel cu a rak um nawn lo. A thaisun ah a nu cu an khua ih mualrawn ah a feh. A kut ah bel cu a keng phah. Mualrawn ah a ding ih bel cu funghreu te thawn a vaw rero. Cutikah mi tampi an ra suakkhawm. Cu thluh ah, "Bel, bel, putar hrangih na tuah mi kha, ka hrang khal ah tuah ve hram aw," a ti.

Cutikah bel cun rawl a pe. Anansi ih nu cun bel cu vei tampi a fial rero ih, rilrawng laittam ih um mipi pawl cu rawl a pe hai. Asinan a vei sawmnganak a fial tikah, bel cu a zupral. A kut ah zianghman a um nawn lo. Cutikah Anansi cu a thin a heng tuk. Putar hnenah feh sal in ziangkim va sim thluh a tum.

"Bel dang pakhat i pe ko ding," tiah a ruat. Tipithuanthum kap ah a va feh. Long sen te khal a rak um lai. Long sungah a lut ih putar ih inn ah a va feh. Putar cun Anansi ih sim mi thuhla cu a rak ngai.

Cu thluh ah, "Ka fapa, lo pek ding bel ka nei nawn lo. Asinan himi funghreu hi ka lo pe ding. Na ttong ding mi cu amah kel a si, bel aiawh ah funghreu timi lawng na thleng ding," a ti.

Anansi cun funghreu cu a la ih long umnak ah a tlan turto. Malte hman a hngak thei lo. Funghreu hnen ahcun, "Funghreu, funghreu, putar hrangih na tuah mi kha, ka hrang khal ah tuah ve hram aw!" a ti.

Cutikah funghreu cun Anansi ih zaang, a hmai thau er-er, a kut le ke thau memem pawl cu a vuak ciamco.

A taksa thau bembem cu hmun tinkim ah a vaw rero! Ziang ka tuah ding ti khal a thei lo. Tidai sungah a dawp ih a rang thei patawp in khatlam ral ah a leuh. Long le funghreu cu a tanta. Naute vek ih ttap thluahthlo in inn ah a tlung. Asinan funghreu thuhla cu zohman a sim lo.

Asinan cumi cu a hrangah zirhnak ttha pakhat a si. Tu ahcun ziangvek thil a neih khalle a unau pawl le midang pawl a hlawm ve ttheu, tiah mipi pawl in an sim.

Hram: The Greedy Anansi – African Folktale.