Pavua

African Thuanthu Roling (38):

Pavua

Zakia cu fala mawi le fimvar zet a si. A pa thawn an um. A fimvar zet ruangah a pa khal in thu a ron ringring. Asinan vei khat cu thu a ron lo ih Zakia khal a thin heng zet. A ron lo mi thu cu, siangpahrang in a fanu neihter ding in a pa a dil mi thuhla a si. Zakia ih pa cun a fanu zianghman simthei ta lo in siangpahrang hnenah, "Maw, ka siangpahrang bawipa, nangmah lo neih ding cu ka fanu a lung a awi zet ding," a ti.

Asinan Zakia cu a lung a awi lo. A pai' hnenah, "Cuti a si lo, ka pa. Ka theih lo mi mipa cu ka nei lo ding ih, ka duhdawt fawn lo ding," a ti.

A pa cun, "Ka duhdawt mi fanu, na neih lo ahcun siangpahrang cu a thin a heng tuk ding! Asinan mi ttha le fim a si. Zangfahte'n ka lo fial vek in tuah hram aw," a ti.

A netnak ah Zakia cun, "Si ko. Ka nei ding. Asinan Siangpahrang cun pumcawmnak ah sumtuah a zir a ttul. Cumi a zir lawng ah ka nei ding. Ni khatkhat ah a siangpahrang lukhum a hloh tla a si thei. Cuvek thleng pang sehla ziang kan tuah ding? Kan rethei ding ih, rilrawng in kan thi ding. Siangpahrang hnenah feh awla, ka saduhthah hi va sim aw," a ti.

Zakia ih pa cu siangpahrang hnenah a feh ih a fanu ih saduhthah cu a va sim. Cutikah siangpahrang cu a hni ih, "Na fanu hi a hmel a tthat lawng si lo in, a fimvar zet a si hi. I dil mi cu lungawite'n ka tuah ding. Kan neihawk ahcun kan nuam zet ding ti ka sim ngam," a ti.

Curuangah siangpahrang cun thilphiar a zir thok. A rei hlan ah pavua mawi zet a phiar thiam ih, Zakia hnenah laksawng ah a kuat. "Ka pek mi laksawng a duh ahcun, i nei tengteng ding," tiah a ruat.

Zakia cun pavua cu a duh zet ih, "Tu ahcun siangpahrang in i duhdawt ti ka thei," a ti.

Thla khat sungah an nei aw ih, nuam zet in an um tlang. Zakia cun a ruahnak fimvar zet thawn siangpahrang cu a bawm ttheu.

Ni khat cu siangpahrang in Zakia hnenah, "Ka mipi pawl hi theihfiang ka duh. Ziang an ruat, ziang an duh timi ziangtin ka thei thei ding?" tiah a sut.

Zakia cun malte sung a vun ruat hnu ah, "Ka Siangpahrang bawipa, midang theihfiang kan duh ahcun, amah thawn um tlang asilole anmah ton leuhleuh a ttul. Kan mipi pawl ih hnipuan vek hruh awla, kan khawpi ih lamzin pawl ah na va ton hai a ttul tiah ka ruat," tiah a sim.

Siangpahrang cun, "Na ruahnak hi ka duh," a ti ih, a thaisun ah a tlangbawi pahnih thawn khawpi sung ih lamzin ah an veivak. A rei tikah zanriah ei can a kim.

Siangpahrang cun, "Inn ah zanriah kan zawh lo ding. Mipi pawl ih rawl an einak dawr ah kan feh pei," a ti.

Curuangah lamzin te pakhat ih dawr te ah an feh. Asinan pindan sungih an lut vete'n, zial a pelh ih zial hnuai ah an tla. An au rero nan, bawmtu ding zohman an ra lo.

Siangpahrang cun thinheng zet in, "Siangpahrang hmuah dan ttha zet a si hi! Khuiah kan thleng? Ziangah hinah kan thleng?" a ti. Cutikah hnih awn an thei cih ih, an tlun zawn ah putar hmel se zet pakhat a um kha an hmu.

"Ha! Ha! Ha! Tuihnu ni thum ah ka lo that hai ding ih, nan sa thawn kan dawr hrangah hmeh thaw zet ka tuah ding. Kan dawr ih hmeh thaw zet ruangah mi hmuahhmuah in kan dawr hi an ngaina! Ha! Ha! Ha!"

Cumi a ttong thluh ah putar cu a tlan sal. Tlangbawi pakhat cun, "A ra kirsal tikah zo kan si ti kan sim pei," a ti. Asinan siangpahrang cun, "Si hlah. Cumi a theih ahcun tuini ah in that ding. Ruatnak ding can i pe ta uh," a ti.

Phar kiang ah a to ih thu a ruat. Nazi mallai a rei hnu ah putar hmel sia cu a ra kir. Tidai mallai vun thlak phah in, "Himi hi nan in ding mi tidai a si. Asinan rawl cu ka lo pe hai lo ding. Nan thau tawk zo," a ti.

Siangpahrang cun, "Kan thih a ttul ahcun, kan thi ko ding. Asinan lo sim duh mi pakhat ka nei. Ka lo sim mi na tuah ahcun paisa tampi na ngah ding," a ti.

Putar cun, "Paisa cu ka duh lawlaw. I sim hnik!" a ti.

"Kei hi thilphiarthiam ka si ih, siangpahrang ih nupi in ka kutsuak a ngaina zet. Pavua pakhat ka phiar ding ih na va pe ding. Cumi na tuah ahcun, na dawr rawl thaw zet ihsi na ngah zat hnak ih tam paisa na ngah ding ti ka lo tiamkam ngam."

Putar cun pat le thil phiarnak fung a vun thlak ih, siangpahrang cun hna a ttuan cih. Zakia hrangah pavua mawi zet a phiar. Putar cun pavua cu a la ih siangpahrang ih nupi hnenah a hei keng. Siangpahrang nupi va ton ding cu a har zet. Asinan a netkhawt ahcun siahhlawh pawl in an lutter. A lut ngah in, "Pavua mawi zet pakhat ka nei. Zangfahte'n zoh hram aw. Thilphiar thiam zet pakhat ih phiar mi a si. I lei duh pei maw?" tiah siangpahrang ih nupi cu a sut.

Zakia cun pavua a hmuh tikah siangpahrang in harsatnak a tong ti a thei cih.

Curuangah, "Aw, pavua mawi zet a si hi. Ka duh zawng a si ih, ka lo lei ding," a ti.

Zakia cun pauva cu a lei. Asinan putar cu thlun ding in a siahhlawh pawl a fial. Amah khal in rang to phah in a siahhlawh pawl cu a thlun. Rawl dawr an thleng ih a sung ah an lut. Zakia cun lamzin ihsin a rak hngak. Rei lo te ah dawr sungah doawknak a suak. A netnak ahcun siangpahrang le a tlangbawi pahnih cu an luat.

Rawl dawr ihsi an ra suah tikah siangpahrang in Zakia a hmu ih, "Ka duat Zakia, ka nunnak i runsuak. Leitlun ih midang hmuahhmuah hnakin ka lo duhdawt sawn," a ti. Cumi ttongkam a theih tikah Zakia khal a lung a awi zet ih, an nupa in siangpahrang inn ah an tlung.

Hram: The Handkerchief – African Folktale.