Arabian Zan 1001:
(14) Long Hnattuan Sindbad ih Khualtlawn Thuanthu
Siangpahrang Haroun-al-Raschid san ahkhan Baghdad khawlipi ah Hindbad timi thilri thiartu mi rethei pakhat a rak um. Vei khat cu sun khawhlum luar laifang ah khawpi khatlam deng ihsin a khatlam deng ah thil rit thiar ding in an fial. A fehnak ding hrek hman a thlen hlan ah a cau. A kiangkap a zoh tikah lamzin reh zet pakhat ah a rak thleng ti a hmu. Zin sir ah rose rim hmui nei tidai a luang ih zilthli dai zerzo a hrang fawn. Curuangah a phurh mi thilri cu leilung ah a tthum ih, innpi runthang pakhat ih phenthlam ah cawl ding in a to.
Rei lo te ah, cutawk hmun hnak ih nuam hril ding a um lo ding ti a theifiang mai. On mi tukvirh ihsin thing rimhmui le mutthai rimhmui ih rim pawl an ra suak ih, keh feh zin sa vohvo tlun ih a hung luang suak mi rose rim hmui nei tidai rim thawn an rawi aw. Innpi runthang sung ahcun thiam zet ih tum mi awnmawi awn pawl a vun thei. A kiangkap ihsin hla-zai-va le vate dang pawl in ti ngiaingo in zaihla an sak fawn. Cumi pawl le, ei-in thaw zetzet ci tintian ih rim a vun theih bet tikah innpi sung ahcun puai le nuamtawlnak a um a si ti ding tiah a ruat.
Cumi inn ropi cu tuihlan ih a rak hmuh dah lo mi a si ruangah a mang a bang. Ziangahtile himi inn ropi umnak lamzin hi khuimaw cang tete ah a rak zawh ttheu. Inn ropi neitu zo a si ti cu theih ngah rori a duh. Curuangah picang zet ih thuam aw in sangka ih a dingtu siahhlawh tthenkhat cu a va pan hai ih, an lak ih pakhat hnenah innpi runthang neitu zo a si tiah a va sut.
Siahhlawh cun, "Ziangtin si thlang, Baghdad ih um na si lo maw? Hitawk ahhin mi zah-um Long Hnattuan Sindbad, ni tleu a thlennak hmun tipithuanthum tinkim ih a thleng dahtu khualtlawng hminthang a um ti na thei lo maw?" a rak ti.
Sindbad ih neihsiah hlawnthil tamzia mipi ih an rel mi rak thei ttheutu Hindbad cun, anih hmuah hualvan siava a ton lai ah, lungawiza hualvan a neitu Sindbad cu iksik lo in a um thei lo.
Curuangah vanlam hun zoh phah in, "Ziangkim Sersiamtu Maksak, Sindbad ih nun le ka nun danglamnak pawl hi ruat hnik aw. Kei cun ni tinte'n harsatnak le vanduainak a thawng tel in ka tuar ih, keimah le ka innsang hrangih nunnak daih fangfang barley sang ngah ding in hna khunghar zetzet ka ttuan. Culai ah mi vanttha Sindbad cun a keh le vorh in sumpai a hmang rero men ih, leiram ih hnianghnarnak a cen! Ziang a tuah ruangahso hivek nun semrem na pek ih, ziang ka tuah ruangahso hivek hualvan harsa ka ton?" tiah ringpi'n a au.
Cumi ttong phah in, leitlun ah amah lo bak cu vanduainak le beidonnak tongtu um lo vek in, a ke thawn leilung a sirh. Cu lai ah inn ropi sung ihsin siahhlawh pakhat a ra suak ih, Hindbad ih kut ra kai phah in, "I thlun aw, mi zah-um a si mi ka pu Sindbad in lo biak a duh," a ra ti.
Cumi sawmnak a theih tikah Hindbad cu a mang a bang zet. Ralring lo ih a rak ttong mi in Sindbad ih lung a awi lo ter ding khal a phang fawn. Curuangah lamzin ih a tthum mi thilri cu a tanta thei lo thu puhmawh ah hmang in a el. Asinan siahhlawhpa cun a thilri cu an kilkhawisak ding thu a sim ih, nasa zet ih a sawm rero fawn ruangah Hindbad cun a el thei nawn lo.
Siahhlawh cu a thlun ih pindan kaupi sungah an lut. Cutawk ahcun ei-in ttha ci tintian umnak cabuai hil in mi tampi an rak to vialvial. Sunlawinak tohkham ahcun zah a khabehmul var sau pawl in zah-umnak an neihter mi pa picang pakhat a to. A tokham dung ahcun a duh mi pohpoh tawlrelsak ding in thatho zet ih dingtu mi bur khat an um. Cumi cu mi hminthang Sindbad cu a si. Cuvek thil ropi tuk a hmuh ruangah Hindbad cu a mang a bang tuk lawmam ih, mi zah-um pawl cu tthia durdo phah in upatnak a pe hai. Sindbad cun amah ra pan ding ah zaizir in a theihter ih, a vorhlam ah a toter. Cu thluh ah kheng sungah rawl a suak sak ih, sabitti ttha ci no khat a thletsak fawn. Ruaittheh a cem zawng ah Sindbad cun nel um zet in a bia ih, a hmin le a hnattuan a sut.
Thilri thiartu cun, "Ka bawipa, Hindbad tiah in ko," tiah a sawn.
Sindbad cun, "Hitawk ih ka lo ton hi ka lung a awi zet. Midang pawl khal keimah vek in an lung a awi ti ka thei. Asinan mitu ih lamzin parih na ttong mi kha ziang a si ti in sim awla ka duh," a ti. Ziangahtile puai an tuah thok hlante ah Sindbad cu tukvirh kiang ihsin a feh kherkher ih, Hindbad ih aihramnak a theih ruangah, ko ding ih a siahhlawh pawl a fial mi a si.
Cumi thusuhnak a theih tikah Hindbad cu a thinlung a buai thluh ih, a lu kun phah in, "Ka bawipa, ttawnttaihnak le thintawinak ruangah, thu dung thu hmai ruat lo in ka rak ttong pang ih, i ngaidam hram ding ah ka lo dil a si," tiah ngaidam a dil.
Cutikah Sindbad cun, "Aw! Lo mawhthluk ding khop ih mi dingfel lo ah i ruat hlah aw. Cuti si lo in, na dinhmun ka lo theithiam ih, ka lo lainat sawn. Ka thuhla na thei dik lo men sawn a bang. Curuangah thu dik lo theihter ka duh. Himi neihsiah thilri le hlawnthil pawl hi harsatnak le kangsia cakkhai zianghman um lo in ka ngah ih ka cen rero ah na ruat a si tengteng ding. Asinan cumi cu thudik thawn a hla aw tuk. Hivek dinhmun nuam hi kum tampi sungah harsatnak le thil ttihnung phunzakip ka ton le tuar hnu lawng ih ka ngah mi an si," tiah a sim.
Cu thluh ah a mikhual pawl ih lam hoi in, "Khah, asile, ka rualpi zah-um tla, ka nunthap zuamsuahnak pawl hi neihsiah hlawnthil duh hamttam pawl hman tipithuanthum pawl paltlang ih neihsiah hawlnak ihsin a ttihtthaih thei ding tiah ka lo sim ngam. Tipithuanthum parih vei sarih khual ka tlawnnak thuhla, le tipithuanthum le leilung parih kangsia cakkhai le mangbangza phun phun ka ton mi pawl hi fiangfai mumal lo tla cun nan rak thei zo tla a si men ding. Tu ahcun a kimcang le dik mi ka lo sim hai ding. Theih nuam nan ti ding khal ka zum," tiah a sim hai.
Cule, Sindbad in a nunthap zuamsuahnak thuhla pawl thuhla a sim hlan ah, Hindbad in a rel mi thu a rak ngai sungah, lamzin parih a tthum ta mi thilri cu a siahhlawh tthenkhat in a thlennak ding hmun ih va thiar ding ah thu a pe ta.
No comments:
Post a Comment